「短篇」「小小傻瓜，大大幸福」: Final.
A君：「哎喲個BB真係好得意呀！眼仔大大好靚女！」
B女：「係啊係啊似足媽咪！大個左之後一定係個大美人！」
C人：「你地快d睇下BB眨眼仔呀好得意！」
呢三個人我唔識的，但我又不得不招呼應酬佢地，因為佢地係客人。
最麻煩既係佢地唔係生意上既客人，如果佢地係生意上既客人我都仲可以卸個膊比其他同事，自己走去搵地方訓覺。
咁佢地到底係咩客人？咪係百日宴既客人囉。
頭先佢地講個個好得意既BB呢，就係我既寶貝女Nicole喇。
佢地咁讚我個女我係好開心，但要應付佢地又真係好麻煩…佢地好似係Cherry既同事，要留個好印象比佢地先得…
歸根到底，都係因為一餐飯先造成而家呢個局面。
個時我同Cherry徵求四位長輩意見，問佢地認為我地應唔應該為Nicole擺滿月或者百日宴。
飯局入面Cherry父母，甚至連我阿媽都話無乜所謂，話呢d已經係我地呢d新一代父母自己既事，應該自己決定之類。
唯獨我個老豆話應該要搞，但問佢想點幫個孫女搞佢又話無意見，叫我地自己諗掂佢。
「搞個大家都可以開開心心一齊share你地喜悅既party就可以。」
對於個百日宴，佢只係講左呢句說話，你話難唔難搞。
但佢話得要搞，我地呢d後輩唯有遵循啦，滿月就趕唔切架啦，所以我地就只好籌備百日宴。
我地兩公婆依照佢俾既方針去入手，最後得出既結論就係「唔好太正式既百日宴」。
輕輕鬆鬆鄧梓峰咁搞個party等大家見下Nicole，傾下計就算啦。
最後，就變成一個好隨意既Party，好似而家咁。
我地甚至無book咩酒樓酒席宴會廳之類比較正式既場地，只係問美星借其中一間café用一日。
佢咁錫佢弟婦同佢姪女，一聽到Cherry提出請求就二話不說馬上應承，仲即刻幫手上淘寶買野佈置。
如果換轉係我問，條友肯定唔會應承。
不過多得佢幫手，真係煩少好多野。
返到黎而家，大家係個party都好enjoy，圍繞住今日既主角Nicole而轉。
亦因為場地大小有限，所以所邀賓客我地亦精挑細選過，全部都係我地既熟人，唔會咩三姨婆六姑姐都叫埋黎。
廢事大家尷尬吖嘛，同埋我地真係想黎既係熟同識既朋友同事。
一方面有人讚BB好靚女好似媽咪，一方面又有人話媽咪好叻，生完之後就可以咁快修到身，直頭好似無生過一樣咁fit。
但就無人會讚下我既，真好。
我既任務呢，就係係佢身邊抱住Nicole陪佢去見人，陪下笑，十足十陪酒咁。
不過好得意既係，我地明明都話左唔洗俾禮金，但所有人黎都交低一封又一封紅色利是封比我。
呢d心意我又唔好意思推遲，結果就搞到自己個衫袋脹卜卜。
嘩，今次發達囉真係，阿女我同你開多幾個百日宴呀遲d。
話時話…我老豆呢？我記得佢係同我媽一齊黎架…
我：「喂老婆…我想…」
「魯路修！」
我說話講到三分一都無，門口就傳黎一把響亮如鐘既聲音。
我連望都唔洗望都已經知道把聲既主人係邊個，但我身體都係不由身主望左過去。
不過呢，今次既結果大出我所料。
我以為見到既會係晨哥一個，最多咪連埋阿欣兩個人，結果佢居然帶左一班人黎。
呢班人有d我甚至無邀請，但事實上的確每一個人我都係識。
中學時期圍繞住我地既人佢都帶左黎了。
晨：「唷，我地黎左喇。
」啊…同婚禮個陣好似呢…
Cherry：「傻佬，俾Nicole我抱啦，你過去搵佢地啦。」
我又真係照佢說話去做，將Nicole交到佢懷中，自己傻傻咁走去晨哥個邊。
除左晨哥，師父呢D熟到不得了既臉孔之外，其他人都係以前熟悉既朋友。
如果我係比人綁黎呢度呢，我第一時間肯定會以為呢度係舊生聚會。
不過呢，終於有人係黎搵我架啦，內心總算平衡返少少。
有d就恭喜我，有d就恭喜我之後屌柒我做乜唔請佢地黎，係咪唔當佢地係朋友之類。
一一拆招之後終於都安撫好大家既情緒，Cherry亦抱左Nicole過黎，大家就蜂擁而上去睇BB。
而個幾位一早睇過Nicole既老朋友例如阿欣，若睛仲有子琪就無太大反應，繼續同我吹水。
但都係有例外既，咪晨哥囉，佢只係望左Nicole一眼之後。就繼續同我地傾計。
晨哥：「唔好意思呀上次公司有事無去到探你地，嗱呢份係補償既禮物，比你地一家三口既。
」佢同以前一樣，唔知係邊度拎左一大盒包哂花紙既禮物出黎比我。
啊啊，佢真係有準備禮物…
我：「雖然真係唔係咩要講唔好意思既事，但既然你咁盛意拳拳，我就心懷感激咁收左佢啦。
」講完我就雙手接過佢準備既禮物，嘩都幾重手喎衰鬼。
會唔會係金條呢？哈哈哈哈講笑啫我又唔係真係咁貪心既。
晨：「喂拆開黎睇下啦，睇下鐘唔鐘意都好吖。
」我：「咁唔係幾好既，好似好無禮貌咁，等我同Cherry返去先拆啦。」
晨：「哈哈，真係有你既風格，點都好啦希望你地會鐘意，我都揀左好耐下…嗯？
」晨哥講講下忽然比阿欣批肘頂左一下，晨哥即刻望左過去，仲表示不解地側左一下頭。
只見阿欣同佢不斷打眼色，過左一陣晨哥好似終於明白阿欣咩意思，拍左一下手，轉返身望住我，仲係外套入面拎左兩個利是封出黎。
晨哥：「呀係差D唔記得左，呢度小小心意，恭喜你地生左個咁可愛既女呀魯路修。
」哦…原來佢地打哂眼色就係因為d禮金…傻啦邊洗咁緊張…
不過話時話，點解會有兩封？晨哥同阿欣分開比咁得意？
我拎住兩封利是，思量緊到底發生咩事。
唔…唔通佢地兩個冷戰緊？但..就咁睇唔似喎…
定係因為佢地兩個未結婚所以要分開封？呢d傳統習俗野我真係唔係好識。
見到我為左兩個利是封猶豫煩惱既晨哥善意地走埋黎，同我解釋點解佢會俾兩封禮金。
晨哥：「嗱，呢一封呢係我同阿欣比你既，而呢一封就係阿明佢地比你既。」
阿明？邊個阿明，我無乜印象喎…
晨：「條友個日坐的士落車，咁啱撞正你慌慌張張，咩都唔理衝左上的士，問返我之後先知原來係因為你個女出世，所以佢知道我會黎個陣就托我帶份禮金黎啦。」
啊…原來個日偶到個pair男女真係識我既…唉呀諗返起個日既自己真係好無禮貌。
只不過…
我：「呃…我係好感激佢咁有心…但係我識呢位阿明架？我好似無印象…」
晨：「啊啊，你無印象都係正常既，話哂你地兩個好少有直接面對面交流，不過我可以肯定你地一定係朋友，信我。」
我：「好，咁你幫我多謝佢啦下，人唔到禮都到佢真係有心。」
晨：「嘛，話哂你都幫過佢幾次，呢d小事佢梗係要做啦。」
幫過佢？仲要幾次？嘩慘啦咁重要既事我都會無印象？睇黎我真係有d老人痴呆。
點都好，由心多謝呢位「阿明」啦，多謝佢咁有心。
袋好封利是，放置好晨哥俾既禮物之後我繼續同佢地傾計。
注意力唔再係Nicole身上，而係返翻黎我同Cherry身上。
我地似乎係同級入面最早結婚，最快生小朋友，生活似係大家入面最為完整咁。
但我並無因為咁而自滿，我反而好感激同珍惜自己而家有既生活。
可以話係我眼前呢班人鑄就左我而家既生活，無佢地，或者唔會有而家既我。
Cherry就一定架啦，佢既出現改變左我呢個毒撚既一生，佢步步引領我，令我可以走出自己既框框，做一d我從來無諗過自己可以成功既事。
仲有就梗係晨哥，呢位「神」雖然行事獨特，性格古怪，但佢的確係好多時候都給予我充分既支持同幫助。
或者無佢既話，我都無可能咁順利同Cherry一齊。
其他人都有俾我大大少少既幫助，要細數既話可能要講兩日先數完。
總言之，多謝大家喇。
Cherry：「喂lulu…」
我：「嗯咩事呀？」
佢抱住Nicole走埋黎，細細聲同我咬耳仔，我仲以為係Nicole要換片食奶，點知又唔係喎。
Cherry：「家姐同奶奶佢地好似搵左老爺好耐都搵唔到…」
啊係wor，我頭先都注意到呢件事，不過係被晨哥佢地分散左注意力，一時間無左回事。
我：「我諗我應該知道佢係邊，等我去搵啦，你唔洗咁擔心。」
講完我就離開左café，黎到上一層既後樓梯。
係呢度，果然比我搵到佢，佢仲拎住支電子煙。
習慣呢家野真係唔會咁易改變，細細個個陣佢有野想自己一個諗就會走上一層既後樓梯。
爸：「哦？比你搵到我添哈哈。」
我：「孫女百日宴咁開心既日子你有乜野要自己一個匿埋諗呀老豆？」
爸：「無，只係希望你阿嫲都可以黎到呢度啫，佢見到咁既場面一定會好開心。」
喂喂喂，唔好用d容易令人誤會既講法好唔好呀，阿嫲未死架只係唔方便走動咋。
我亦知道阿嫲身體唔好，所以一直都有keep住send Nicole既相比佢，氹下佢開心。
不過睇黎係老豆眼中咁做都係唔夠呢。
我：「呢幾日約個時間去睇下阿嫲啦，Nicole出世咁耐都無帶佢見下太嫲係差咁d既。」
爸：「啊你鐘意啦，呢d野無乜所謂既，你阿嫲都無講乜。」
講係咁講啫，孝順既野就算唔提都應該要…
爸：「魯路修，講真你憎唔憎我？」
搞乜呀佢，孫女百日宴忽然咁感性？可以唷同你玩落去囉。
我：「憎呀，一直都好憎你，你呢個不負責任，終日唔係屋企既老豆，有邊個仔女會唔憎你。」
「或者你去問美星佢都會俾一樣既答案你，唔信你去試下。」
爸：「哈哈，我就知道，無辦法啦當時唔同而家，我要搏命搵食養你地兩隻化骨龍嘛。」
「當時你家姐出世，你阿嫲叫我一定要擺滿月酒，但我就話邊有咁多時間同錢搞咁多花臣野推左佢，去到你出世，我又嫌麻煩用類似既理由推左佢。」
「結果就係一次都無擺過，諗返起我都算不孝呢係咪呀。」
喂喂…估唔到呢條友係黎真架喎，唔怪得佢當日力排眾議堅持要搞百日宴啦。
係想彌補心入面個份遺憾..啊？
爸：「到今日見到你呢個百日宴我先發現，如果我當年有搞滿月酒，你阿嫲會唔會好似我而家咁開心呢？」
「因為我想搵多d錢又嫌麻煩而造成佢一生遺憾呢…佢應該都憎我囉可？」
我：「諗得太多啦，把自己看得那麼高，我都幾肯定阿嫲無諗得咁多。」
「嗱，抹下你塊臉先啦。」
我遞上一張紙巾比眼前呢位「老人」，嘛做得阿爺既人叫老人都唔過份吖？
點解要遞紙巾？因為佢開始流眼淚囉，我怕自己唔再出聲的話，佢既情緒會發酵得更厲害，分分鐘一發不可收拾。
我好少見佢咁既樣，甚至有無見過佢咁樣都成問題。
不過唔知點解我唔意外佢會有咁既反應。
其實都正常既。
爸：「魯路修，你真係大個仔喇，一定可以做一個比我更好既爸爸。」
可唔可以呢？我都唔知道添。
諗深一層，佢作為一個老豆又唔係真係差成咁既…起碼佢提供到我地既生活所需先。
啊真麻煩…而家有D想收返頭先自己講過既野添。
我：「我會努力架啦，你不如都趁呢個機會好好學下點做一個好既阿爺啦。」
我唯一諗到開解佢既方法就只係得呢個，有無用都唔知。
爸：「好呀，幾廿歲人先黎學做人，唔知我趕唔趕得切呢？」
我：「嘛…有心的話唔會怕遲既…只要你…」
Cherry：「啊~搵到你地喇~~」
就係我打算結束呢場談心既時候，Cherry就突然間，無聲無色地闖入我地男人既世界。
我：「嗯？搵我地有事？」
Cherry：「梗係有事啦，係時候影全家福喇~」
啊全家福…
爸：「哈哈，係啦主角快d返去影相啦。」
Cherry：「老爺你講乜啊，話明全家福，你呢個做爺爺既梗係要一齊架啦，家姐同奶奶都係度等緊你架。」
哈哈，俾佢講左我想講既野添。
老豆聽到Cherry咁講先係呆左一呆，之後就仰天大笑左幾下，企左起身。
爸：「咁就行啦，唔好要人地等。」
咁先係架嘛。
真係多得Cherry出現，幫手打開一個新局面。
愛死你啦真係。
三個人返到入café既時候，其他人都分開兩排，列哂隊咁歡迎我地。
而係「終點」，有美星，老母同Nicole等緊我地。
簡單d講，就係我既一家人。
全家福，就係要一家人一齊影架啦。
影呢張相既時候我係百感交集，但臉上卻不自覺咁露出最真誠既笑容。
估唔到我呢個小小傻瓜，都可以擁有咁大既幸福。
Cherry：「傻瓜，之後既幸福會更大呀知唔知？
」吖呢條友真係係咪識讀心架呢…呢個永遠都係一個不解之謎。
不過，佢講得岩既，我地之後既幸福一定會愈來愈大。
話唔定第時家中又會增添新成員添。
「Final」 「全家福」