[真人真事][校園][純愛]《兩個我加一個妳》: 第四十四章

跟住落嚟就真係散學禮喇

即係話中四正式完結

諗返起呢一年真係好奇妙

由我初初唔係好想搬過嚟轉校，

到依家已經完全適應晒



而且重同當日坐喺巴士上層右手邊由頭數落去第六個位嗰個女仔好熟

諗返起嗰陣真係好搞笑

左度右度啲無聊iq題不特止

重要特登喺學校扮踢波嚟睇住佢幾多點放學，

又扮作不經意同佢一齊搭車



好彩依家已經唔使做咁多無聊野

佢直接行過嚟班房搵我

重會問返我有冇帶齊啲野

真係堂堂正正一齊走

當然啦，



佢都重係唔知我當日所做嘅無聊野

一直都冇同佢講，

講真點樣講出口

不如搵人教下我

分分鐘我講出口佢都唔信我添

當時嚟講我冇記錯係得Cyrus知，

好彩佢冇爆我大鑊

如果唔係真係含得撚



芊靈成日講嗰句「有變態佬呀」就會成真

另一方面

廢話都要講多一次，

中四完結亦即係代表中五即將來臨

唔使講都知有咩挑戰

你問我有冇信心，

大佬之前邊有經驗呀



會考真係第一次

我會答你盡力囉

唔使好高分

可以原校升讀中六就得

芊靈我就唔擔心，

因為原來佢成績係好撚勁

我都係畢業禮嗰日見到佢上台拎獎先至知

淨係計文科佢係全級第二



整體成績都好似唔差，

跟住我就梗係問Cyrus

我地學校原校升讀中六嘅條件高唔高啦

佢就話中五學生原校升讀中六個比率好高

八成幾接近九成

唔得嗰啲一係就出去外國讀書，

一係就真係出嚟搵食，



只要正正常常嘅話就一定搞得掂

聽完佢咁講都好啲

不過為免佢鳩吹

當然我都係問多次芊靈啦

我:「喂

知唔知原校升讀中六難唔難 」

芊靈:「唔知你叫邊個喎

喂喂聲 」

我:「人靚聲甜嘅芊靈小姐

請問我地學校原校升讀中六難度高唔高呢

唔該 」

芊靈:「好唔慣你咁樣講野

我問過師兄師姐喇

佢地話唔難呀，

除非真係完全唔溫書啦 」

我:「你就把炮啦文學第二

老實講係咪想隊冧考第一嗰個 」

芊靈:「冇你咁黑心呀

考得好就要批鬥人 」

我:「真係冇諗衰野 」

芊靈:「痴線梗係冇啦

依家個成績都過到自己就算啦 」

我:「唔聲唔聲原來咁撚勁嘅 」

芊靈:「聽講你都唔差啦 」

我:「對住你邊有得比呀 」

芊靈:「好彩啫 」

我:「虛偽

假到死 」

跟住佢又扭我耳仔

芊靈:「個個似你咁黑心咩 」

我:「我個心黑唔黑就唔知

淨係知入面裝住你(依家諗返起都唔知點樣講得出口)

你唔係咁樣話自己下話 」

芊靈:「冇句真

誇張到死

不如俾姐姐睇過係咪 」

我:「你想點呀

講明先我唔會除衫 」

芊靈:「諗咗去邊呀

諗住就咁望咋嘛

你個腦真係唔得呀

裝埋啲咁混濁嘅野 」

我:「但係點解你話我個腦唔得但係扭耳仔呢 」

芊靈:「扭慣咗哈哈 」

跟住我梗係還手啦，

搣佢個面豬登

當然都係細細力

同埋隻手啱啱用濕紙巾抹完

芊靈:「做乜搣我

收手 」

我:「你唔扭我耳仔我咪唔搣你 」

芊靈:「傻嘅鬥耐囉 」

點知我地呢啲行為又俾人見到

重要係我班主任

班主任:「你兩個使唔使咁呀

成日都咁纏綿 」

我:「玩下啫

miss你想我同你玩都冇問題呀 」

班主任:「死仔miss都咁撩 」

我:「鳩吹啫

唔係唔係唔係唔係你聽錯喇 」

班主任:「壹仔你都大膽喺我面前都咁講粗口

下個禮拜負責幫我拎日誌

如果唔係就一缺點 」

我:「有得話唔好咩 」

芊靈喺隔離已經笑到傻