[真人真事][校園][純愛]《兩個我加一個妳》: 第七十五章

之後學校有運動會

知但係因為我地要準備會考

所以冇出席

後來聽講嗰年都唔係好多中五生返去

老老實實，



其實會考冇咩好講

唔係完全冇野講嘅不過同芊靈冇關囉

原本諗住考試嗰幾日約佢一齊食早餐嘅

點知我同佢個考場完全唔近

咁就算數啦



我又冇喺度怨天怨地

亦冇喺度講埋啲濕鳩野

即係嗰啲乜鬼野緣分未到呀，對的人錯的時間乜乜柒柒

我始終覺得呢啲野都係肉鳩酸

真係好難講出口



諗都唔敢諗添呀

跟住就考試啦

認真講句入到去係冇得緊張

大佬你有溫書嘅話，

點會有多餘時間出嚟緊張

你一揸住支筆就即刻著火啦應該

重有多餘時間徬徨咩

考完一大輪之後，



理論上重有口試未考

不過大家都明啦

考完筆試已經當考完

當堂放鬆晒啦

同埋嗰陣係六月幾先考口試

唔係依家dse年代，

四五月搞掂晒即刻鬆懈啦



咁中間我同佢又唔係完全冇見嘅

始終大家就到時間嘅話都會兩人一狗咁樣去散步

呀bi個死仔重係冇乜點變呀

都係咁熱情

我都問芊靈有冇溫書溫到好大壓力

我以為佢會

咁我就可以扮晒蟹咁樣俾佢訴苦呀呢樣嗰樣

名義上叫做關心啦下



又可以俾我自己ff

點知佢竟然話冇

我重以為女仔會徬徨過男仔

成日都好擔心溫得夠唔夠

又好驚識唔識

點知原來我自己估撚錯咗

根本就冇發生過我幻想嘅情節



當然有可能係佢有但係唔想講啦，

咁樣就真係唔清楚

唔好講晒中間咁多廢話啦

直接講小弟生日啦哈哈

費事成日講無聊野拖慢個節奏

話說去到六月頭就係我生日

今年生日有啲唔同

因為佢諗住約我睇戲

我同佢中間有個默契

我唔知佢會唔會對住其他人做啦

但係我淨係會對住佢做啫

咁究竟係咩呢

就係喺佢生日日期嗰個鐘數同佢講生日快樂

即係好似上次咁呀

佢三月二號生日，

我就03:02同佢講生日快樂

我係六月五號生日，

佢上年就係喺朝早06:05同我講生日快樂

原本我以為今年佢唔會咁樣做

因為之前從來冇講過我就嚟生日

佢冇講我亦都冇提

本身自己都好少係自己生日

咪又係一日

咁我見佢冇講我諗住都未必好似上年咁樣啦

點知我生日正日嗰朝起身嗰陣就見到佢喺06:05同我講生日快樂

嗰陣佢已經online

咁就即刻搵佢啦

您剛剛已送出來電震動

我:「多謝喎芊靈女神 」

芊靈:「我唔係咩女神囉

好眼瞓呀為咗同你講生日快樂

搞到我一早起身 」

我:「好似冇叫你咁樣做喎 」

芊靈:「即係話我多管閒事啦

想同你講句生日快樂點知你咁樣同我講返

學你話齋真係心都噏埋

食自己啦你 」

我:「講笑啫講笑啫 」

芊靈:「唔知你係咪講笑喎 」

我:「你同我講生日快樂簡直係三生有幸

真係唔好意思

為咗我呢啲蛋散要你早啲起身 」

芊靈:「哈哈講得冇錯

唔好走數呀 」

我:「走乜撚 」

芊靈:「你重未送生日禮物俾我 」

我:「成幾個月之前你依家先問返我 」

芊靈:「咁之前考試忙丫嘛

我掛住溫書唔記得咗

又未諗好要乜野

得唔得呀 」

我:「得梗係得啦

咁你想要咩呀屌 」

芊靈:「陪我睇戲順便慶祝你生日 」

我:「痴線我生日要我送禮物俾你 」

芊靈:「係呀有意見

你應承咗呀唔好走數呀 」

我:「做第二樣得唔得

我真係唔係好鍾意睇戲 」

芊靈:「我知你會陪我嘅

你睇我幾辛苦

特登咁早起身同你講生日快樂喎 」

我:「唔好啦 」

芊靈:「一套啦都唔係好過份啫

識你幾年都係同你講睇一次

唔算好過份丫 」

我:「真係唔好啦 」

芊靈:「冇人陪但自己又想睇呀 」

我:「你一出聲大把狗公陪啦

使要我呢啲磨碌呢 」

芊靈:「其他人邊有壹仔你咁好呀

冇你咁靚仔

又冇你咁幽默

亦都唔善解人意喎

係咪先 」

我:「屌你講到咁樣

即係唔出唔得啦 」

芊靈:「終於肯出喇哈哈 」

我:「當我前世欠你

講到咁點可以唔出呀 」

芊靈:「梗係啦學你丫嘛

唔講誇張啲點得呀 」

我:「好誇張咩我唔覺喎 」

芊靈:「厚面皮你話點就點啦 」

我:「睇幾點 」

芊靈:「兩點喺度出發好唔好

搭巴士出去落車再行去戲院一個鐘差唔多 」

我:「好你話點就點啦 」