[穿越] 執房嗰時搵返部Sony Ericsson推蓋手機: 77.

我拿出練習和單行紙，準備投入數字世界，腹部的不適卻讓我無法集中精神，我微微彎腰，用左手輕按着，企圖把痛楚壓下去，右手則繼續拿着筆裝作專心。

謙少帶着耳筒聽歌，還不時偷看電話，手中的鉛芯筆被他轉個不停，根本沒打算好好溫習吧，當然也絲毫沒有發現我的異樣；卓行同樣地專注於練習題上，他抿嘴思考，手上的筆飛快地寫出解題，然後翻開下一頁，視線從沒離開過。

「唔識做啊？」

「吓？」

他緩緩抬起頭，投以疑惑的眼神。





「你望住我做咩？」

「我...我無望住你啊。」

「係咩？我好似feel到有人望住我。」

「咪咁自戀啦你。」

他輕輕一笑。我說謊了，我看他看得出神了，但我當然不會承認。





「咁你有無唔識啊？」

「errr...暫時無嘅，今日有啲唔集中姐。」

「抖吓啦一係，兩半喇，我哋都未食嘢，食完嘢再溫。」

「都好，食咩啊咁？」

「落地下間大家樂食個茶餐？」





「好，咁執嘢啦。」

我在收拾筆袋的時候，卓行連我的課本也收好了，放到自己的大背包裡。

「你做咩...」

「你哋做咩執晒嘢啊？」

謙少打斷我的話，除下耳筒，一臉不解的看着我們。

「去食嘢喇，原來你一直聽唔到我哋講嘢。」

「我塞咗耳筒嘛，咁快食？溫咗陣咋喎。」

「芯言遲你成粒鐘嚟都做得多過你啦，你掛住望電話咋嘛。」





「咪係，等人覆短訊啊？」

「痴線，邊有等咩人覆。」

「突然醒起呢，嗰日聖誕節琪姐又係心不在焉咁，你哋知唔知...」

「姚卓行！你同佢講咗？咪話咗唔比得人知嘛！」

「等等先，咩唔比得人知，有咩好快啲從實招來！做咩聽到琪姐個名就咁大反應？」

聽到我的話，謙少瞬間呆掉，只見卓行聳聳肩，一臉尷尬。

「你自己太敏感自爆咋，我咩都無同芯言講過。」





果然不出我所料，琪姐和謙少之間的確發生了甚麼。

「唉，今次真係柒咗。」