[真人真事][校園][純愛]《兩個我加一個妳》: 第五十二章
出到去學校門口
芊靈佢話今日要去文具鋪買啲野
咁我咪一齊去囉
點知學校附近嗰間文具鋪冇佢想買嗰樣野，
就話不如去佢屋企商場嗰間文具鋪
可能之前冇乜點講佢個商場
喺度係咁咦講下啦
佢個商場絕對唔係我呢啲公屋商場可以相提並論
多野睇不特止，
環境重幾靚
用咩設計就唔好問我
我個人完全冇藝術細胞
答你唔到
不過私樓真係私樓
就連附近嘅商場都高人一等
我:「有錢真係有錢
環境都特別好
」芊靈:「唔算啦
」我:「莫非你老豆好疊水
」芊靈:「做下啲小生意咁囉
一家三口再加埋呀bi唔會餓親
就係咁多
」我:「可唔可以入贅你屋企
講真我真係識做家務
」芊靈:「痴線講啲咁嘅野
」講真嗰句芊靈又唔係嗰種周身名牌
一望就知嘅有錢人
亦都唔係亂咁用錢買呢樣買嗰樣，
所以其實用生活習慣嚟講，
睇唔出真係好有錢
但一定有錢過我呢啲窮人先囉
我:「點呀可唔可以呀
」芊靈:「唔得呀
邊有人講啲咁嘅野架
」我:「咁我要好俾心機溝你喇
溝完之後就可以食軟飯
」芊靈:「原本都諗住叫你加油
但係聽完你最尾嗰句，
原來你都係心存不軌
」我:「痴線
食軟飯簡直係我一生嘅夢想
你竟然咁樣講
」芊靈:「有錢真係咁重要咩
」我:「你呢啲住私樓嘅梗係覺得唔重要啦
平時我一個腸仔包都要分兩餐食
朝早淨係飲雀巢
珍珠奶茶都係一個月飲一杯咋
你話重唔重要喇
」芊靈:「誇張到你
我先唔信呀
」我:「唔緊要
你未經歷過我呢個階段
我知你唔明嘅
」芊靈:「講真喎
話錢唔重要梗係呃你啦
不過對我嚟講，
其實他日三餐無憂
應付到自己嘅需要就可以
除非未來嘅我轉性，
變咗一個購物狂
如果唔係，
我諗呢個諗法一路都唔會變
」我:「簡單真係好
唔多慾望所以唔多渴求
」芊靈:「你都係咁
」我:「梗係啦
不嬲都冇乜大志
驚天地泣鬼神嗰啲唔好預我
最好就係平平穩穩
」芊靈:「係呀係呀
」跟住就發生咗一件特別事件
話說我同佢去到佢屋邨個商場
咁就一齊搭電梯去文具鋪啦
因為嗰度冇乜人，
所以我同佢搭電梯嗰陣就拍住企
突然間我覺得口渴
就擰轉後面，
諗住拎個水樽出嚟啦
點知好死唔死俾我見到啲野
我見到有個男人，
禿頭四眼仔嚟嘅
揸住一部相機，
而佢企喺芊靈後面
見佢蠱蠱惑惑拎住個相機
唔使講大家都知做咩啦
呢啲時候我梗係即刻出聲啦
我:「做咩呀你
」芊靈見到我咁大聲就擰過嚟
跟住嗰個四眼禿頭仔就口窒窒咁樣講:「冇野呀冇野呀
」之後我就梗係同芊靈講啦
我:「佢想影你呀
」芊靈:「唔係呀話
」因為頭先我睇佢嗰個角度
根本就係特登想影佢裙底
點解咁肯定
因為本身芊靈條校裙其實唔算短，
正正因為佢條裙比較長
所以佢頭先特登將部相機，
放到好似對鞋咁低
總之個姿勢係好唔自然
佢聲稱就話綁鞋帶
所以就特登踎低啲
點知咁啱拎住部相機，
老實講真係傻先信
跟住我梗係同佢講俾部相機我睇
唔俾嘅話就大家搞大佢
我大把時間，
老實講一睇就知佢係毒撚
一講報警重唔嚇窒咩
跟住我就睇佢部相機啦
見到有一張相係影住芊靈隻小腿
但係唔係裙底嚟
你知啦著校裙會露小腿出嚟，
重有啲好矇嘅相不過就睇唔到係乜
跟住我就梗係叫佢剷咗佢啦
唔剷嘅話就差館見
梗係大佢啦
結果最後就真係剷咗
重要係我自己剷
驚佢條鹹濕毒撚出蠱惑
佢又係唔好彩嘅
佢部相機就係我平時用嗰部
所以點會唔識用
老實講呢樣真係咁啱完全冇夾過
跟住當然就叫佢快啲走啦
原本我話無聊想追究嘅
點知芊靈佢話唔好啦
反正都係得一張小腿相重要剷埋
好矇嗰啲又唔知係咩嚟，
跟住鹹濕毒撚就自己跑走
我:「咁仁慈放佢走
」芊靈:「咁反正啲相都delete咗
佢又唔係真係有身體接觸
你話入面真係有裙底相，
咁就當然要報警啦
」我:「估唔到你咁好人
以為你一定係喺度大吵大嚷
喊晒呀咁樣
」芊靈:「其實原本驚架
不過……
有你喺度咪壯咗啲啲啲啲膽囉
」佢最尾嗰句講得好細聲，
咁當然我係聽到啦
我:「講咩呀我聽唔到喎
」芊靈:「明明聽到就喺度扮野
」呢個時候佢塊面已經好紅
但係嗰陣我以為佢係因為頭先俾人影
所以先至面紅
各位唔該屌細力啲
我:「唔係喎我唔知喎
」芊靈:「死人頭
唔睬你呀
又喺度玩人
」我:「快啲講啦
講多一次啦
」芊靈:「頭先好彩你喺度囉
壯咗啲啲啲啲咁多嘅膽
」我:「唔通唔出聲咩
我男人嚟架嘛
」一路講一路拍心口
拍到好撚大聲
芊靈:「痴線咩拍咁大力
因住自己整親呀
」我:「點會呢我咁強壯
」芊靈:「多謝你呀死人頭
」跟住我就摸佢個頭
我:「唔使多謝應份嘅
」大家四目交投嗰陣，
又見到佢迅速變關公
芊靈:「死人頭
明明頭先咁型依家又變返呢個賤樣
唔理你呀
」跟住佢就一支公行前，
我就喺後面追佢
咁當然都係玩啦
不過有時女人真係好難明，
毒撚真係毒撚
硬係參透唔到。