[穿越] 執房嗰時搵返部Sony Ericsson推蓋手機: 111.

我狠不得立刻回學校翻牆進內。

「你放咗喺我locker到？」

「唉，你真係好遲鈍。」

「我都覺得奇怪，你做咩咁囉唆日日叫我執locker...我點知喎！」

「叫得你執緊係有原因啦，傻仔。」





「好啦好啦，我星期一等學校開門返去執locker。」

「係先好講啊你，哈哈。」

「我應承你，一定會！」

辦得到的叫承諾，辦不到的只是謊言。

我不是一個會撒謊的人，在人生為數不多的謊言之中，最無奈的大概就是對他撒的謊，那麼不情不願。





「咁乖，請你食多幾條薯條啦。」他把餐盤推到我面前，好像只有我一直在吃。

「喂啊你唔食嘅！想肥死我咩！」

「你鍾意食嘛，食多啲啦。」

「唔制啊，你快啲食，食咁多我喉嚨痛添啊。」

他想了一想，他的手終於動起來，機械式地吃着薯條。我輕輕一笑，他向我吐吐舌，繼續吃。





最後，麥當勞裡只剩下我們。

他問我未來的他是怎樣的，我說都是老樣子啊；他問我未來的我們是怎樣的，我說都是老樣子啊；他問我未來的我是怎樣的，我說當然變美了。

「一聽就知道你敷衍緊我啦，老吹。」

「咩啊，咁我真係靚咗，你真係都係咁嘅樣喎。」

「所以咪話你吹水囉，有咩可能你會變靚。」

「咁本來就好靚都唔代表無再靚啲嘅空間嘅～」

聽罷他瞪大雙眼看着我，靜默幾秒，又相視而笑。

「唯一可以肯定嘅係你自大咗好多，哈哈。」





歡笑過後，他還是認真地問起我將來的事。

會很好奇吧？自他知道我是穿越而來後，我們再沒有認真談及這個話題，也許是太沉重了。麥當勞裡只剩下空桌，播放着陳奕迅的某一首歌，營造了一個能讓我們好好對話的環境。

「所以，將來嘅我係點，我哋仲有冇聯絡啊？」

「你啊，喺大學好受歡迎㗎。」

「咁我咪媾死女？哈哈。」

「你就想，你有女朋友㗎。」

「真係㗎？邊個嚟？」





「唔話你知。」

「你唔講我遲啲都會識到，哈哈。」

「喂啊！」我知道他在開玩笑，卻還是禁不住有一點生氣。

「講笑啫，你所知道嘅將來應該唔會再發生啦？」

「唔知㗎，我又未返去，點知有幾多嘢改變咗。」

「咁我同嗰個女朋友，係咪拍咗好耐拖？你同資逸拍先定我哋拍先？」

被他一問，突然不知從何說起。如果他知道那個人就是Paula，會很驚訝嗎？我陷入沉思，直到他再叫我一聲，我才回過神來。

「啫係點？諗咁耐。」





「都...差...差唔多啦...」

「hang晒機咁喎，算啦，唔問你喇。不過我硬係覺得，我而家已經識呢個人。」

「...你當自己神探咩？將來要自己經歷㗎嘛，我講晒出嚟就無驚喜啦，對於你嚟講，變成點都會係未知。不過如果你問我有咩歌好聽，我就唔介意唱比你聽住先嘅，哈哈。」

「好有道理喎，好啦，我即管期待一下，希望我嘅將來仍然有你。」

「講呢啲...」

他壞壞一笑。

「正所謂朋友，我當你一世朋友～～」





我白他一眼。

「咁你就唱一首將來嘅歌比我聽啦。」他再幽幽的說。

好像回到最初，巴士上，為他唱一首歌，是一封寄給他未來的信。

「中一嗰年我哋有櫻花樹下，十年後會有一首續集。

你想唔想聽？」