[穿越] 執房嗰時搵返部Sony Ericsson推蓋手機: 118.

雞煲店內是長枱，我們分兩排對着坐，卓行正好坐在我的對面。下單點菜後，我們開始聊着陳年往事，就像大多數的中同聚會一樣。我想要集中精神，內心卻想着卓行那個已經分手了的「女朋友」，難道是Paula嗎？

「芯言唔出聲嘅？近排點啊你？」琪姐坐在我旁邊，經他一問眾人的焦點都放在我身上。

「無啊，都係咁啦...」

「拍拖未啊？好快就A0 grad㗎喇喎！」Jacky是班中最八卦的一個，特別是對於大家的感情事都十分關心。

「係囉，我記得芯言中學都有啲師兄追下㗎喎，點解無咗下文嘅？」Tony跟Jacky雙劍合璧，都是看好戲食花生的人。





「無啦，無遇到啱咪無拍。」我隨便回答打發他們，只見阿寶和殷殷看着我，眼神中閃過一絲疑惑，然後替我解圍。

「我哋芯言咁正，遲早都出pool啦，洗你哋擔心？」

「就算A0 grad又點啫，呢到都係得殷殷同卓行拍過咋嘛，相煎何太急呢？」

「Sorry我仲拍緊～」殷殷向阿寶展示勝利的笑容，阿寶則反了一個大大的白眼。

「知你食到師兄威喇，無人想知ok？」阿寶不甘示弱，又是一輪打打鬧鬧的場面。





卓行一直都沒有搭話，一副心不在焉的樣子。也許是注意到我正看着他，他就起來說要出去拿飲料。

「我都拎，一齊啦。」我立刻跟着他，我們站在放飲品的冰箱前，顯然都不是想着要喝甚麼。

「咁靜嘅你？唔想佢哋提起你拍過拖？」我率先打破沉默。

他似乎有點嚇着了，猶豫了一下，就打開冰箱，拿起一罐忌廉溝鮮奶。

「你要唔要？」他把飲料遞給我，自己再多拿一罐。





「唔該...」我知道他大概不想回答我的問題，我正打算轉身離去，他卻捉住我的手臂。

「一陣再講好無？」

「吓？喔...」聽到我的回覆後，他就越過我走回位子，我也默默跟着他。

一整晚他們再也沒有提過感情事，反而聊着畢業後要一起去旅行，眾人都興致勃勃的樣子。

「去台灣啦，近近哋，去掃街正啊。」
「緊係去遠啲啦，grad trip喎，一於去歐洲！」
「歐洲咁貴，又要去得耐，好難夾時間㗎。」
「有心去實夾到嘅！」
「係就早啲買機票平啲啊。」
「大家夾咗日子先啦！」





大家你一言我一語，似乎已經決定好，雖然實際上是否可以成團，又是另一回事了。氣氛使然，感覺卓行心情變好了，也積極地參與討論。說實話，如果可以跟卓行一起去旅行，也是值得期待的事。

關於旅行的事我們沒有定論，雞煲就早已被我們吃光了。本來還說要去吃甜品，但Tony和Jacky說很飽要先回家，很快就離開了，剩下我、卓行、殷殷、阿寶和琪姐，我們只是交換一個眼神，就自動往麥當勞的方向走去。

「我哋好似好耐無試過咁樣喺m記傾計喇。」琪姐好像很感觸的樣子，的確升上大學後，跟中學同學聚會的時間只會越來越少，能維持朋友關係就已經很難得了。

「以前我哋食完糖水都仲要去m記玩陣先走㗎！」阿寶和應，自然地聊着彼此的共同回憶。

「唉，好懷念啊，點算？」殷殷嘆一口氣，其實大家的心中都有一樣的想法，不經不覺就來到大家生涯最後一年，大家都無法想像畢業後的事。特別是我自己，從大學回去中學又回來大學，明明是昨天的事，教人難以適應。

「咪咁啦，而家都好好吖，唔係咩？」卓行少有地提出意見，他看着我說，反倒讓我有些不解。

「都係嘅，幾好吖。」我跟着回應一下，免得大家傷春悲秋的樣子。然後，阿寶就說要買雪糕吃，叫卓行陪他。

「嗱，剩低我哋三個女仔，芯言你有咩唔怕講喎。」




「係囉，你近排點啊？」

「咩啊？我唔明你哋問咩喎。」我實在是大惑不解，不知道他們無原無故在說甚麼。

「無對象咩？」殷殷直接地問，原來她在說這件事。

「緣份到了自然有對象啦，哈哈。」

「真係唔明你，好幾次都可以出pool，最後竟然咩都無，得個吉。」

「咩啊？你又講咩啊？」我不禁失笑，怎麼他們比我還要着急。

「中學個師兄係咁，卓行係咁，你話你喇，問題出喺邊？」殷殷語重心長的說，我搖搖頭，表示不知道。

大概都是時機的問題啊。





就在這時，卓行他們回來了，我們又回復原狀，沒有再談及。

這也是時機。