火花不等人: 週末過後

接下來的週末，我如計劃般陪老媽子飲茶，然後去自修室溫書，多得Michelle，給予我一個專心溫習的原因。有把握的科目先不理會，將中學時沒有接觸過的幾科主修課處理好，由開始翻閱參考書、筆記，慢慢重拾大半年前讀書的幹勁，現在我需要的，就是這種幹勁，把專注力放於課本上，為了不受干擾，連手機也沒有跟身。

這個週末，很充實，全靠Michelle。本來有點懶散的我竟然很專心去溫習，為的就是淡化Michelle，但每每當我很順利地完成某一個課程的章節，心裡又會有點感激Michelle在她自己也不自覺的情況之下給予我動力，這又是另一個沒完沒了的循環，這種無法斷尾的困境讓人很灰心，令我在完成一整天的溫習之後所產生的成功感打了個折扣，畢竟我真正的目標不是溫習，我只想有其他的寄託，但辛苦了一天後，學業上我有所進步，但情感上我又返回起點。

生活照常地過，而我跟袁頌婷的距離，自這個週末過後忽然莫明奇妙地拉遠了。

「食唔食飯？」
「天地堂呀，有咩做呀？」
「喂我想去又一城行下。」
「有無興趣落下旺角呀？」




「睇唔睇戲？」

我們自互傳短訊開始，諸如此類的問題令大家差不多隔日就會見面，但突然我們都原因不明地停止發出這種邀約的短訊。

星期一早上的堂，我繼續坐在牆角的位置，但Peggy及袁頌婷掉換了座位，我上堂見到的只有她的後尾枕，更沒有寫memo紙了。

而小組功課經過頭幾個星期的分工後，已變成各自回家負責自己的部分，然後在就用上課時放Break的時間簡單交流一下，再沒有開會的必要。連原本星期四的宵夜時段，都因為補習時間改為每個星期六而取消。

我跟袁頌婷之間又再倒退至只剩下虛擬的互動，由立體變回平面。





「你同Chloe好嗌交呀？」在圖書館，Peggy問我。
我依然有幫Peggy補習Accounts，其實也說不上補習，只不過是一同溫習，協助她弄清一些她未能完全掌握的概念，簡單而言，Peggy已經有能力拿下80分，但她想取得90甚至滿分，我幫她一把而已，有時甚至反過來是我從Peggy的問題中有所學習，經過了A Level，我見到Balance Sheet就想嘔，如果沒有跟Peggy一同研習的環節，就算Account是我的主修課，可能我也不會有心把這一課研習得如此深入。

「下？無呀，無端端嗌咩交呀？」
「早兩個禮拜，個朝佢話無帶Con想坐前一排就同我調咗位，之前就一直坐落去。」
「嗯‧‧‧以我所知‧‧‧佢無近視‧‧‧」我開始懷疑星期四晚的補習時間根本沒有改。
「噢，咁好明顯你地真係嗌交，係唔係耍花槍呀？你地都唔係一齊咗好耐，應該仲係好Sweet咕喎。」
「下？耍咩花槍？我地幾時話我地一齊？」
「乜唔係咩？」Peggy這問題比Accounts的問題更難答。
「邊個講咖？」




「Alex。」當時我心裡又多個疑問，Alex跟Peggy之間還有溝通？
「無端端佢做乜同你咁講呀？」
「佢‧‧‧」Peggy欲言又止，「佢成日約我去街，跟住我頂唔順咪問佢﹕『乜你唔係追緊Chloe咩？』佢就話Chloe話佢知已經同你一齊，佢無機會咁話喎。」
「咁得意？哈，我估係Chloe(人前我不會稱呼她全名)係搵我嚟擋，又唔同我講，轉頭我會話佢咖喇，哈哈。」
「哦，咁‧‧‧即係‧‧‧仲有機會‧‧‧」
「下？」我有無會錯意？
「I mean‧‧‧Alex仲有機會‧‧‧」原來我會錯意。
「哈，I don’t think so。」
「哦‧‧‧咁我呢‧‧‧？」我有無會錯意？