[真人真事][校園][純愛]《兩個我加一個妳》: 第二十四章

跟住我就將個頭擰去後面

就第一次見到著便服嘅芊靈

放咗頭髮落嚟

上半身係淺藍色運動褸，

下本身就係Adidas黑色長運動褲，



可能第一次見到嘅關係啦，

所以就記低咗啲咁無聊嘅野

哈哈，

我諗問返佢自己，

都唔知佢嗰日係著乜



冇所謂啦，

我都係成日記住啲唔等使嘅野

唔爭再多一樣

芊靈:「做咩呀

呆咗咁嘅 」



死火頭先掛住留意佢啲衣著

搞到自己定晒格添

我:「冇

好少見你放頭髮啫 」

芊靈:「唔使返學丫嘛

做咩呀唔好睇呀 」

我:「老實講丫

以你咁嘅樣，



即使光頭都係女神啦 」

芊靈:「無聊鬼又喺度吹水 」

我:「講真呀

你可唔可以誠懇啲

唔好成日話其他人吹水 」

芊靈:「我不嬲覺得其他人好誠懇架

不過你唔同嘻嘻 」



我:「有偏見呀大佬 」

芊靈:「吹水怪無聊鬼

唔會信你呀 」

跟住我再見到佢隻狗

原來真係好鬼得意

咁我梗係踎低同佢玩啦

我:「你好呀狗仔 」

芊靈:「佢叫做呀bi呀



呀bi快啲同怪叔叔講午安啦 」

我:「佢一定係識講啦 」

芊靈:「你同佢係同類應該有特別語言溝通

可能你明呢 」

我:「唔怪得你同佢溝通得咁好啦 」

芊靈:「你都得架試下啦 」

原來呀bi真係好鬼過癮



係咁摸佢個頭嘅話佢個樣會好爽

真係會碌大對眼望住你

聽芊靈講佢重要唔吠

真係一隻好狗



我:「依家去邊呀 」

芊靈:「帶佢去公園囉 」

我:「唔識路 」

芊靈:「使唔使姐姐俾條帶你拖住 」

我:「姐姐我要拖手得唔得 」

芊靈:「變態佬呀 」

我:「係變態佬就唔係淨係拖住你嘅手啦 」

芊靈:「點知你呀 」

我心諗，

呀bi你就好啦

日日可以咁近距離對住芊靈

重成日同佢近距離接觸

有時做狗真係好過做人

跟住就兩人一狗咁樣去行公園

講起上嚟其實咁樣慢慢行真係好舒服

唔使驚出汗，

節奏又唔急

因為呀bi真係好鬼懶

落到去完全唔會亂咁走

佢都係慢慢行

所以我地兩個都唔會特別急

跟住行行下，

呀bi就望住芊靈喺度轉圈

呢個時候芊靈就拎定報紙出嚟

咁大家都知咩事啦

呢個時候我梗係又去吹奏芊靈

我:「好有公德心喎 」

芊靈:「呢個唔係必須做嘅咩

唔通由佢周圍痾咩 」

我:「唔係呀我見過有啲真係完全唔執手尾 」

芊靈:「咁呢啲係佢地問題啫

我成日覺得帶隻狗落嚟散步一定要做返主人責任

唔係就唔好帶落嚟 」

我:「你知唔知你講呢句嗰陣真係有個光環喺度 」

芊靈:「你講嗰啲野真係太誇張

點樣信你呀 」

我:「唔信就算啦 」

芊靈:「點呀

想唔想拖呀bi呀

放心啦佢好懶唔明周圍走 」

我:「好 」

跟住我就拖佢，

好彩一如芊靈所講佢真係好鬼懶

本身亦都唔重

所以好易拖，

芊靈:「真係養過狗喎

啲手勢呃唔到人 」

我:「係你成日話我吹水啫 」

芊靈:「好啦好啦今次信你喇 」

我:「不如試下拖埋你

重好手勢 」

芊靈:「唔要呀你好煩呀 」

我:「真係好舒服喎 」

芊靈:「我拖住你重舒服 」

我:「咁我都知 」

芊靈:「我講用狗帶喎 」

我:「咁唔需要喇 」

跟住我地就繼續兩人一狗咁樣散步。