[真人真事][校園][純愛]《兩個我加一個妳》: 第三十六章

芊靈:「咩iq題嚟架 」

我:「哈哈

難呢 」

芊靈:「有冇貼士呀 」

我:「三位數或者四位數 」



芊靈:「咁樣係三定係四 」

我:「講咁多俾你聽重得了嘅

慢慢估啦 」

芊靈:「咁難架

你啲貼士真係冇錯 」



我:「係呀 」

芊靈:「俾我諗到就死 」

我:「加油啦

到時你諗到請杯珍珠奶茶又點話 」

芊靈:「你講架唔好走數呀 」



我:「幾時呃過你 」

芊靈:「點知你呀 」

正當我地講下講下，

當我見到窗外面啲風景嗰陣

不其然講咗句

我:「仆街 」

芊靈:「做咩呀 」

我:「唔記得落車添 」



芊靈:「哈哈係喎

你依家進化到車都唔記得落 」

我:「頂真係好智障 」

芊靈:「當做下運動囉嘻嘻 」

我:「有得唔當咩 」

跟住我同佢就一齊落車

芊靈:「拜拜喇大頭蝦 」



我:「出少句聲冇人話你啞嘅 」

芊靈:「辛苦你喇慢慢行返去 」

我:「係喇知道喇唔使成日講 」

芊靈:「聽日見啦 」

我:「好 」

跟住我一路行一路諗，

係喎呢一招得喎

有時有啲野真係錯有錯著



等我以後間唔中都扮下唔記得落車

咁咪可以同佢一齊走囉

反正佢覺得我咁大懵，

咁樣做肯定唔著跡啦

又夠自然喎

今次發達喇

以前就係咁，



諗一啲咁無聊嘅野，

都會不自覺咁自high

明明就冇乜野特別，

但都好似發現新大陸咁樣

好想同人分享但係又唔敢同人講，

因為驚俾人話痴線，

同埋人地唔會明白你嘅喜悅

所以點解要自high，

就係咁解。

我記得喺我生日之前

係準備緊考最尾嗰一次試，

亦即係六月頭嘅事，

順便喺度提返各位

小弟呢位蛋散係六月五號生日

我好記得生日前一日，

芊靈叫我唔使等佢放學

當時其實我冇為意點解

以為佢約咗人，

所以我都冇特別去理

然之後第二朝起身

我就收到一個msn

芊靈:「生日快樂 」

當時係朝早嘅06:05

嗰一刻真係幾興奮

因為估唔到佢會咁有心機同我講一個咁簡單嘅生日快樂

或者第二個講我會冇乜野，

唔知點解就係因為佢，

我就變到好似個細路仔咁樣

啲啲野都放到好大，

一諗就會喜上眉梢

咁我梗係即刻回佢

我:「幾有心思喎

多謝晒 」

點知佢竟然秒回

芊靈:「我係咪第一個先 」

我:「梗係啦

我呢啲毒撚邊有人特登喺十二點同我講生日快樂丫 」

芊靈:「鬼叫有人之前同我講生日快樂

係夾定個時間咩

我咪對住某人回禮囉 」

原來佢係知嘅

我重以為得我一個咁無聊諗到添

我:「心水清喎 」

芊靈:「知唔知為咗句生日快樂，

我早咗成個鐘起身

某人識做啦 」

我:「唔知你講邊個喎 」

芊靈:「唉

估唔到某人無心裝載 」

我:「你想點呀 」

芊靈:「最低限度今日一齊食lunch啦 」

我:「唔好搞我

我同你班friend都唔熟 」

芊靈:「邊個話同埋佢地食 」

我:「原來你真係想單獨約我

話咗我地一定會升溫 」

芊靈:「你今日最大我唔會鬧你嘅

隨便你點諗啦哈哈 」

我:「總之多謝啦 」

芊靈:「嗯，

陣間不如一齊返學 」

我:「好喎

但係點樣夾時間 」

芊靈:「我就嚟到嗰陣會打俾你

你換定衫啦 」

我:「知道喇娘娘 」