「短篇」「小小傻瓜，大大幸福」: 守護
校慶就係咁過左去，悄悄咁成為過去既一部分。
呢日的確玩得好開心，或者以後十年都會回味返呢一日，因為實在經歷左太多開心事。
真係好彩當初有接呢個Job，如果唔係都唔會有機會同佢玩得咁開心。
之後又過左一段時間，Cherry個肚開始慢慢大起黎，普通孕婦常見既特徵都開始慢慢浮現。
好彩既係佢一早決定左留係屋企做野，唔洗返係好遠既公司，減低左舟車勞頓帶黎既疲勞。
而見到佢個肚慢慢變大，我亦暗自下定決心，調整一下自己既工作。
我學佢咁將工作搬返屋企做，等自己盡可能有更多時間係佢身邊照顧佢。
起初佢有話過唔洗特登咁做，佢可以自己照顧到自己，但我係都唔聽，堅持要照顧佢。
因為結婚個時就已經係所有人面前應承過佢，無論咩事都好，我都會係佢身邊照顧佢架嘛。
雖然口裏說不，但佢既表情就誠實到不得了啦，係我每日悉心照料之下，佢每日都過得好開心。
見到佢咁開心，我自自然然都變得開心起黎。
照道理，日日都長時間對住應該會好快厭，但我地居然岩岩相反，一日比一日過得更開心。
我地之間既甜蜜好似再升華左一個層次咁，真係神奇。
今日我又陪佢去做檢查，兩條友坐地鐵拍住拖咁去，今次可以打正旗號坐關愛座，我仲講笑咁話要自拍紀念下，點知佢又真係即刻拎個電話出黎影喎，兩條友係咁影影影，搞到周圍D人都望住我地了。
最後就演變成兩個傻既係地鐵忍笑忍得好辛苦，都唔知遲D會唔會比人放上網公審。
Cherry：「lulu呀，你記唔記得以前你好唔鐘意自拍？」
佢一邊睇頭先既自拍一邊同我講。
啊…佢咁講一講…又好似真係咁…係囉係由幾時開始我唔再討厭自拍架呢？
我：「嘛…以前係覺得好麻煩既…不過人大左改變都係好正常架啫。我而家覺得影相其實都幾好吖，可以幫手保留起D片段。」
Cherry：「哈哈你講到自己好似有腦退化，好容易會唔記得發生過咩事咁。」
我：「又唔一定係無記性既，或者第時我早死過你，你都可以拎住D相同我地既仔女講我地以前D低能野架。」
Cherry：「又亂講野！我地個BB都未出世你就咒自己死！你點做人老公同爸爸架！」
我：「喂喂喂唔好咁激動先，咁係人都會死架啦，話唔埋我會有咩世紀罕見絕症呢？」
Cherry：「仲講？你死先我咪要一個女人仔湊仔，咁矛架你，我唔準你早死過我架知唔知。」
我：「哎..咁好似有D…嘩！痛痛痛！」
點解我會突然間嗌痛？因為佢突然用力扯我頸上面個條戒指鏈，好似真係當左條鏈係狗帶咁，勒到我幾鬼死痛。
Cherry：「唔準話好麻煩呀知唔知！」
嘩你真係識讀心架喎…
講開又講，我又真係完全無諗過邊個會死先呢個問題…
不過其實呢個問題都唔係咁重要啦，無論邊個死先都唔會影響到個結果。
無論點都好，我都會一直好好守護住佢，用盡我淨低既時間。
去到診所，清一色都係女人，全場得我一個男人，其他人都用種奇怪既目光望住我，望到我幾尷尬。
佢就威啦，有老公陪住做檢查，睇佢而家既表情簡直就係人生勝利組咁，開心到不得了。
威喇威喇，全世界你最威啦老婆。
不過我無同佢一齊入去做檢查，因為個下我咁岩行開左去洗手間，到返入去醫務所個陣，佢就已經入左去見醫生。
佢出返黎個樣仲係咁開心，我就知道一切安好，就決定唔多問了。
一切都好就得啦。
我地兩個咩都無講，只係拖住對方既手係條街上面漫無目的咁行。
見到佢心情咁好，我開始愈來愈好奇醫生到底同佢講左D乜啦。
Cherry：「lulu呀，我有D肚餓啦，不如我地去家姐度食野？」
我：「可以呀，我地坐的士去？」
Cherry：「唔洗哂D無謂錢啦，咁近我地坐巴士去咪得囉~」
真係一個慳家好太太。
我聽哂佢話，同佢坐巴士去搵美星，今次又係坐關愛座，仲要係個阿婆主動叫佢去坐，我企係旁邊睇住笑到幾辛苦，最後仲要比佢打左幾下。
去到café，多人到爆炸，班仆街好似前世未撚飲過咖啡咁。
不過唔緊要，好彩我家姐係一個大仆街，佢裝修既時候專登間左一間玻璃房出黎，等佢D朋友黎既時候可以有房招呼人。
可笑既係，我好似仲未聽過佢有朋友黎搵佢，但係唔緊要，間房而家終於有用啦。
呢間房係而家呢個時候就好似係一個桃花園咁，我地可以話係與世隔絕。
咦咪住先…我地其實係可以睇到出面，出面又可以睇到我地，咁好似唔係桃花園…
哎唔諗啦真係麻煩，總知而家我地有個舒服既位坐就得喇，佢肚餓啦都係唔好再哂時間係D無謂野上面啦。
我：「點呀想食咩？話我知等我即刻去煮比你。」
Cherry：「唔好啦而家咁多人…你去煮既話會阻住人地做野架…你去幫我買件cake同杯果汁就得啦~
」我：「唔得！肚餓點可以就咁食件cake就算！算啦我去煮意粉比你，你等我十分鐘呀。
」我無等佢應我就一支箭跑左出房，直接跑去廚房睇下有咩材料可以用。
有煙肉…洋蔥，仲有蒜泥同醬…岩岩好可以煮到意粉。
咦仆街無意粉？唔係掛搵齊D配料先發現無意粉，玩我咩…
最後我只能用長通粉代替意粉，勉勉強強咁煮出一碟長通粉。
煮好之後我就順手係蛋糕櫃入面拎出一支西瓜汁，但準備返去搵Cherry既時候，我先發現有唔少仲排緊隊既客望住我。
其實係望住我手上既通粉先真。
我一臉尷尬打算快快去手搵Cherry就算，點知就比突然出現既美星攔住左我。
美星：「又亂用我鋪頭D料黎煮野？仲用埋我間VIP房，呢筆點計先？」
我：「屌…Cherry肚餓吖嘛，你鋪頭又咁好生意九萬幾人排隊，我咪唯有自己煮囉，最多我一陣去買返D料俾你嗱。」
美星：「哎唔洗，我唔要。嗱今日負責煮熱食既同事就病左唔返得，你代佢做呢個lunch hour我就放過你啦。」
屌，果然係咁。
我：「但係我…」
美星：「嗱阿妹個邊我會好好照顧佢架，你就唔洗擔心，全心全意去煮野啦。」
「有返熱食啦！今日係長通粉收銀同事可以落order~」
佢一邊講一邊拎走我手上既通粉同西瓜汁，仲向收銀個邊大叫，引黎一陣掌聲既回應。
哎…你咁即係焗我上賊船啫…麻鬼煩…
但當我想正面拒絕佢既時候，佢就已經走左入房搵Cherry。
哎…真係麻煩…
雖然唔係自己鋪頭，但我都唔想d客失望，無辦法啦唯有煮啦。
就係咁我做左一個鐘頭苦工，煮左唔知幾多噸長通粉先過到呢個lunch hour。
啊…好攰呀救命…
我拖住呢個就快虛脫既身體，一步接一步咁慢慢行入玻璃房。
見到梳化，第一時間就撻上去，可想而知係幾咁辛苦。
佢兩個見到我攰成咁好似好開心，我都唔知俾咩反應好。
Cherry：「認真做野既男人真係好型呢~
」因為佢呢一句咁簡單既說話，我嘴角就失守了。