[穿越] 執房嗰時搵返部Sony Ericsson推蓋手機: 109.

「芯言。」

「做咩？」我看着他，他卻沒有望向我，只是注視着眼前大大小小的石頭，海水湧至微微拍打它們。入夜後，只剩下風聲和海浪聲在迴盪。

還有心臟正在跳動着的聲音，我活在這個時代的證明。

「你差我一個願望。」

「咩願望？」





「唔好扮唔記得喎。」

「又話要我欠你一世？哈哈！」

「係啊，呢個時空入面，我哋呢一世。」

聽到他這麼說，有點心酸的感覺。人總不能預知自己的生死，一輩子可以很長久，安然無恙渡過一生漸漸老去；一輩子也可以很短暫，還未來得及開眼觀看世界便在沉默中離去。因為未知才值得期待，一旦加上了期限，生命只是在倒數着，所謂盼望都設定了界線，就像一個被告知快將死亡的病人，就像我們一樣。

除非，有奇蹟出現，成了唯一的希望。





「咁你嘅願望係咩？」我裝作輕鬆，試圖緩和沉重的氣氛，我發現我們都不適合認真說話，認真得讓人窒息。

「我嘅願望係，你嘅願望唔會實現。」

「吓？」

「你期望我會同你講嘅嘢，我今日都唔會講。」

我一時間反應不來，愣住了，似懂非懂。





「你覺得做人應該活在當下，定展望未來？」他繼續說話，我卻還是說不出一隻字，所有疑問和情感哽在喉嚨。

「我諗咗好耐，真係好耐好耐。因為我唔清楚將來係點，我只可以揀而家。我唔同你，你有機會重新選擇你嘅人生，但我只係活呢一次。我唔介意等你，然後人生去到某一個位我又會再次遇到你，但我點保證，未來幾年會好似劇本咁有得跟住走？或者另一個資逸都係會出現，我哋始終都走唔到落去。」

「我會諗，你一直都喺到就好喇。六、七年嘅時間話長唔長話短唔短，但要你重新經歷過，我會唔會好自私呢？如果有得揀，我真係好想搏一次，搏一個你可以留喺到嘅機會，至少現在呢一刻都係實實在在。不過說穿了，穿越與否都唔係必然，根本唔係一個選擇，只係聽天由命。所以，我可以做啲咩？到頭嚟我只係一個垂死掙扎嘅人，我唔開口，你係咪可以唔走？如果我始終留唔住你，我係咪等得到你？」

「我唔知我哋之間嘅結局係點，但我真係唔想錯過過程。特別喺我諗到我哋分享唔到共同回憶嘅時候，成個感覺好唔真實。我都會怕去到最後忍唔住放棄嘅人，會係我。」

「你講得好啱，我哋嘅相遇係意外。太早遇到最好嘅你，我唔知應該覺得慶幸定係不幸。」

「慶幸我比其他人更早發現你嘅好，慶幸可以同你一齊返學放學，慶幸可以為咗你去比賽拎牌，慶幸可以一齊過聖誕，慶幸你再一次返嚟我身邊，慶幸可以陪你過生日，其實我應該慶幸，唯一嘅不幸，只係你會離開呢個事實。」

「但我無後悔，愛上你，會係我呢一世最正確嘅決定。」

淚水滑落，比浪花還要洶湧。





「呢個唔係表白，我只係對住大海自言自語。我嘅願望，希望大海聽到，會幫我實現。」

他始終沒有看我一眼。

「嗯...我諗大海會聽到。」

也許是海浪淹沒了我的哭泣聲，卓行再沒有說話，只是搭在我肩上的手在顫抖着，捉得更緊，緊得讓人生痛，卻又痛不過心臟撕裂的痛。

14400秒。