[穿越] 執房嗰時搵返部Sony Ericsson推蓋手機: 79.

「咁鬼耐㗎你。」

「女廁多人排嘛，卓行呢？」

「佢出咗去排隊買嘢食啊，你出去搵佢一次過叫啦。」

下午茶時段特別多人，卓行排在中間位置，低頭看着手機，拇指快速滑動螢幕，大概是在看Facebook吧。

「喂。」





「嘩終於返嚟喇，食咩啊，幫你買埋。」

「唔緊啦，陪你排囉。」

「你坐吓啦，費是後面啲人以為你打尖。」

「喔，咁好啦。我要雞翼餐，配西多，熱好立克。依家比埋錢你？」

「返去先計啦。」





過了大概十分鐘，卓行才緩緩走過來，手上捧着我的雞翼餐。

「唔該晒啊！」

「得啦～喂謙少同我出去拎埋兩個餐。」

「你淨係幫芯言拎又唔幫埋我。」

「我一對手點拎三個餐，咁多聲氣，行啦。」





「唉，麻煩。」

謙少不情不願的跟他出去，還不忘向我投以不屑的目光，我擺出勝利手勢，誰叫他不是女生呢。卓行是對所有人都好，活活是個大暖男，但他對女生更是照顧，這大概是男生的天性吧。雖然後來我才發現，任他對誰好，對我還是最好，好到我不自覺地對他有很多期望，好到有種錯覺以為他是我的男朋友。

「姚卓行真係好偏心，太過份喇。」

謙少還在碎碎念，卓行用眼神告訴他「食你就食啦，咁多嘢講」，他才肯安靜進食。他們這種相處模式就是很典型的男生之間，互相虧對方，偶爾打一場小架，卻又在有需要時聆聽對方。我想謙少跟琪姐的事，也只有卓行知道。

「佢偏心你你都驚啦，哈哈。」

「咁又係，男人老狗，好鬼gay。所以你言下之意，覺得自己係女人？」

「痴線，唔通我係男人啊？」

「我當你男人嚟㗎咋。」





「你食屎啦你，我當你姊妹就真。」

「鬼做你姊妹，收啦你。」

卓行看着我們拌嘴，只是輕輕一笑，一副置身事外的模樣，絲毫沒察覺我們是因為他而吵鬧着。

「喂你個死肥仔出句聲啦，你係咪當佢男人嚟先？」

「係，點睇佢都係男人。」

卓行偷笑着，一雙彎彎的笑眼已經透露出他的快樂，完全是幸災樂禍。

「你兩個都食屎啦好無，煩耶！」





青春期的男生總愛跟女生稱兄道弟，取笑你是男人婆，言語要多狠毒有多狠毒，但背後滿滿都是另類的情感，口裡說是朋友身體卻很誠實的想跟你拉近關係，也許這是當事人都無法定義的感覺。這種關係幸運的話能適時轉化成情侶，典型的歡喜冤家，不然就像謙少跟琪姐，注定錯過。

我對他們翻白眼，謙少樂得很，卓行則一貫作風保持微笑。在我把西多切開的一剎，一隻大手輕揉我的頭，當我抬頭時他們都在專心進食，彷彿那觸碰只是我的錯覺。

電話螢幕亮起，傳來通知。

來自資逸：1個新訊息