[真人真事][校園][純愛]《兩個我加一個妳》: 第八十九章

跟住落嚟重有幾個禮拜暑假

老實講都真係冇乜特別

既然係咁就唔多講喇

就不如直接講九月開學

當然啦上到去中六，



嚴格嚟講其實冇中五嗰陣咁chur

唔係真係下下都係溫書

抖返幾個月唔係好過份啫

有見及此

今年我就同Cyrus佢地一齊去咗參加足球隊



我地學校就好撚搞笑

要踢正選首要條件唔係勁

而係識唔識到人同埋夠唔夠年資

最好笑年資唔係講喺足球隊入面喎

而係你喺學校讀邊級



咁啱我地嗰年好多中七都冇踢

得返一兩個喺度

最好笑係嗰兩個師兄我地都識嘅

自自然然我地可以踢正選啦

即使係第一年入校隊都好

其他野已經有晒門路

咁就搞撚掂

我:「講真喎我未踢過大場喎 」



Cyrus:「唔撚緊要

我地學校出到去都係鳩下鳩下

唔係好多人有期望

放心啦唔撚使淆 」

去到最後我係打單箭頭

因為幾次喺學校練波都入咗幾球

雖然全部都係空龍執雞單刀



不過佢地話入得波多就得

話知我點樣入

咁好明顯佢地都係得啖笑啦

我就唔理咁多

淨係知可以打前鋒不知幾撚型

我好記得第一場係喺九月中某個禮拜六打

重要係早場，

咁樣喺禮拜五放學嗰日，



成班人就話聽日都要踢波就唔好練喇

留返啲力聽日踢

我就睬佢都傻

返屋企就搵松島楓老師教我踢波

由於嗰日唔使練波

自自然然就係同芊靈返屋企啦

芊靈:「帶齊啲野未



手冊功課筆袋銀包水樽 」

我:「無論中四中五定係中六

你都重係提緊要帶齊啲野

好毅力 」

芊靈:「係呀要帶齊呀

帶唔齊要返嚟拎就自己返啦

我就冇你咁得閒 」

我:「痴線邊個話要你陪 」

芊靈:「好囉咁我唔提囉

等你返到屋企先知唔記得帶

跟住死死氣返去學校 」

我:「咁又唔好

講真我都驚自己唔記得 」

芊靈:「你知就好啦

返屋企 」

我:「嗯 」

出到去學校門口嗰陣，

芊靈:「做乜唔同我講呀 」

我:「無啦啦講乜撚 」

芊靈:「你就講呢啲

我講你地聽日踢波呀 」

我:「點解你會知 」

芊靈:「你唔記得小明係我地班咩 」

小明都係足球隊成員

求鳩其俾個名佢啦

咁啱佢就係同芊靈一班

我:「係喎

咁點解你又會知呢 」

芊靈:「佢喺班入面周圍講

諗住叫啲人支持佢

跟住我醒起你之前講過今年入咗足球隊

咁咪知囉 」

我:「原來小明條蛋散周圍叫人支持佢

等我聽日玩佢先

諗起都正 」

芊靈:「警告你唔好話係我講呀 」

順便喺度講埋啦

Michelle男朋友呀宏都係足球隊

即係好多都係自己友

我:「得啦 」

芊靈:「好唔想我嚟咩

唔同我講 」

我:「梗係唔想啦 」

芊靈:「終於講真話喇 」

我:「你嚟咗我一定掛住望你

咁樣又點樣踢 」

跟住佢又喺度偷笑

芊靈:「唔信你呀 」

我:「頭先你又話我講真話依家你又話唔信

講撚晒 」

芊靈:「你一定係周圍望靚女

搵我嚟過橋 」

我:「唔係喎

其他靚女唔會影響到我

我落到場就係想贏

不過你喺度就難講啲 」

芊靈:「你放心

聽日我會大聲嗌加油

等你知我嚟咗

唔好輸呀 」

我:「朝早你都嚟

唔瞓晏啲 」

芊靈:「壹仔踢波喎

幾大都嚟啦係咪先 」

我:「學到野 」

芊靈:「嘻嘻

喺度偷笑 」

我:「你囉好冇

屈我 」

芊靈:「你平時夠屈我

屈返你一次 」

我:「平時一定唔係屈

次次俾我捉正 」

跟住即刻偷笑

嗱嗱嗱

又偷笑喇 」

芊靈:「係咩，邊個笑呀

唔知嚕 」

老實講，

其實我又唔係好似嗰啲漫畫咁樣

想心目中嘅女主角喺球場外面幫自己打氣，

又或者遞水

可能你地唔覺啦

其實以前嘅我係好想贏

當然唔係去到樣樣都要贏咁誇張

但係當身處喺一啲自己有信心嘅領域嘅時候，

就會即刻變到求勝心切

只要贏到就乜都冇所謂嗰種

不論光唔光彩漂唔漂亮，

總之就係要贏

嗰陣時踢波就係呢個心態

同埋另一樣就係驚喺芊靈面前踢得柒，

到時咪唔型囉哈哈

唔係話想佢唔嚟，

而係唔會特別想佢嚟囉

到場支持固然好，

但如果話唔得閒嚟亦都唔會怨天尤人

當然啦依家踢波都唔係呢個心態，

人到中年，

啖火難免會自動自覺熄咗

依家咁樣講返當年嘅事，

其實都真係有啲懷緬過去，

嗰個不惜一切達到目標嘅自己，

總算冇唔記得呢個咁多年冇出現過嘅人