【王道】《我每晚都會發畀阿哥追殺嘅惡夢》: 第四十章————藍色瞬影（混戰篇）
入夜後，各人再次連進夢中。
進夢後，Peter看不見其他人，一找之下，發現阿藍等人在訓練室。
「你地聚哂喺到做咩？」Peter問。
「咦，楓呢？你地唔係勸佢翻嚟咩？」Gary反問。
「.......楓，佢暫時都翻唔到嚟....」Peter回話。
「點解？連小秋都勸唔到佢咩？」Marla追問。
「哥哥佢應該有自己諗法...唔通夾硬逼佢翻嚟咩...」小秋灰心地說。
「唔好講佢，你地喺到做咩？」Peter再問。
「我地訓練緊想像能力。」阿藍回答。
「係，成效都唔錯。」Marla把聲音傳遞至各人的腦中。
「Marla而家可以一次過傳聲畀咁多人。」阿藍說。
轟—！
外頭傳來一陣破壞聲。
「咩事？出面無無啦咁大聲。」阿藍問。
「出去睇下。」各人趕出去看個究竟，發現用來進入RPG城的城門被人破壞掉。
「唔通掠奪團班人翻咗嚟？」Gary問。
「仲以為佢地唔會諗到我地會匿翻喺一開始嘅地方。」阿藍說。
「佢地有咁多同伴，唔排除有啲人嘅能力可以追蹤到我地。」阿淵都趕到現場。
「但佢地嚟有咩目的？」Peter問。
「佢地好可能諗住用人海戰術制服我地，而家又有藍火蟻毒喺手，一舖收我地皮都唔成問題。」阿淵回話。
「講得啱，完全中哂我地想做嘅事。」幾個身影從用來連接城門入口的可製大橋走過來。
「你地！」阿藍看見那幾張臉後，變得緊張。
「我地七色極光，少咗一色，真係幾唔慣。」原來是七色極光眾人。
「不過有樣嘢你地估唔中，就係我地要破壞埋阿淵打code嘅基地。」七色極光說。
「咩話？！」阿淵轉頭一看自己基地的位置。
「阿輝！佢真係中計喎，睇嚟基地就係嗰邊啦！」七色極光對遠處呼喊。
「你地陰我！！」阿淵瞪著他們。
阿淵被七色極光唬爛一下便暴露了基地的位置，幸好他們只是知道方位，並不知道阿淵有把基地藏在地底的習慣。
「係你傻咋，白痴！」話音一落，七色極光便猛然襲來。
「呢度交畀我，你地快啲過去守住。」阿藍預備戰鬥架勢。
「得你一個，得唔得架。」Peter問。
「擔心下阿淵個基地仲好啦。」阿藍對Peter說：「阿淵整咗把新武器畀我，放心信我。」阿藍展示了掛在腰間的一雙鐮刀。
「.......」其他人馬上往基地方向奔去。
一到入口，卻發現阿輝和露仁夾已經帶了大批人馬埋伏Peter等人。
「歡迎各位。」阿輝手上拿著藍火蟻毒瓶，發出不懷好意的笑容。
「咁快又見面。」露仁夾的身旁帶著嗜血獸。
「今次仆街....」Gary看到至少過百人圍著自己。
「人地話，用最爛嘅牌打低對手咁先贏得精彩，我就覺得手上都係最好嘅牌，完美咁壓制對手咁先贏得痛快。」阿輝一聲令下，所有人開始發動攻擊。
「你地真係當我流架喎。」阿淵也不甘示弱，召回自己的分身，拿出各種武裝準備反擊。
幾枚炮彈轟在人群之中，人們急忙走避，有人的能力可以暫時抵擋攻擊，雙方僵持在這膠著狀態。
「雨仔，到你出場。」阿輝指示從後的Hugo出來：「聽其他人講你嘅能力好實用，幫我搞掂佢地。」
「.....好。」Hugo聽從指令，向Peter等人發出攻擊。
「Hu….」Peter想起Vincent的決定，無可奈可之下就預備反擊。
同時在RPG城門大橋前，阿藍與七色極光正在開戰。
七色極光六人散開並在不同方位衝向阿藍。
阿藍不慌不忙，在他們馬上要碰到自己的時間，合上眼睛。
連強風都來不及感受，眨眼之間阿藍就消失在六人眼前。
「佢...唔見咗？」六人驚詫。
「我喺呢邊。」阿藍在大橋的另一端說話。
「哈....！嚇鬼咩！你能力係瞬間轉移？」六人冷笑：「不過能力係咩都冇用，你睇下阿輝畀咗啲我地？」
其中三人拿出藍火蟻毒素的小瓶：「我地已經落咗毒係武器上面，只要你一行近就實死無生！」
他們接著說：「念在你曾經係我地嘅同伴，而家畀多次機會你，棄暗投明啦。」
「同伴？」阿藍回話：「你真係當過我係同伴？」
「唔係同伴會畀你跟住我地搵食？」
「你地都幾好笑，每次有好嘢就你地圍埋分享，有衰嘢就我出去頂。」阿藍反駁：「嗰一次Peter放箭，你仲諗住攞我嚟擋，原來呢啲叫同伴？」
「咁一隊人就係有高有低架啦，唔係好似個Vincent咁，連個癲佬都包容埋呀？」
「至少佢比起你地有翻多少少良心，掠奪團只係一個自私鬼嘅集中營。」
「咪玩啦，人本來就係自私嘅生物，我地只係順應本性去做，有咩問題？」
「呢啲係咪阿輝同你地講？」
「係又點唔係又點，總之呢句嘢就係正確。」
「唔怪之得你地可以埋到堆。」阿藍拿出藍色長布，綁在額上。
「當初你會跟住我地，證明你都係啲咁嘅人咋，依加想扮清高洗白自己呀？」
「我係佢地身邊....感覺到嘅唔單止係利益輸送，而係真正嘅朋友。」阿藍把布拉下，蒙住雙眼，再拔起放在腰間的一雙鐮刀。
六人見狀，各自手執武器：「六個打一個，仲有毒素喺手，邊有可能..... 」
話音未落，其一人已先倒地，身體被鐮刀開成兩半。
「邊有可能咩？」阿藍站在了五人旁邊。
「你...！」他們馬上反攻。剎那之間，阿藍身影再次消失於空氣中。
就在五人不安惶恐之時，咻咻兩聲，二人應倒地，死狀與第一人相同。
六人只剩下三人，他們背對背保護著大家後方。
「點都好，希望你地有一日明白我講嘅嘢。」阿藍瞬間現身在他們眼前。
三人已經慌得聽不進阿藍的話，只是本能反應馬上作出攻擊。
但結果顯然易見，阿藍以壓倒性的實力擊潰了七色極光。
面對捕捉不到的對手，他們連反擊都沒辦法做到。
阿藍拉起蒙眼布，看清楚六人死相，嘆了一口氣。
轟隆一聲，RPG城內發出巨響。
「要快啲過去幫手先得。」阿藍便奔向阿淵等人的方向。