[穿越] 執房嗰時搵返部Sony Ericsson推蓋手機: 125. ［大結局］

「你又同男仔單獨食飯。」

「咩又啊，講到我成日都係咁，阿寶咋嘛！」

「阿寶唔係男仔？」

「咁佢又唔會鍾意我，你咁都要呷醋？」

「咁你都可以揾多個人。」





「無啦啦邊到揾多個人啫，我哋不嬲都係咁㗎啦！」

「所以我咪唔想。」

「你係咪唔信我？」

「我信你，但我唔想囉！」

「咩道理？我唔明囉。」





「我緊張你先呷醋啫，我想你身邊永遠只有我一個男仔，阿寶唔得，其他人都唔得！」

我無言以對，因為知道他只是太愛我。

卓行是個愛呷醋的男生，這也是拍拖後才發現的事。我們身處在不同的大學，總有自己的圈子；出來工作後在不同的公司，亦自然認識到新同事。朋友不是男就是女，而他總是很介意我跟身邊的男性接觸，即使是我們的共同朋友，例如阿寶，小如吃一頓飯，他也會鬧脾氣。後來我們磨合過，也知道彼此的底線，才沒有因為社交問題而吵架。

「我知啊，我知你好緊張我，但你都知我無同其他男仔私下有接觸，係咪？阿寶喺我公司附近返工，我哋又識咗咁耐，得閒食餐飯真係唔得咩？」

「唉，我知，其實我真係知。我無心要因為呢啲小事同你嘈。」





「係咪做嘢有咩辛苦，唔開心啊？」

他緊緊抱住我，也不說話，我就知道我說中了。

「跟開個project出咗啲問題，琴日又開ot，有啲心煩，真係好想收工見到你。點知你約咗阿寶，突然就無名火起，其實我唔係真係介意你同阿寶食飯。」他在我耳邊把事情和盤托出，怪不得他這樣反常。

「原來係咁，傻佬，同我講嘛，我就唔同阿寶食飯，飛奔過嚟攬住你！」

「咁你係一早約咗佢嘅，你都有我講你琴晚唔得閒...」

「你係最重要㗎嘛！而且阿寶會明喇，老朋友嘛，都係得閒約下，又唔係有咩大事，佢都成日甩我底啦！」

「咁又係，佢都甩過我底，哈哈！」

「嗱，笑返唔嬲㗎喇？」





「點嬲得你落啊，我女朋友咁好。」他輕輕親我的額，又再次把我抱住。

「咁你公司啲嘢，解唔解決到啊？」我回抱他，捨不得放開。

「ok嘅，要做多啲功夫，不過搞得掂。」

「我男朋友咁叻，無嘢難到你啦。」

「賣口乖。」他牽着我，帶我往巴士站的方向走。

「嘿嘿。咁我哋而家交又鬧完喇，仲有半日，去邊好呢？」

「我一早諗好㗎喇，一陣再話你知。」





「少可喎，竟然諗好有咩節目，明明本來仲嬲緊我。」

「小事啫，邊會真係嬲，我哋嘅情趣嚟㗎嘛，哈哈。」

「傻佬嚟你真係。」

我們上了巴士，他卻始終不肯說出目的地是哪裡。

「去黃金海岸？」差不多五時，我以為他想看日落。

「新地方，仲靚。」他得意洋洋，好像有甚麼了不起。

就這樣，我們一直坐到終點站——大欖。

「吓？呢到有咩睇？我都係第一次坐到總站。」





「跟我行咪知。」

下車後，我們沿着馬路旁的小路直走，穿過一條短短的隧道，一轉彎就是轉車站的下層。

「原來行前少少就係轉車站！」

「係啊，再行出去，就係睇日落嘅最佳位置。」他帶着我走過車站，向海的方向走，已經看到有些人在橋下的大石坐下來釣魚。穿過橋底，可以看見沿海有一條路，有不少人在跑步或停下來看海。

「我而家先知可以喺轉車站行出去咁近海嘅地方！好靚啊！」

海風迎面吹來，海水有節奏地流動，偶爾有船隻經過，卻依然平靜，恰巧今天萬里無雲，感覺特別放鬆。

「我就知你一定會鍾意。」





「嗯！日落真係睇極都唔厭，特別係同你一齊。」我挽着他的手，靠在他肩上。

「咁你知唔知今日咩日子？」

「今日？11月3，無咩特別吖？」

「哈哈，今日係我哋相識嘅日子。」

「相識？你講...中一？」

「正確啲嚟講，係我哋成為鄰座嘅第一日，我哋緣份嘅開始。」

「嘩...我真係估唔到，你竟然會記得！自愧不如...」

「你不嬲記性差㗎啦，不過唔緊要，因為有我提你。」

「咁以後靠你喇，哈哈！」

「嗯，比我一生一世，喺身邊提你好無？」

不知甚麼時候，他手上拿着一隻戒指，遞到我面前，陽光照在鑽石上，份外閃耀。

我摸摸眼角，淚水竟悄悄落下。

「你...」

「我想照顧你一世，雖然我有時好細路仔，有時會鬧脾氣，甚至我哋啱啱先鬧完交，但係我真係好愛你，我好想每朝起身張開眼就見到你，可以攬住你，錫你一啖，每一日都係咁。今日係我哋相識嘅日子，好慶幸喺十五年前，我可以坐喺你隔離，認識到穿越咗嘅你，呢件係我人生中最幸運嘅事。莊芯言，我等唔到喇，嫁比我好無？」

我早已說不出話來，只是伸出左手，讓幸福把我牢牢套住。

「講句我願意比我聽下得唔得呢？我等咗好耐喇。」

他從後抱着我，我回過頭，給他深情一吻，這是我能給他的最佳回應。

夕陽餘暉染紅天空，是讓人心動的粉色，也不及我眼前這個始終讓我心動的男人。



「我願意。」