【王道】《我每晚都會發畀阿哥追殺嘅惡夢》: 第二十五章————海旁魔術（楓篇）
四人會議解散後，阿淵和Gary都另走別路，剩下Peter和Marla一同回家。
「估唔到哥哥佢有機會仲生存緊....」在路上，Peter和Marla開始聊天。
「係囉！我諗佢唔露面嘅原因都有可能係為你好。」Marla說。
「.......希望佢真係平安啦。」Peter看一看哥哥當年送給他的手錶，倏然想起：「啊，係喎。」
「咩事？」Marla側頭疑問。
「呢個，我送畀你啦，多謝你上次救我，呢件嘢整得太多時間，所以而家先畀你，希望你鍾意啦。」Peter從書包拿出一件木雕公仔。
那木雕是一個小吊飾，形象是怪獸公司中的毛毛。
「嘩，你自己整架？」Marla對這件木雕甚是詫異：「好靚呀，唔講仲以為出面買。」
「你好誇張呀！我覺得整得唔係咁好架咋....」
「即係你覺得唔好都照送畀我嘅～」
「咁....咁又唔係....諗住擺咗咁多心機....你又鍾意呢個角色....」
「係喎，你又知我鍾意毛毛？」
「um…..之前見到你whatsapp張icon係抱住毛毛公仔，咁咪估你鍾意，啱唔啱先？」
「都算你估得啱啦～嘻。」Marla對著這木雕報以一個甜美笑容。
Peter看見Marla喜歡自己送的手工，心裡非常滿足，經歷過不可勝數的冒險和相處時間，他對Marla早已牽上了萬縷愛意，只可惜仍是覺得自己襯不起這種優異女生，那一絲絲的自卑感湧上心頭，把原本高興的情緒沖淡。
「其實你知唔知我第一次係夢見到你嗰陣，係覺得你好似毛毛架？」Marla停下來對著Peter說。
「吓....唔知呀.....點解會似？」
「因為你都好似毛毛喺怪獸公司套電影咁，由道門出嚟，而且仲搏哂命咁保護我...」
「我記得，畀道友明追殺嗰次....」
「所以.....你知我鍾意毛毛架係咪？」Marla雙眼柔情似水，臉頰微紅的看著Peter。
「我知呀！件木雕我用咗好多心機整架！」Peter接著說：「仲有Hugo同Gary份禮物都未諗好，不如你幫手一齊諗？」
「哼。」Marla對於Peter的遲鈍，感到有點生氣的快步往前走。
「做咩呀？你唔想幫手諗都可以架。」Peter伸出手拉住了Marla。
Marla注意到Peter的雙手貼滿了膠布，應該是為了自己的禮物而破損，瞬間就氣意全消。
「好啦好啦，咁你有冇咩想送畀佢地？」Marla問。
「我諗住都係送手工嘢畀佢地...但男仔可能唔鍾意呢啲...」
「點會呀，你整得咁靚，收到實會好開心。」
「真係？不過我都仲未諗到整咩好。」
「我幫你手一齊諗啦～趁得閒而去買埋料～」
於是，他們二人便前往美術用品舖購買材料。
「終於都買好哂～」Marla說。
「係囉，估唔到咁快就搞掂。」Peter回話。
「時間仲早，不如搭多幾個站去海旁行下先？」Marla提議。
「又好啫，我都好耐冇行過海旁。」
地點轉移到了一條長長的海旁，時間正值黃昏，金澄澄的光輝映照在每個走過的人身上。
「呢度真係好靚。」Peter看著夕陽說。
「我都覺。」Marla想起一個疑問：「話時話，點解你會鍾意做手工嘢嘅？」
「um…..」Peter又看一看手腕上的手錶：「我諗都係關哥哥送畀我嘅呢隻錶事。」
「呢隻錶？」
「每次見到佢，我都覺得一件咁細嘅嘢都可以蘊藏住無數咁多心思，而且佢地仲可以由人手親自做出嚟，明明有啲零件直頭同人嘅手大細相差幾十倍。」Peter繼續解釋：「每次一諗到呢點就覺得好神奇，所以好想試下做出嚟係咩感覺，呢件都係我一直想做嘅事。」
「喔.....原來係咁....」Marla看著Peter認真解釋的樣子，心中不禁泛起一點點漣漪：「之前見你投擲咁叻，仲以為你係打開籃球。」
「嗰個原因其實都幾搞笑，係因為我平時上中文堂太無聊，玩射垃圾桶而練成。」
說到為甚麼不選擇自己擅長的東西去發展，Peter自己也不太清楚，也許投擲這玩意到底只是因無聊而練成的技能，做手工才是自己真正想做的事，堅持自己的想法就是Peter嘗試的原因。
「哈哈，咁你上堂都真係幾無聊喎！」Marla笑得開懷。
「喂！喂！喂！喂！喂！咁多位觀眾埋嚟睇下！」一位披頭散髮，皮膚蒼白，眼上掛著憂鬱八字眉的男子正在海旁表演魔術，人群也漸漸開始聚集。
「咦，好似有表演睇啵。」Marla拉著Peter走過去八掛。
「睇住唔好眨眼啦！」那男子右手上拿著一個鐵籠，鐵籠中放著白鴿，以白布蓋著，用來遮住那隻鳥。
啪—！
他左手大力一拍，鐵籠被他壓扁了，一滴滴鮮血從白布上流下來，圍觀的群眾都嘩然起哄，指責他借魔術名義公然殺害動物，有與家長同行的小孩更被嚇哭。
「啊啊啊，又失敗咗，連魔術都衰埋添。」咻的一聲，他用左手把白布扯開。
看見鐵籠中的真相後，群眾起哄聲變得更誇張，因為原來被壓破的不是白鴿，而是那男子的手掌，他把自己的右手手掌放進了籠中，場面瞬間變得血肉模糊，純白的布被他的血染得鮮紅。
「喔，原來隻雀係到。」男子在衣服中拔出一隻白鴿，他喜悅並望看人群時，卻發現他們早已因為被這個看似病態的人嚇怕而散去：「唉，最後都係大失敗。」
「呢個人好奇怪....」Marla在Peter耳邊悄悄說話：「我地都係快啲走啦。」
「你地鍾意海旁陣海水味，定係落雨之前嗰陣雨水味？」那男子突然向二人搭話。
「.......海水味？」Peter回了他的話。
「我問過好多人，好多人都答我落雨之嗰陣雨水味。」男子坐在地上，右手依然夾在籠中，鮮血如泉湧：「你係第一個答我海水味。」
「.........」Peter心想，現正在海旁，剛好嗅著便不自覺回答了海水味，被他用一種不懷好意的眼神打量全身，雞皮疙瘩都起來。
「我叫楓。」男子問Peter：「你叫咩名？」
「呃.....」Peter越想Peter不對勁，沒有回答便拉著Marla急步離開。
楓見狀便舉起右手，滿臉笑容的揮著：「拜拜，我地下次再見啦！」鮮血被他甩至四周。