[真人真事][校園][純愛]《兩個我加一個妳》: 第八十六章

跟住就去到七月啦重有一個月就放榜

因為嗰陣唔係依家dse年代，

會考係八月頭放榜

話說有一日喺屋企打打下機

無啦啦有條友打俾我



咁我就以為係Cyrus啦，

因為條撚樣話今日晏晝會出去踢波

但我冇去因為話好熱

叫佢返嚟嗰陣打俾我

跟住就一齊打機



嗰陣我亦都忙緊喺電腦上面廝殺

所以睇都冇睇就聽電話

我:「踢完波喇話

咁撚耐架屌你 」

芊靈:「唔係呀我冇踢波呀



同埋使唔使一嚟就講粗口鬧我 」

我:「點解係你架 」

芊靈:「好無聊呀咁都重要問點解

我打俾你咪我囉

點解點解，

點知咁多點解呀 」

我:「又係喎屌

唔係呀我以為係Cyrus



佢話踢完波會打俾我丫嘛 」

芊靈:「你唔出去踢嘅 」

我:「我話你知

戇鳩仔先會出去踢

大熱天時三十幾度重要烈日當空

梗係留返屋企打機啦 」

芊靈:「你咁講即係夜晚得閒啦



夜晚冇太陽呀 」

我:「你想點先老老實實 」

芊靈:「出嚟食飯丫 」

我:「無啦啦做乜出嚟食飯 」

芊靈:「今日返工

一陣放七點半

咁我費事daddy媽咪特登留飯

跟住又要特登去洗碗



咪話我自己出去食埋先返嚟囉 」

我:「你返工

無啦啦返咩工呀 」

芊靈:「返琴行呀

其實好得閒唔使成日做野哈哈 」

我:「冗員

可恥 」



芊靈:「你夠膽講你第日唔係冗員咩 」

我:「唔係

信唔信 」

芊靈:「唔信 」

我:「出嚟食飯唔係問題

但係你喺邊度返呀

我要就時間出嚟 」

芊靈:「喺你屋企附近嗰個商場咋嘛

唔係咁近做乜叫你 」

我:「醒目真係夠晒近 」

芊靈:「咁你七點半到商場啦

如無意外應該準時嘅 」

我:「好 」

跟住梗係即刻同老母講今晚唔喺屋企食啦

其實嗰個商場離我屋企都係五分鐘左右

三兩步就行到過去

果然踏正七點半

芊靈就已經行出嚟

我:「唔使ot咩 」

芊靈:「唔使呀

其實七點之後已經冇乜野做 」

我:「點解無啦啦返工嘅 」

芊靈:「冇呀

有野想買

咁咪想試下自己第一次賺錢買囉 」

我:「搞撚錯呀你屋企咁有錢

邊使出嚟做野 」

芊靈:「你唔覺用自己錢買意義唔同嘅咩 」

我:「唔好意思真係唔覺

最好人地買埋俾我添 」

芊靈:「同你講真係嘥氣

食野咯好冇 」

我:「好 」

最後我地求求其其去咗椰林閣食

講起上嚟依家椰林閣已經少咗好多

十年前唔係咁，

雖然未去到週街都係，

但未至於好似今日咁樣想搵一間都難

我依家一時諗起淨係觀塘同埋慈雲山有

其他都真係唔記得

我:「你嗰度得你一個人 」

芊靈:「重有一個女仔囉

都係part-time 」

我:「靚唔靚架 」

芊靈:「靚過我囉 」

我:「冇可能咁佢一定唔係女仔 」

芊靈:「低能

食野啦 」

我:「返到幾時呀 」

芊靈:「返到八月尾呀

依家一個禮拜返兩日

禮拜一禮拜四 」

我:「裏面多唔多野做 」

芊靈:「其實幾舒服

識彈琴嘅話可以彈

不過我唔識哈哈 」

我:「真係好野竟然重有動力返工

你驚遲啲冇得返咩 」

芊靈:「係

咁依家難得叫做有份工，

雖然返得唔多啫

不過都好想試下用自己錢買野 」

我:「真係傻豬嚟嘅

用自己錢買野都好玩 」

芊靈:「未試過丫嘛 」

我:「好

人各有志唔阻你 」

芊靈:「你識乜野丫

以後你逢禮拜一禮拜四夜晚得閒出嚟食飯 」

我:「唔得呀 」

芊靈:「咁冇野喇算啦 」

我:「你唔問我點解唔得嘅 」

芊靈:「咁屋企有人煮咗飯

成日出去食真係唔好嘅 」

我:「傻嘅

屋企人好易話為啫

一早講定唔返嚟食咪得 」

芊靈:「咁點解你唔得閒呀 」

我:「因為約咗人囉 」

芊靈:「邊個

Cyrus 」

我:「戇鳩

男仔點會無啦啦約食飯

梗係女仔啦重使問 」

芊靈:「你有女仔約

快啲講邊個

等我睇下邊個咁慘 」

我:「嗰個女仔呀

佢依家都好慘呀

都坐緊喺我對面咯

又成日偷笑喎 」

芊靈:「係咩

邊個嚟架我唔知喎 」

我:「咁你見到佢嗰陣

就幫我同佢講逢禮拜一四夜晚約咗佢啦 」

芊靈:「考慮下先啦 」

就係咁，

嗰個暑假，

無論放榜前後都係，

一個禮拜總有兩日，

夜晚係同佢一齊食飯

有幾日重會同佢一齊帶呀bi散步

所以基本上一個禮拜都會見幾次。