火花不等人: 火花不等人

「點呀？有嘢想同我講？」並肩坐在涼亭內的長椅上，我率先打破沉默。
「你又知？」
「你額頭寫住『陳政，我有嘢想講』」
「下？有咩？」袁頌婷居然真的以手掌摸一摸自己的額頭。
「我突然間想問你啲嘢。」她續說。
「問囉，你今晚都問足成晚喇大人。」
「我地‧‧‧係咪真係‧‧‧無一齊過呀‧‧‧？」
「‧‧‧無呀‧‧‧真係無‧‧‧無一齊過‧‧‧」
 
換來的又是一輪靜默。




 
「喂，你係咪有嘢同我講呀？」我問她。
「咪講緊囉。」
「你額頭係寫住『有嘢想講』，唔係『有嘢想問』喎。」
「懶醒﹗」
 
回想起由上星期無原無故約我到「老地方」食飯，以至剛才席間的對話，我嘗試找出端倪。
 
快將三十的中女袁頌婷，公司有意派她新加坡發展，但她拒絕了，因為離不開香港。
 




袁頌婷的母親已經移民加拿大多年，年底會回港，探望寶貝女。
 
無甜不歡的她，放棄了餐廳的招牌Tiramisu，為了Keep Fit。
 
又忽然考慮多買一份保險。
 
「袁頌婷」
「嗯？」
‧
‧




‧
‧
‧
‧
「你結婚喇？」
‧
‧
‧
‧
‧
‧
「嗯」
‧
‧
‧




‧
‧
‧
「約我食飯畀帖我？」
‧
‧
‧
‧
‧
‧
「嗯」
‧
‧
‧
‧




‧
‧
「飯都食完，仲唔畀？」
袁頌婷看了我一眼，在手袋中取出一個粉紅色信封，交給我。
 
打開信封，內裡有張婚宴的請帖，封面是米奇與米尼，牽著手在一個心型的框架中探頭出來。
 
「哈，好係你嘅Style喎張帖。」
「嘿嘿~~」
「仲以為，係人結婚，都係响facebook公告天下，我好似唔覺你facebook有喎。」
「都話咗，有咩事，我唔要係响facebook知道，我地要自己同對方講﹗」
「嘩，好感動喎。」真的，很窩心她仍然記得。
「你都係，你結婚一定要話我知！」
「係嘅大人﹗」
我沒有翻開請帖，看過封面後便把她收進信封。




「恭喜晒。」
「多謝」
「你男朋友‧‧‧I mean你未婚夫‧‧‧即係你老公‧‧‧」
「咩呀？講喇！」
「係咪唱歌同你求婚呀？」
「唔係呀。」
「咁你咪好失望囉？」
「低B！不知幾開心！」
「係喎，額頭依家得番『幸福』兩個字喎。」
「邊有呀低B！」口說沒有，但又摸著自己的額頭。
「陳政。」
「咩呀？」
「唱多次歌我聽。」
「依家？」
「梗係喇！」




「痴線！夜麻麻係度唱歌，會唔會浪漫咗少少呀？？」
「This is an order！」
這裡沒有點唱機，該唱甚麼？阿牛？
「求其唱兩句咖渣‧‧‧‧‧‧」
「嗯﹗」
我想了很久，在腦內找到幾句副歌的歌詞，但我不敢繼續望著她唱。 



「滿意未？」
沒說甚麼，她只是用力的點了點頭。
是受到街燈影響嗎？抑或只是我的妄想，我看到她眼中有點淚光。
「我要返上樓喇。」
「嗯」

陪著她走到大廈，站在大門前，我倆隔著一隻手臂的距離，面對著對方。
「喂，陳政。」
「又做咩？袁頌婷。」
「你個心入面圓圈呢？」
「撕咗喇。」
「搞錯呀！邊個畀你撕咖！」
 
我沒有告訴她，在我心裡的那一個角落，在那一次撕下小圓圈之後，流過血，就算結疤後，始終有一小塊肉沒有給修補好，留下一個小凹位。
 
「咁你呢？我懷疑你根本無畫到﹗」我反問她。
「我有呀！」
「咁依家呢？仲係度？」
「‧‧‧我要結婚喇‧‧‧」
對，就在數分鐘前，她給了我，她的請帖。
「係呀‧‧‧你結婚喇‧‧‧」
 
再一次，她伸直手臂，用手指在我胸口畫了一個小圓圈。
「又畫地盤？」我問她。
 
她沒有回話，只是搖一搖頭，笑一笑。
 
然後，她開口問我。
 
袁﹕「你估，如果個次，我唔係走咗去，而係畀你帶我去班房，之後會點呢？」
 
我﹕「嗯‧‧‧‧‧‧咁如果，個日落咗堂，我唔係即刻返HALL，又會點呢？」
 
袁﹕「如果‧‧‧‧‧‧我個晚MSN知道你啱啱散咗，我叫你快啲放低前度，你會唔會呀？」
 
我﹕「如果個日，係Canteen，我真係幫你聽咗個電話，你估又會點呢？」
 
袁﹕「又如果，我唔係放低罐可樂就走，而係等你落樓，又會點呀？」
 
我﹕「如果，你買完麥當奴畀我，我無畀你走，又會點呀？」
 
袁﹕「咁，個次之後，我無失蹤，繼續成日出現係你身邊呢？會點呀？」
 
我﹕「如果我係恒生門口，同Peggy講：『Sorry呀，我突然有事走先。』又會點呀？」

袁﹕「如果Study Period，我搵你陪我搵書呢？你會唔會陪我呀？」

我﹕「如果係維園，我呃你，話我已經放低咗佢，會點呀？」

袁﹕「咁如果個晚我畀你送我返屋企，會點呀？」

我﹕「如果我一早約你過情人節，你係唔係會同我過呀？」

袁﹕「如果我話你知，有第二個女仔煲粥你食，我好嬲，你會點呀？」

我﹕「如果個次我病，有話你知，你會點呀？」

袁﹕「如果我坦白話你知，Peggy話應該同特別嘅人過情人節之後，我希望你會諗起我，又會點呢？」

我﹕「個晚食完飯，我地一路行，如果我拖實你，你會唔會鬆開我隻手？」

袁﹕「咁之後你問我，你仲有無機會，如果我話有，叫你努力啲，你會唔會努力啲呀？」
 
這一段肆無忌憚的反問，一個又一個的假設，一個又一個的如果，通通都沒有答案。
 
「Bye Bye喇陳政。」跟我道別，她轉身步入大堂，一直走，走到盡頭，向左轉，頭也不回。
 
袁頌婷，消失於我眼前。
 
我在大門外，看著她的背影漸變小，到完全消失後，我低頭望著自己的胸口，數著自己的呼吸，細聽自己的心跳，想找出剛才她畫的小圓圈，希望在它仍未刻入得太深之前，把它撕走，但始終也找不到，我才恍然大悟，這個圓圈，不是畫地盤的烙印，而是一個符號。
 
她，為這個故事，畫上了一個句號。

這個故事，已經畫上句號。