[真人真事][校園][純愛]《兩個我加一個妳》: 第九十三章

冇幾耐就係國慶日

今年國慶日夠特別喇

放心唔關祖國事

各位乜野政治立場都冇問題

咁究竟有咩咁特別呢



跟住落嚟會講

話說原本我係唔記得咗今日有咩要做

係我起身之後上咗陣網

跟住望一望個日期時間，

無啦啦先醒起一啲野



因為我準備咗啲野一定要喺今日講

當然啦原因係好無聊

暫時我就唔講出嚟

但係總而言之一定要今日講

聽日後日都唔可以



呢單野我都計劃咗好耐

都起碼年幾

點解要咁樣做

咪就係無聊囉哈哈

跟住我就梗係即刻sms芊靈

我:「今日得唔得閒 」

好快佢就覆咗

芊靈:「做咩呀 」



我:「想約你去街 」

芊靈:「掛住我呀 」

我:「係呀好撚掛住你呀 」

芊靈:「尋日返完學咋喎

咁快又話要見

你大把女啦使乜約我 」

我:「痴線我大把女個目的都係因為你



你知啦我要練習同女仔出街

咁樣梗係要搵女仔練啦唔通搵男仔咩屌

費事同你出嗰陣，

乜都唔知識做戇鳩鳩咁樣

搞到你唔鍾意丫嘛 」

芊靈:「理由幾動聽丫

包裝得幾好 」

我:「咁點呀出唔出呀



有啲野一定要今日同你講 」

芊靈:「講咩呀點解一定要今日 」

我:「出到嚟你咪知 」

芊靈:「你咁樣講我好驚喎 」

我:「總之聽日後日都唔得

一年淨係得一日 」

芊靈:「好想知係咩嚟哈哈 」



我:「咁你就要出嚟

因為我唔可以對住其他人講

得你先可以 」

芊靈:「咁呀

我就唔係話唔出，

不過有咩做 」

我:「唔知喎你諗啦 」

芊靈:「搞錯呀你約我你都唔諗埋 」

我:「我約你目的就係想見你

跟住就冇喇

去邊梗係你話事 」

芊靈:「今日主題公園實多人

排隊都排死

出嚟行街好冇 」

我:「好 」

芊靈:「不如去沙田

我地好似未試過一齊去

出嚟成日都係去九龍 」

我:「好 」

跟住我地就搭地鐵去九龍塘

再搭火車去沙田

唔知係咪錯覺嗰陣真係冇咁多強國市民

我上個月先再去一次新城市，

去完一次你會發覺一樣野

就係聽到人地講廣東話嗰陣會感到出奇，

聽到普通話甚至係連普通話都唔係嘅語言

唔知點解會合理化咗

有時我都唔明白點解會咁樣

不過呢啲野都係唔好講咁多，

費事一陣又引戰

講返當時先啦

嗰陣我同佢係咁喺新城市呀沙田廣場呀甚至乎希爾頓

都講過唔止一次啦我同佢好鍾意咁樣行

一路行一路傾計

行到邊睇到邊

睇下呢樣睇下嗰樣

唔係重點就唔多講喇，

跟住佢話肚餓

芊靈:「不如去食Häagen-Dazs

我有coupon呀 」

我:「頂你有coupon唔早響 」

芊靈:「咁頭先唔肚餓呀嘛

點樣早響呀 」

我:「係嘅係嘅 」

跟住我地就去咗Häagen-Dazs

嗰陣唔係依家呢個舖位，

依家呢間Häagen-Dazs係之後新開

嗰張coupon原來係單球免費升級變雙球

佢就要士多啤梨同埋提子冧酒

我就梗係唔使講

一定係朱古力

我:「做咩唔用筒

抄我用杯 」

芊靈:「你抄我都好冇

我排先架 」

我:「又喺度鳩噏 」

芊靈:「做乜咁話自己呀

咁我驚自己論盡丫嘛咪用杯 」

我:「唔係講笑其實我都係 」

芊靈:「不過用杯有用杯好 」

我:「做咩事 」

芊靈:「就係隨便可以用匙羹試你嗰杯朱古力嘻嘻 」

跟住佢嚟手就舀咗我啲朱古力

我:「搞錯呀手腳咁快架 」

芊靈:「um

都幾好食 」

我:「明知我朱古力都唔係好多

重要喺乞衣兜上面拎飯食 」

芊靈:「唔好咁小器啦

最多俾你試啖

唔係講笑提子冧酒真係好好食 」

試完之後我覺得差唔多

都係朱古力好食啲

我:「還可以啦 」

芊靈:「睇你個樣都係覺得朱古力好食 」

我:「醒目叻仔 」

芊靈:「不過都係要試多啖

因為食食下都幾好食 」

我:「係喎我突然發覺提子冧酒都幾好食喎

我都覺得要試多啖 」

芊靈:「可恥

呢個大話好假 」

我:「你個大話唔假 」

芊靈:「梗係唔假

真心覺得朱古力幾好食 」

因為我地以前成日都係咁樣撈亂食

飲品試過飯又試過

所以唔覺得有啲咩咁特別，

當然估唔到嘅係佢唔介意咁樣啦

係咪一個signal

已經唔會去諗，

反正都過咗咁耐，

成十年前，

或者心入面有答案嘅

只係自己從來唔敢反思，

唔鍾意赤裸裸咁樣面對自己

更加唔鐘意抱怨自己嗰個感覺

一句講野就係冇撚用。