「短篇」「小小傻瓜，大大幸福」: 努力

後日就係Cherry入院既日子了，估唔到咁快就到呢日。

我同佢第一個仔女好快就要出世啦，老老實實我真係興奮又期待，但又唔敢表現出黎。

我都要快d學下為人老豆應該點做，應該抱住咩心態先得，我個老豆唔係一個好既參考對象，應該學邊個先好呢？Cherry爸爸？

啊係喎，既然都就快到預產期，我諗我都係砌好之前晨哥送比我地個張BB床先會好D，快d準備好總無壞既。

就係咁，星期六既一大清早我就係書房入面砌張BB床。

吖，真係麻煩呢這張床…點解咁難砌架，仲難搞過PG模型都有既…

無模型框，無部件號碼都算，最麻煩既係份說明書寫到鬼死咁簡單，根本就零作用。

真係砌到想掟爛張床，但又醒起張床其實係晨哥「借」比我地，整爛左既話到時候點還比人。

所以最後我都係默默咁放返低手上既床腳，再默默努力過。

奮戰多我諗大概兩三個鐘頭，我終於都砌好張BB床，嘩上好最後一件parts個一下心情真係好激動，幾想大嗌Yes，我諗自己真係差D當左張床係自己d模型。

不過咁樣睇張床好似寡左D，好似硬係差左D野咁既…？

我睇電視人地D bb床好似…呀！！差左個d係床上面轉轉轉既玩具！！

唔…一陣要出去，買唔買埋好呢？定係定BB出世先買呢？

啊唔好講咁多，執返好D野出廳飲啖野先，幾個鐘頭無飲過野，個口真係乾到不得了。

我隨隨便便咁收拾好佈滿一地既膠袋，膠紙等等既垃圾之後就離開左書房，慢慢行出廳搵野飲。

正當我思考緊飲咩好既時候，我感覺到好似有人係梳化個邊望住我，於是我下意識望左過去，就見到個肚已經好似一個蘿咁大既Cherry同美星兩個一齊排排坐左係梳化。

佢地仲要食住曲奇，好滋味咁款，睇到我都有d肚餓。

我：「咁早起身既你地？」

美星：「你唔記得今日約左阿爸阿媽佢地飲茶咩？」

呀！！！完全無左回事呀！！仲諗住今日係好得閒既添！！

我：「做乜唔提我呀你地，慘喇而家仲趕唔趕得切呀？」

Cherry：「見到你咁專心努力砌緊張BB床，我地邊好意思打攪你啫~不過唔洗咁緊張~~我地仲有大把時間既，過黎食塊曲奇先啦~好好食架~

」

佢一邊講一邊遞出一塊曲奇叫我埋去食，好似當左我係狗仔咁。

佢兩個咁輕鬆，得我一個咁緊張顯得自己成個傻仔咁添…

嘛，其實一直都係咁架喇。

之後我地就起程去約好左既酒樓，個排場好似太后…呀唔係，皇后出巡先岩，處處護住Cherry。

我就好似一個小太監咁係佢身邊陪住佢行，免費提供我既手臂同膊頭比我既皇后挨住同撟住。

唔只我同美星提供呢種待遇比皇后Cherry，去到酒樓D食客見到佢大住肚都處處禮讓佢，搞到佢開心又尷尬。

好快我地就攞到位，老豆老母都未到我地就已經入好座，開哂荼等佢地既到來。

反正佢地都未黎到，我地三個索性一邊剔野食一邊傾計。

我：「你就真係威啦，皇后級既待遇喎而家。我懷疑我地咁快有檯都係多得你咋。」

Cherry：「哈哈，咁仲唔快D謝主隆恩？唉呀…

」

佢想撟住我但係因為我地張櫈之間有少少距離，佢需要稍稍郁一郁先做到，可惜既係而家既佢礙於太大個肚，活動能力十分有限，想挨埋少少都有困難。

貼心既我見到咁樣當然會有所表示啦，我主動移埋少少，移到佢可以撟到我既距離。

原本打算悄悄地，唔俾佢發現既情況郁既，但始終都係被精明既佢發現左。

佢抬起頭同對我對望左一下，露出一個滿足既笑容，仲捏左我個鼻一下先挨落黎。

真係吖，無你辦法。

我：「好喇好喇，快d睇下食咩喇皇后娘娘~奴才我肚餓啦~」

Cherry：「唔…好多野都唔食得，我唔揀啦…你發板啦~揀多D老爺奶奶鐘意既野食~」

聽到佢咁講，我不由自主咁望左佢一下，見佢個樣變到悶悶不樂，我即刻意識到發生咩事。

戒口呢…真係麻煩…佢可以撐到咁耐其實真係好勁。

我用另一隻手摸一摸佢塊臉，係佢耳邊細細聲講左句：

很想要吧？你以為我會咁講？其實我第一下都諗到呢句。

不過我最後講既唔係呢句，我講既係「盡情食啦，一次半次無問題既。」

咁大既引誘當然即刻見效啦，都唔洗一秒佢就望住我，仲要係用個楚楚可憐既樣。

Cherry：「真係得咩…好似唔係咁好喎…

」

我：「你都戒左口咁耐，之前D檢查都話BB好健康，今次當係獎勵啦。」

佢一直都咁努力，真係辛苦佢架啦。

不過其實又唔係我叫佢戒口既，係佢自己話要戒既。

得到我再三既批准之後，佢好似如釋重負咁狂剔點心紙，人地唔知仲以為我呢個做老公既無比飯老婆食…

美星就係一邊托住頭，用個好滿意既眼神望住我地，好似d父母見到自己仔女事業有成咁。

過左一陣，我地真正既父母都黎到，阿媽一黎到就坐係Cherry旁邊，關心Cherry既情況。

阿媽仲拎黎當年陀我同美星既經驗出黎同Cherry分享，話自己當年生我地兩個都係直接call白車之類。

佢仲話生我個陣美星以為佢肚痛，係咁搵藥比佢，笑到我地。

但我最在意既係Cherry問既一個問題。

係大家都全情投入係食野之際，佢細細聲咁問左阿媽一個問題。

「生個陣係咪真係會好痛架…

」

睇到佢咁問個下我真係想笑出黎，但我知道笑既話我既生命一定會受到相當程度既威脅，所以我決定死忍。

估唔到天不怕地不怕既佢原來都係會怕痛既。

阿媽：「係會好痛架，不過係幸福既痛囉~

」

幸福既痛…？

我同Cherry對於「幸運既痛」呢個形容都唔太明，呢個時候阿媽又補多左句。

「生個陣你就會明架啦，不過記住唔好比咁大壓力自己呀，一切順其自然就得架啦~」

Cherry：「嗯，我會努力架啦！

」

聽到佢話會努力，其餘三個人都笑左出黎。

人地岩岩先叫你唔好比咁大壓力自己，你就即刻話會加油係咩玩法呀老婆…

不過佢就係咁架啦，可愛到令人完全唔會有想責怪佢既念頭。

之後大家就開開心心咁食埋淨低既野，尤其係Cherry，佢最後仲叫埋甜品，好似將呢幾個月既quota一次過用哂咁。

但係無人講D乜，因為大家都知道佢真係辛苦了。

我地三個返到屋企之後我就去左沖茶飲消一消滯，當我拎住茶出返廳既時候就見到佢摸住自己個肚坐係梳化。

係因為食得太飽定因為…

我諗都係後者架啦，又緊張個BB。

我飲左啖茶之後就行埋去佢身邊坐低，拖住佢隻手關心佢既情況。

就算阿媽叫左佢唔洗緊張，但初為人母又點會話唔緊張就唔緊張吖…

等我呢個準爸爸兼人地老公關心下佢啦。

我：「點呀，又諗緊後日入院d野？」

Cherry：「唔？唔係吖，我諗緊遲D餵人奶好唔好啫~」

口中既紅茶一滴全部噴哂出黎，噴到一地都係。

太衝擊啦，實在太衝擊啦，一時之間接受唔到，連想像個畫面都唔敢。

Cherry：「又係度諗衰野，你呢個咸濕仔。餵人奶對BB同媽咪都好架。」

我知，呢D野我當然知道啦，但你咁突然講出黎，好囉我認我咸濕囉。

我：「嗯嗯…你鐘意啦，最緊要係你既健康，明唔明？

」

Cherry：「知啦傻佬~我諗我生完之後修身既話一定會比而家更靚，你會有一個更靚更索既老婆，益左你啦~