[穿越] 執房嗰時搵返部Sony Ericsson推蓋手機: 31.

才剛踏入課室，已經看見清清他們圍着我和卓行的位置，好像在討論甚麼。

「嘩，你爬上黎㗎？頭先肥仔話樓下見到你，咁鬼耐㗎。」

「佢之前整親嘛，所以我都費時等佢，自己上黎先。」

「你地一朝早傾緊咩啊？」

「講緊陸運會啊，下星期五就係喇！」





清清顯得相當興奮，她說以前小學都沒有辦陸運會，這算是人生第一次的陸運會。她加入了啦啦隊，本來我跟她一起報名的，幸好腳傷來得及時，我便推了這份吃力不討好的活。年少無知總會被學姐欺騙，啦啦隊的確很有趣，但在我的人生中試一次便足矣，我不想再失聲一星期，四肢累得不屬於自己一樣。

順帶一提，我們學校有四社，分別是紅、黃、藍、綠社。我跟清清允健都是紅社，卓行和謙少是黃社，琪姐則是綠社。

「你地三個女仔應該無報咩項目㗎啦？我同肥仔就報左三樣！」

「我報左400米同800米。」

「琪姐，睇你唔出喎。」





「咁你地報咩咁勁啊？」

「擲鐵餅，推鉛球同100米。」

「車，我地班個個男仔都報呢啲㗎啦，夠hea嘛。」

「你唔好睇小肥仔驚人嘅臂力啊！我睇好佢拎牌㗎！」

腦海中閃過卓行替我揹書包的畫面，看起來的確毫不費力，反而跑步才會考起他吧！





「咁卓行又真係幾大力嘅...」

「其實我想問好耐㗎喇，點解你近來都叫佢卓行嘅？」

謙少一問，他們都把焦點放在我身上。

「咁...你地成日嗌佢肥仔佢唔會減到肥㗎嘛。」

「關咩事，佢又無話要減肥！」

眾人向我投射刺熱的目光，一時之間我也想不出怎樣解釋。

「唔係啊，我要減啊。」

卓行一臉認真的說道，剎那間我卻看到他在偷笑。





「下？無啦啦減咩肥？」

「減定差唔多㗎喇，遲下都要溝女㗎嘛。」

五個人翻了大大的白眼。