【王道】《我每晚都會發畀阿哥追殺嘅惡夢》: 第三十五章————兩大陣營（掠奪團篇）
「咩事又係到叫呀，咪試過唔得囉。」阿藍打開眼，坐起來。
「你...你...你試下合埋眼跑步！」Peter仍未能定下神來。
「又想試嗱？好啦好啦。」說罷，阿藍便閉上眼開始跑步。
阿藍再打開眼時，只見Peter目瞪口呆地看著他。
「做咩呀你，未見過人跑步咩，咁驚訝做咩。」阿藍說。
「你真係唔知？你真係感覺唔到？」Peter追問阿藍。
「感覺啲咩？咪合埋眼跑步囉。」
「你啱啱跑得超快喎！！」
「我....完全唔覺喎....」
「即你你嘅能力係合埋眼可以加速，但自己感覺唔到？」
「嗯.... 我諗與其講自己感覺唔到嘅話，會唔會反而我合埋眼，我嘅時間就變慢？所以你會睇到我變快咗而我又感覺唔到？」
「係！我就係想咁講囉！」
「好嘢！我終於都覺醒到能力！」 阿藍與Peter高興地擊掌。
Peter替阿藍高興過後，沉靜下來：「但係我仲未....」
「好喇，我諗各位要覺醒能力嘅人都覺醒哂啦。」Vincent回到比賽場地宣佈：「依加就開始實戰課，麻煩大家聚翻過嚟。」
「你唔好諗咁多住，可能陣間就會發動到，我地過去先啦。」話音一落，阿藍便前去Vincent那邊。
Vincent看看人數，雖然很多人中途放棄，但成功覺醒也有過百人。
「好，咁就照翻原本咁，進行淘汰賽，不過可以用想像能力。」Vincent說。
「咁規則可唔可以殺人？」露仁夾問。
「因為係學習階段，所以比賽最好都點到即止，唔好殺人。」Vincent答。
「咁如果....又有人好似上次咁失控屠殺人呢？」露仁夾瞄了楓一眼。
「如果大家係擔心楓嘅話，大可以放心，我相信喺公平為大前提之下，佢係唔會再次暴走，我對佢好有信心。」Vincent走到楓面前，拍了他的肩膀一下。
「Vincent.....多謝你信我。」楓彎起了他那八字眉。
「啍，又係幫住呢條友，都唔知係咪同你有親。」阿輝故意提高聲線。
其他到聽到都開始起疑，眾說紛紜，討論Vincent的可信性，還有他和楓之間的關係。
「各位唔好有咩誤會，我只係欣賞有才能嘅人，同埋楓真係冇危險性，呢樣係真。」Vincent解釋。
「開口埋口都係楓，咁講我地仲似係楓嘅陪襯多啲。」阿輝繼續煽動群眾。
「唔好...屈佢！」楓對眾人發出敵意。
「你地睇下，你地睇下！佢又想嚟料喇。」阿輝轉身對眾人說：「計我話，我地都學識點用能力啦，仲使乜成個信徒咁聽佢講嘢，不如走啦。」
「.......」露仁夾給了一個不屑的眼神Vincent，轉身就跟著阿輝離去。
各人見狀都徐徐散去，慢慢只剩下Peter、Marla、Gary、楓秋兄妹、阿淵和阿藍。
「你地真係要走？你地信阿輝講嘅嘢？」阿藍試著挽留七色極光其他成員。
「我地都唔想再聽人指揮，你都跟我地走啦。」七色極光成員勸阿藍一同離開。
「........」阿藍望一望Peter，想起剛才的回憶，便說：「咁算啦，你地走啦....」
楓沒有再說話，只是一直瞪著阿輝離開。
阿輝注意到，便說：「你都小心啲，做好心先提你，Vincent呢個人信唔過，佢有嘢瞞住我地，好大機會係利用緊你。」
「............」楓依舊沉默不語。
「睇你成世都冇人對你好過，無啦啦有人對你咁好，實畀佢洗哂腦啦，聽唔聽我講就由得你，反正唔係我受害。」說罷，阿輝的身影也漸漸遠離。
「楓，唔使理佢，佢只係想煽動埋你。」Vincent馬上對楓說。
「我信，我信你架。」楓又彎起八字眉，只不過內心開動對Vincent的信任動搖。
「哥，佢話你有嘢瞞緊我地，係唔係真？」Peter再追問。
「你信唔信你親生哥哥？」Vincent淡淡回了一句。
「.......」Peter看著手腕上，Vincent送的手錶。
儘管眼前這個哥哥再多謎團，再多疑點，但曾經的親情是無法否認的事實。
「我信。」Peter回答。
「Peter，要問關於個標誌嘅事呀。」Gary提醒Peter。
「係喎，哥哥你知唔知係現實睇到某個標誌就連到入夢呢件事？」Peter問Vincent。
「個標誌係.....」
碰—！
「嗄....嗄....！」Peter又滾到床下，驚醒過來。
「又問唔到阿哥嘢！」Peter生氣地錘了自己大腿一下。
然後看一看鬧鐘，發現已經是早上七時多，今天是上學日，便趕快梳洗後出門回校。
「早晨...Gary...」Peter有氣沒力地跟Gary打招呼。
「嘩，搞乜你咁冇精神。」Gary驚訝。
「你覺醒咗能力就緊係唔攰啦！」Peter伏在桌上。
「你地係夢到搞咩嚟？咁攰咁嘅？」Hugo久違的登場。
「Hugo！！！」Peter馬上向Hugo哭訴：「冇咗你個腦真係過得好苦！！」
接著Peter把最近夢裡發生的所有事告知Hugo，Hugo也明白事情的來龍去脈。
「咁你會唔會同翻我地一齊入夢呀？」Gary問。
「你地知聽日就開始考試架可？」Hugo反問。
「死火！！完全唔記得呢件事！」Peter和Gary嚇得神色大變。
「咁啦，我地畀心機捱埋呢個考試週，跟住再一齊入夢？」Hugo提議。
「快啲交哂啲筆記出嚟！！！」
於是乎，Peter和Gary在Hugo的指導下，開始渡過他們的考試週。
而班上原本連夢的幾名男同學，現在只剩下露仁夾孤身一人繼續連夢。
基於整一個多星期只專心考試，沒有連夢，所以有甚麼大轉變都不太清楚，但透過電話，阿淵都把大致上的情況告知Peter等人。
在這一星期有多的時間內，夢世界變得一團糟，一來有越來越多的新區域出現，二來以露仁夾作武力頭領、阿輝作戰略頭領的掠奪團隊也不斷擴大。
掠奪團的所作所為令人髮指，利用現實世界的標記，吸引更多新人入夢，然後以多欺少，不停把人殺掉奪取好處。
而且聽聞Peter的哥哥Vincent也正在召集團隊，去阻止掠奪團的自私行為，但可惜人的本性都是貪婪邪惡的。
在這個無法律管制的夢世界下，任意姦淫擄掠，行為日漸猖狂，無人願意去幫助Vincent，犧牲自己獲益的好處，所以Vincent方也只有阿淵阿藍、楓秋兄妹支持。
不過Vincent方都是極具戰鬥力的人員，即使人數上有輸蝕，也不足為懼。
總結而言，現時夢世界分了兩大派，一邊是由阿輝帶領的掠奪團，另一邊是由Vincent帶領的守護軍。
「最於都考完試啦！」Peter伸了一個大懶腰。
「唉，呢個禮拜真係生不如死。」Gary沒力的伏在桌上。
「不過好彩有Hugo幫我地溫書咋，如果唔係就冚家剷啦。」Peter向Hugo道謝。
「總算完咗一件事，不過一波未平，一波又起。」Hugo一臉認真地說：「要開始處理夢世界嘅事。」
「嗯，今晚我通知埋Marla，我地要連翻入夢，去幫哥哥手。」Peter說。
.................
.........................
入夢後，四人連到了之前的比賽場地。
但場地中看不見半個人影，以往熱鬧的人潮也消失不見，只剩下這個無人打理的廢墟。
「呢度一個人都冇。」Hugo視察四周環境。
「佢地去哂邊？」Gary也摸不著頭腦。
「聽阿淵講，個世界越嚟越多新區域，佢地可能分散哂。」Peter回話。
「咁我地咪要四圍搵？」Gary只是想想都覺得累。
「唔使擔心！我有心靈感應，可以叫阿淵佢地去某個地方聚頭。」Marla自豪地說。
接著，他們四人便與Vincent團隊在一個新區域聚頭。「終於現身喇咩！」阿淵指著Hugo：「上次你用奸計先贏到我！快啲重新決一勝負！」
「上次真係唔好意思，我趕住救Peter，先迫不得而咁做，如果唔係邊贏到你，真係對唔住。」Hugo道歉。
「.......」阿淵放鬆了心情，顯然有點失落：「仲諗住同你再決高下....」
「你叫Hugo？我係Peter哥哥，叫做Vincent。」Vincent伸出了右手以示友好。
「你好。」Hugo經過崔翼望一事後，變得更加謹慎小心，未完全知道對方底細，都不會隨意接觸，於是沒有握手，只點點頭：「我係Peter同學。」
「係，嗱嗱聲問定先，廢事又問唔切。」Peter問Vincent：「哥哥你知唔知關於逃生牌標誌嘅事？」
「關於呢件事，我諗都係時候要同你地講清楚。」Vincent解釋：「個標誌係我整出嚟，我講過我只道關於呢個夢嘅一切，自然都知道達到咩條件先可以連夢。」
「我之前一定要諗住Peter先連到夢，依加靠個逃生牌就得，你係咪知道箇中原因？」Hugo追問。
「可以咁講，不過好難解釋畀你地聽，我本神通說明書只有我先睇得明，要講翻出嚟都需要時間整理。」Vincent再說：「但我點都估唔到，竟然有人利用個標誌，令到咁多人連入夢。」
「咁你最初又要整第一個出嚟？」Peter疑惑。「我原本只係想當遊戲封測咁，有緣人先入到嚟。」Vincent回答。
「咁就多得你唔少啦，而家搞個大頭佛出嚟。」阿淵嘲諷Vincent。
「我諗冇人估到人嘅本性係咁邪惡，呢啲事邊個都唔想，當下之急係點解決掠奪團。」Hugo理智地提議。
碰—！
不遠處猛然出現一聲巨響。
「楓秋兄妹好似去咗嗰邊，唔通又發生咩事。」阿淵看去發出巨響的方向。
「快啲過去睇下。」說罷，他們便奔向那邊。一到達現場，只見楓身上散發濃厚黑氣，與一些不知名人士對峙，黑氣覆蓋的範圍都已被壓力壓至碎裂，而小秋躲在他的黑氣後。
「喂你地又想人多蝦人少？」阿淵對那些人怒喊。
「冇～見佢兩個咁孤獨，諗住玩下啫～」那些人嘻笑著：「點知一玩就起哂鋼咁～」
「唔好信佢地呀，佢地本身諗住偷襲我同哥哥架。」小秋對Peter等人說。
「你地係咪阿輝嗰班人？」Vincent走到那些人面前。
「係又點，唔係又點，你呢個神棍唔需要知。」那些人回話：「你咪殺我地囉，殺完又可以再連夢，怕你有牙咩。」
Vincent聽到後，臉色一變，由平常的和顏悅色，變得淩厲銳利：「見唔唔見我身後面係邊個？記唔記得佢當日點屠殺啲人？記唔記得啲血點濺落你地身上？」Vincent再近靠他們耳邊：「如果唔想見我地一次死一次，就帶呢番說話同阿輝講。」
「擒賊先擒王，我地自然都有辨法對付佢，叫佢小心慘死。」Vincent對他們說完後，便轉身回來。
那些人聽完後都收起了原本的嘻皮笑臉，急步離開了現場。
「哥，你同佢地講啲咩嚟？點解無啦啦走得咁快。」Peter好奇。
「只係兇一兇佢地，班友仔就驚到走夾唔抖。」Vincent清清嗓子：「講翻正經事先，我地要諗對策解決阿輝佢地。」
「關於呢點，我有一個提議。」Hugo率先開聲。