[真人真事][校園][純愛]《兩個我加一個妳》: 第十四章

當然啦

如果我同佢嘅關係，

一直都淨係聽留喺巴士上面嘅話

又點會呢個故事出現呢

話說聖誕假之後，



我地學校無啦啦話想搞活動學會

聽聞係今年第一次搞

淨係俾中一至中四參與

因為中五至中七要準備會考又或者A-Level，

所以就唔玩



原本我呢啲懶人就唔想參加嘅

因為佢話逢禮拜二四都要留低喺學校

我心諗唔好阻住我返屋企玩墨香啦屌

點知佢話中一至中四個個同學都要玩

咁冇計啦，



焗住要參與

跟住我就睇嗰份活動表，

見到足球就梗係快快手揀啦

點知我去申請嗰陣佢話我太慢

已經冇位

原來成堆人都揀咗

頂你個肺丫，

搞到爆晒棚



聽聞好多都係足球隊嗰班蛋散

我呢啲毒撚已經冇份入

好心你本身係足球隊就咪鬼玩啦

唉咁唯有再揀過囉

跟住喺度睇，

打籃球就唔啱我玩

羽毛球我都唔識



又唔會揀

跟住見到家政，

更加唔會去啦

呢啲真係唔好預我

煮野食甚至係織冷衫都係弱項

我知你地會諗，

男仔一定係玩模型學會啦

咁就唔好意思真係唔係



雖然我都係毒撚

但我其實唔鍾意玩模型

由細到大都係唔玩，

因為唔識砌

手工藝我好差

鬼叫自己唔靈活咩

所以以前嗰啲乜撚野高達渣古係唔識分



再望落去，

見到有個野叫做桌上遊戲學會

咁就呢個啦

起碼自己識玩黑白棋波子棋

咁就掂啦。



亦都好彩呢個活動原來唔多人揀

咁就順理成章入咗去啦

其實我原本想問芊靈嘅，

不過真係唔知點開口

同埋每次上到車佢淨係喺度同我估iq題

所以就一路都冇問到，

最衰佢又唔係同我同一班

冇得去偷睇佢

跟住落嚟嗰個禮拜二就開始呢個活動，

因為嗰日我放學就去咗樓下買包朱古力奶飲

所以就遲咗入去

一入到去班房，

就咁睇好似得四五個人

因為本身多活動揀

所以啲人其實分得散，

當然啦某幾個熱門活動會多啲人玩啦，

但係桌上遊戲呢啲活動就唔係熱門

所以就唔多人

跟住就出現奇景喇

因為我見到芊靈行咗入嚟

跟住同我視線對上咗

之後就坐我隔離，

芊靈:「你又係呢個學會呀 」

我:「唔係就唔坐喺度啦 」

芊靈:「問一句啫

有個識嘅點都好過冇 」

其實嗰陣我同佢嘅關係都勉強可以叫做係朋友

有時喺學校見到都會點一點頭

多數佢都會帶著微笑嘅

可能佢記得我話過我唔鍾意同人打招呼掛，

又或者其實係唔想叫我啫哈哈

邊度會記得呢啲咁無聊嘅野丫

不過人梗係鍾意諗啲自己鍾意諗嘅野架啦，

常情嚟嘅

我:「係呀

我班啲男仔走晒去打波、踢波同埋砌模型 」

芊靈:「你唔踢波嘅咩

我有時見到你喺學校踢下架 」

唔通我同你講我係想睇住你幾時走先至踢咩

呢啲野點可以俾人知

我:「比班仆街足球隊搶晒啦

好心佢地本身都係足球隊就唔好同我呢啲毒撚爭啦

早知一早去排隊 」

芊靈:「鬼叫你慢

哈哈 」

我:「唔使咁串嘅

咁你又嚟呢度

唔係話啲女仔個個去晒家政嗰邊咩 」

芊靈:「我唔鍾意喺學校煮野食呀

miss好多限制 」

我:「係咪驚你喺度整毒藥 」

芊靈:「有得整我實整俾你食

唔使咁擔心 」

我:「屌

佢唔係淨係得煮野架嘛下話 」

芊靈:「我唔識裁縫架

一樣唔鍾意一樣唔識咁我咪唔參加家政囉

喺度捉棋輕鬆啲哈哈 」

我:「你識嘅咩 」

芊靈:「你真係睇少我 」

我:「波子棋制唔制 」

芊靈:「你大鑊喇我最叻就係波子棋 」

我:「輸咗請野飲

玩唔玩 」

芊靈:「梗係玩啦

反正都係你請 」

我:「就剝你棚牙 」