【王道】《我每晚都會發畀阿哥追殺嘅惡夢》: 第二十八章————黑氣（楓篇）
「頂你個肺，kick我？」Gary立即站起身，與露仁夾一同跑向金羊。
「你走開！」露仁夾拔出刀，向Gary斬去。
「......！！！」Gary正在全力奔跑，閃避不及，被他直接命中前胸，痛入心扉，曲下身體。
「哈哈哈！時間仲有唔夠十秒，今次真係贏得輕鬆喇！」露仁夾抱起金羊就跑向紅線。
但就在起步那刻，Gary一把抓住了他的腿，用力拉向後方，令露仁夾倒在地上。
Gary就像沒受傷般，馬上搶去金羊，跑到了紅線內。
「時間到！」阿淵猶豫了幾秒，接著說：「今次係Gary勝出！」
話音一落，阿淵就跑到Gary那邊，把他拉到一旁：「喂，你係咪用想像能力，咪講咗唔畀用囉。」
阿淵見Gary被砍中，傷口深度本應血如泉湧，但他卻突然相安無事地站起來，傷口更是已經痊癒，便猜想Gary是動用了想像能力。
「我唔係想用架，但唔知點解就自己發動咗，你信我啦！」Gary急忙解釋。
「嘩你咁都講得出！」阿淵看Gary的神情又不像是在撒謊，便說：「好啦，睇你都唔似會呃我，信住你先，下次再用就直接淘汰你！」
「點解會咁架呢....」Gary自己都不明原因。
「好喇，咁事不宜遲，第三場比賽馬上展開！」阿淵回到主持台上：「呢次係楓對阿輝！！！」
楓緩緩步出場地，面對群眾，他額上的八字眉比平常來得更憂鬱，看到對手後，那眉毛彎曲得更誇張，他的對手就是剛剛在休息室揶揄過自己的那名男子，原來他名為阿輝。
「...........」阿輝問阿淵：「呢條友今日先開始連夢喎，真係要我同佢比？」
「比賽唔關連夢幾多日事嘅，比你就比啦。」阿淵回答。
「唉，咁我當熱下身啦。」阿輝活動身體。
「.......問你一個問題....」楓向阿輝搭話：「當兩個陌生人企埋一齊嗰陣應該講咩話題好？」
「吓，無啦啦講咩呢你。」阿輝回話。
「我就係唔知而家要講咩話題，先問你呢條問題。」楓說。
「你真係好九唔搭八....」阿輝感到奇怪。
「你兩個唔好掛住自己傾計啦！聽我講今場比賽內容。」阿淵宣佈：「你地要蒙住對眼，點著蠟燭行過去場對面插落個蛋糕到，枝蠟燭一熄咗就要重新嚟過，時間到之前插得最多嗰個就贏。」
「痴線架，咁高難度點玩呀，我仲要揀咗雙截棍！」阿輝不滿地向阿淵投訴。
「你唔好躁住，你睇下你對手揀咩武器先啦。」阿淵回話。
「呢把嘢真係好重....點用先好....連揀武器都失敗咗....」原來楓選擇了一把電鋸，但初次接觸此用具，連發動的方法也不知道。
「算啦！對手都戇居居咁，快啲蒙眼開始啦。」阿輝和楓雙雙蒙起了眼。
他們首先站到放滿了蠟燭的容器前，拿起把它燃點。
「咪住！咁我地點睇到枝蠟燭著咗未？」阿輝問。
「或者....你可以試下放隻手上去....睇下有冇熱力....」楓回答。
「我而家係問你咩？你懶醒咁答我做咩？好叻呀？」阿輝對楓甚是不滿，扔下蠟燭就用雙截棍擊向楓的方向。
碰—！
「......！」雙截棍亂揮，擊中了楓的背部。
「哈！係喎！規舉都冇講唔畀殺人，咁我殺咗你咪直接贏囉，仲點咩蠟燭！」阿輝繼續攻擊楓。
「唔好....」楓感到疼痛，心裡便急起上來，可是手上的電鋸怎樣也發動不到，在場的觀眾都對他大喝倒采，嘲笑他的愚笨行徑，令他的心跳越是加快。
「傻仔！呢度冇人歡迎你呀，新手仲想贏我？」阿輝不斷抽擊楓的身體。
「我.....我.....好大壓力.....唔好呀....」楓如熱鍋上的螞蟻，心急如焚，冷汗浸透了身體和蒙眼的布，噗、噗、噗、噗，緊張得連自己的心跳聲都聽得清清楚楚。
「你.....」阿輝話到一半。
嘭—！！
猛然一聲巨響，水點灑在了楓的身上，蒙眼中的他感到一陣涼快，阿輝的攻擊也停了下來。
「...邊個喺到淋水...？」楓問。
但場內鴉雀無聲，無人回他話。
「做咩咁靜......」楓問完仍然無人回話：「你地唔講嘢...咁我除咗塊布佢....」
結果眼布一脫，瞬間看到令人極度毛骨悚然的畫面，阿輝消失已經不見，取代他的是一攤血漿，觀眾席上也未能幸免，被灑遍了血點。
「點解....會咁....」楓被嚇得退後幾步，再看看自己身上也被染上的大量血液。
「你啱啱....身邊周圍出現咗啲黑氣.....跟住，黑氣範圍內嘅所有嘢都被壓扁哂。」阿淵首先開聲說話。
「吓...」楓看一看那個原本盛著蠟燭的容器的確是被壓扁了：「咁....咁算唔算係我贏...？」
「其實，正常嚟講....都算係嘅。」阿淵說。
「好....好嘢呀！我終於有樣嘢成功啦！！！」楓高興得手舞足蹈。
「唔係咁都計佢贏呀嘛！」
「佢似係出矛招喎！」
「呢條瘦骨仙都贏到？我唔信呀。」
「係囉，佢明明咁廢。」
觀眾明顯對這結果並不滿意，即時眾說紛紜。
楓聽到他們的說話，回頭便看上觀眾席：「點解....？點解你地要咁對我？點解要連我唯一一次嘅成功都想攞走呀？！」
此刻，楓想起阿輝曾說過這裡無人歡迎自己，他額上的八字眉彎得更是厲害，心跳再次變快。
「好.....你地冇人歡迎我.....」楓身邊出現一縷縷的黑氣，覆蓋範圍變得更廣。
「條友咩事呀....嗰啲黑氣...我係咪發緊夢。」
「係呀，你真係發緊夢呀。」
觀眾都被楓又再出現的黑氣嚇倒。
「咁你地就去死啦—！！！」楓衝向人群。
「大獲，唔好畀佢咁做呀！」Peter反應過來，跑出場想阻止楓。