[真人真事][校園][純愛]《兩個我加一個妳》: 第六十九章

唔講咁多廢話直接跳去講除夕

有時去到年尾，

自不然會諗返呢一年所發生嘅事啦

「原來咁就一年。」

呢句野成日講



講都講到口臭

聽更加聽到厭，

但原來當自己一個人回顧嗰陣，

腦人面第一句出現就係呢句野

由年初同佢一齊喺學校捉波子棋，



去到年尾同佢由長沙灣行去紅磡，

一切一切都烙印喺個腦度

而且重好清晰

呢一年最大嘅得著，

唔使問當然係同芊靈拉近咗好多嘅距離啦



當然我一直都覺得重係好遠

其實有時明明只係咫尺之間，

但係結果都做唔到，

可能睇緊嘅你地唔同意我啦

但係呢個思想的而且確係我當時嘅諗法

局外人總係睇得特別通透

反而置身其中嘅就係因為太過投入，

出現更加多盲點



講真呢年真係好多謝學校嗰個戇鳩政策

即係嗰個乜q桌上遊戲學會

呢個學會我覺得係居功至偉

如果學校冇整嘅話，

分分鐘我同佢今日都只係點頭之交

當然要好多謝佢隻狗仔呀bi啦

對我唔反感不特止，



有時見到我重纏住我

亦都提供咗一個藉口

令我可以乘機見佢主人

呢啲野我真係冇同佢講呀

點講得出口，

即使平時撩佢嗰陣，

我都冇講過

2007的確係好美好嘅一年，



當時我好無聊咁樣諗，

點都要一年比一年進步

逐年逐年拉近，

直至拉近到一個枕頭嘅距離

咁你就知我嗰陣有幾幼稚啦

即管笑我戇鳩仔

講得出嚟唔怕俾人笑哈哈



十幾年後經歷咗咁多野之後，

殘酷啲講句，

進步唔係永無止境

終有一日會有上限，

甚至退步，

唔好睇咁多電影電視漫畫

話乜野超越自己冇上限嗰啲濕鳩野，

至少喺我身上冇發生啦，

咁當然都有可能係我能力唔夠

唔可以逐年逐年進步。

可能我啲思想真係比較奇怪

我真係唔覺得除夕有乜野咁值得慶祝

我就寧願返屋企打機哈哈

喺虛擬世界廝殺對方

話就話係一年

屌其實咪又係一日

你唔會過咗一日，

24個鐘就突然開竅呀話

咁即係你另外嗰三百幾日係喺度混吉啦

所以自己不嬲都冇慶祝除夕迎接新年嘅習慣

當然有可能只係自己太毒

我都有自知之明嘅

除夕嗰朝早芊靈有叫我出去

原本兩個人出呢我就可以諗下嘅，

點知佢話重有佢啲friend

我就話唔出喇你去啦

咁佢都冇再逼我

因為佢都知我呢樣真係唔係好鍾意

突然之間去到夜晚六七點嗰陣

佢無啦啦打俾我

芊靈:「今晚出唔出嚟 」

我:「唔出呀 」

芊靈:「我講我地兩個喎 」

我:「你唔係出咗呢咩 」

芊靈:「咁我會返嚟架嘛叻仔

食糖水食糖水嘻嘻 」

我:「你地唔食埋 」

芊靈:「咁樣有人唔鍾意咁多人出嚟

而我又知道喎

咁樣咪好唔情願咁樣返嚟再食糖水囉 」

我:「即係你出去食完返嚟再同我食呀 」

芊靈:「你唔知女仔個胃係裝甜品嘅咩 」

我:「你講你自己咋話 」

芊靈:「唔係囉 」

我:「講真如果你第日變肥婆真係唔關我事

我真係冇叫過你返嚟陪我食糖水 」

芊靈:「即係你話自己唔想食啦

係我逼你食

係咪 」

我:「唔係

我好撚鍾意食糖水呀 」

芊靈:「真係好鍾意咁喎

連好鍾意中間都要加多個字 」

我:「咁你就知我幾撚有誠意啦 」

芊靈:「今晚都玩唔得耐

諗住十一點零就搭車返屋企

跟住喺架車倒數

你預我十二點半前會喺總站落車啦 」

我:「得啦我準時到

最好你架車經過球場之後就打俾我

咁我可以計時間 」

芊靈:「哦好呀 」