火花不等人: 報平安

「你又走堂？」第二日早上我被剛回來的室友嘈醒，似乎他昨晚都不在。
「幾點呀依家？」
「12點幾就嚟1點，嘩你對眼咁踵嘅？」原來已經不是早上。
「今日休息一天。」
「有前途呀你。喂你部電話擺係地下係咩意思呢？吸地氣當差電呀？」
花盡九牛二虎之力把電話執起，九個未接來電，二十六個SMS，當中除了一個是阿媽，其他全都是袁頌婷，反映出我的世界只剩下這兩個女人。
相當不孝的我沒有首先給阿媽回電，便直接致電給袁頌婷，但一接通便馬上斷線了，然後收到她的SMS。
「你終於出現喇！！無事嗎？我上Lecture，落堂打畀你。」
「我都只係想同你報個平安」
「你喺邊？」




「床」
「真係好平安喎，我一半落堂，落唔落嚟同我食Lunch？」
「是日休息」
「咁都要食嘢咖。」
「瞓醒先算」
「咁我買嘢上嚟畀你食。」
「THX」「喂，你‧‧‧等陣出唔出去‧‧‧？」我問室友。
「四半先有堂。」
「會唔會‧‧‧考慮早少少‧‧‧落去食個飯呢？」
「幾點呀？」




「如果‧‧‧半個鐘頭後出發呢？」
「嘩，食個自助餐都得喇！」
「都好喎。」
「睇下點喇。」
這等於應承了，男人跟男人之間在這方面都很會互相體諒。

我跟室友有個機制，如果其中一人想暫時獨佔房間(一般是為了靜靜的思考人生)，就會在房門外掛上我們預先準備好的計時器，即平常在田徑比賽中計時人員用的那一種，見到計時器在掛著，表示房內的人不便被打擾，計時器上的時間，代表著房間被佔用了多久，我們同意一旦超過了30分鐘，在房外的一方就可以內進了，畢竟花上半小時去思考人生未免太累，作為室友好應該提醒對方稍作休息。如果要帶同其他朋友一齊思考人生，我們會提早知會對方，大家有商有量，相當和諧，過往都是室友提出要我避席，今次是我第一次請他讓一讓。

半小時左右，我便起床去梳洗。城大宿舍是兩間房共用一個衛生間，所以衛生間內有左右兩度門，亦即兩間房是可以透過衛生間連上，偶而一次忘記帶房門匙咭，都可以透過隔離房進入，再穿過衛生間回到自己的房。





當我在面盤上刷牙之際，室友推開門，本身沒有問題的，男人同男人之間基本上沒有敲門的需要，但當我望過去的時間才發覺門外還站著多一位客人。

「喂，有人搵你喎。」我知，見到。

我呆呆的望著手持麥當奴外賣袋的袁頌婷，她則望著只穿背心及孖煙囪、一口都是牙膏的我正在刷牙。

==========================================================

「其實我第一次見到周秀娜本寫真我有諗起你。哈哈哈哈哈！」
「真係與有榮焉喎大人。」