【王道】《我每晚都會發畀阿哥追殺嘅惡夢》: 第十六章————拯救—２（極樂篇）

Hugo在他跳下後回過神來，探頭看一看車外的環境，發現火車駛到了一個湛新的市鎮，高樓大廈四處聳立，但所有建築都是空置的模樣。


「睇嚟要同佢認真一戰。」Hugo腳上的鎖鏈被解開，他也拿起降落傘包，照樣跳下火車。


著地後，Hugo開始探索這個陌生地方，


「鳳火洪流擊！」突然，一道火焰從旁邊的建築噴出，仔細看，建築上攜帶著火槍，火是從那來的。






「嘩！」Hugo用極限動作閃躲火焰，但手部仍是被燙傷小許。


「哈哈哈！你都幾走得幾快架喎！竟然避到鳳火洪流擊！」阿淵從建築後走出來，手中拿著那枝火槍。


「鳳咩火洪流擊.....」Hugo對阿淵都招式名感到耐人尋味。






「呢個係我嘅必殺技之一，順便一提，我大名係史蒂夫·淵！係呢個世界嘅creator！你要好好咁記住，之後我出咗名嗰時你都可以搵我攞簽名！」阿淵叉腰大笑起來。


「史蒂夫·淵.....？點解要改埋呢啲名....好難聽。」Hugo說。


「唉，你真係唔識架喎。流星霸虎抓！」阿淵打了一下響指，地面隨即伸出兩隻機械臂，鉗制住Hugo的活動能力。






「！？」Hugo想掙開機械臂，但反抗並無作用，仍然動彈不得。


「你成個磨碌咁，等我而家幫你改造下個look啦。」

阿淵對Hugo的頭伸出魔爪，

「首先係整理下你個咁核突嘅蛋撻頭！」


阿淵細心的用手指梳理Hugo的頭髮，在不同角度觀察調整，

「嗯！呢個髮型係今年最流行，都幾襯你！」他滿意地點著頭。






不出數秒，Hugo的頭髮就回彈成那個整齊的「蛋撻頭」，就如同之前一樣。


「點解可以自動變返原型架？！」

阿淵嚥下口水，流了一滴冷汗，

「唔通呢個就係你嘅想像力能力？點解可以咁邪惡....」


「冇錯！呢個就係我嘅能力！」

Hugo發出一個陰森的笑容，

「而且掂過我個頭嘅人，會變到有同我一模一樣嘅髮型！你仲有３秒時間！」






「唔，唔好呀！我唔要變到好似你咁柒呀！！」阿淵拼命掩護自己的頭髮。


Hugo趁這段時間發動想像力，把機械臂轉化為脆弱結構，從而掙脫成功，

「你玩完啦！」

他再將機械臂轉化成堅硬物質，對準阿淵的頭用力砸下去！


砰！






阿淵的頭被打碎了，不過並沒有血肉橫飛的埸面，反而是一堆零件灑滿地上。


「機械人...？！」Hugo看著機械阿淵失去動能。


在一座龐大的監獄，裡頭的其中一個監牢，困住了名年輕女孩，監牢外看守的是位中年男性。


二人正是阿蓮和Marla。


牢中種有各式各樣的花類，每一朵都盛開著最美的姿態，花朵的美態，和這個暗啞冰冷的監獄形象有著天淵之别，更可怕的是，這個本應是寸草不生的地方，卻意想不到盛放著花卉，這種諷刺意味更令人心寒。






「你想困我困到幾時？」Marla問。


「你唔需要知，你好似啲花咁，靜靜地就得。」阿蓮用他那低沉的聲線說。


「好似啲花咁？」

Marla打了個顫，不禁想像一下自己成為這個監獄的擺設模樣，

「唔好呀....我唔想做標本..... 」


「幾時講過你要做標本？」

阿蓮從他的腰包中拿出一條巧克力，

「想唔想食嘢？」


「唔使喇....夢入面唔會肚餓....」

Marla對阿蓮的這舉動感到意外，

「係呢，你叫咩名呀？」


「冇名。」阿蓮冷冷回應。


「車.......」


氣氛再次沉靜下來。


「咁你想困到我幾時呀？」Marla抓著監牢的鐵柱。


「..........」阿蓮瞥了一眼Marla，然後繼續沉默不語。


雖然阿蓮一直帶著嚴肅表情一言不發，但從他拿出巧克力的那刻，顯然已引起Marla對他的興趣，Marla開始對這個陌生的大叔不停試探，把本來的緊張不安稍為放下。


「點解呢到明明係監獄，但係又咁多花嘅？」Marla再追問。


「唔知。」


「其實你係咪有自閉症㗎？」


「唔係。」


「.......你同醫生有咩關係？你地好好朋友？」


「冇關係。」


「喔！！！你終於答多過兩隻字！」Marla得意洋洋地說。


「.........」阿蓮雖然擺出滿不在乎的臉，但表情中並看不出任何的惡意。


看見這麼難溝通的人，而且也猜透不到他的心思，令Marla更加渴望知道這位黝黑壯漢的來歷，在心中不斷反覆思索。


就在Marla思索途中，阿蓮驀然站起走出監房，不消一會，他拿著一把閃亮鋒利的大剪刀回到原處。


「........！」Marla心感不妙，以為是用來剪掉她那煩人的嘴巴。


怎料阿蓮是用大剪刀來修剪監獄內的花花草草，看他用心照料花兒的樣子，卻有種覺得他帶著悲傷的錯覺。


「其實其他監牢係咪冇人？呢到靜成咁.....」Marla問。


「畀我殺哂。」阿蓮冷靜回答。


「吓.....點解殺哂....？」


「.......因為佢地整爛哂我啲花。」阿蓮沉默數秒才肯回答。


「你講緊大話....」Marla直截了當的說出來，才發現這句話未經思索就出現，馬上連忙摀住嘴巴。


噹—！

「我冇。」

阿蓮一把大剪刀用力的敲在監牢的鐵柱上，

「如果你好似佢地咁，我都會即刻將你煎皮拆骨！」


轟————！


一聲爆炸巨響，把Gary炸得痛不欲生，在地上翻騰，死去活來。


「皮皮話你已經死咗！」皮皮看他要死不死的，再決絕地補上一句。

受到攻擊直接命中的他，意識逐漸模糊，腦海中思憶起以往許多片斷，

「仆你個街，係夢到死都有走馬燈.....」

他想起第一次和Peter在堂上「射籃」，再一起受罰，和Peter去勸阻Hugo跳樓，和大家一起連夢，經歷各種戰鬥，甚至捉拿犯人......一切一切都盡收眼底。


此時他最深刻的回憶就是，看著朋友被抓，不知何處，生命危在旦夕，但自己已經無力回天。


「終於搞掂呢條麻煩友，你最好呢世都唔會再入翻夢。」

皮皮拍了兩下乾掌，轉身就打算離去，

「而家嗱嗱聲用能力去搞掂埋其餘兩個人，咁就可以快啲同翼望哥會合。」


「咪走住！」皮皮身後傳出喝止她離開的聲音。


「你....你點解好似冇事咁架？」皮皮詫異地看著Gary。


「咦！係喎，點解我會冇事嘅？」Gary驚奇地看著自己的身體。


他發現剛才爆炸所受的傷已經全消，像是沒發生過事情一樣，再看看四周環境，猛然驚覺那道牆，地上的膠水，全數消失不見。


「唔通我可以令對手能力無效化？」Gary為此感到興奮無比。


「冇可能架！！皮皮話你畀雷劈死！」能力初次失效，皮皮內心極度不安。


晴空萬里之下竟冒出一道雷電擊在Gary身上，但不出數十秒，他就安然無恙的再次站起來。


「可惡！」

「皮皮話你畀針拮死！」

「皮皮話你腦缺氧死！」

「皮皮話你畀火燒死！」

皮皮額上青筋暴現，不斷用能力攻擊Gary，但每一次他都像是重生般繼續走近皮皮。

「你唔好埋嚟呀！！皮皮話你下體爆炸！！」


「講還講，唔好咁毒講下面得唔得呀？」


碰—！

Gary一拳揮在皮皮的臉上，皮皮一下子失去平衡，向後摔倒，掩著被打傷的臉部。


「認真啲睇，其實你都幾man，呢種不屈堅毅嘅精神，仲有型過翼望哥。」皮皮把剛才的暴燥態度全數收下，擺出可憐，含羞答答的表情。


「....係，係咩？其實我都覺得自己幾有型....」Gary馬上就自滿起來，但話音未落，就被人用小刀從後襲擊背部。


Gary伸手一摸背後，驚覺全手都是鮮紅色的血液，馬上逃開。


原來那些居民仍未放棄對他的追殺，皮皮是故意吸引注意力，令偷襲成功。


「哈，今次你仲唔死，佢地一人一啖口水都浸死你啦！」皮皮揚揚自得地說。


「屌，點解你咁蠢架，其實你係咁講我已經死咗咪得囉，可以直接屈我機，你仲要諗咁多唔同死法出嚟，你話你係咪犯賤呀？」Gary說罷，腦中整合所有資料，頓時恍然大悟。


「你條死仆街，你地同我快啲殺死佢！！皮皮話你已經死了！」被一個比自己愚蠢的人說蠢，令皮皮腦羞成怒。


「我知你呢句嘢已經冇效，因為你有唔可以重覆方法嘅限制！而且所有皮皮話之後５隻字都係幻覺！原因係無論牆，爆炸，甚至雷電都冇波及到其他居民，對環境都冇任何破壞！」Gary把他推理到的都說出來。


「你唔係而家先諗到呀嘛.....？我咁樣用能力法，正常人應該一早知啦，你唔會以為自己好聰明？」皮皮應該無法計算得到Gary的智力高低。


「但我有嘅唔係智慧，而係可以將你完全克制嘅自我重新啟動，每一次受完你幻覺折磨我都可以回復原本嘅精神狀態，連肉體傷害都可以。」說罷，Gary背上的刀傷就回復原貌。


「........！」皮皮無法回應半句。


「將軍了。」Gary說。