[新手][愛情][排球]那天我成為女之後 我的人生不再一樣: 52.季軍戰
同Eva傾完成晚，咁我都係係床度諗緊成件事，老實講我真係唔係好信係我好姊妹出賣我，但另一方面又覺得係女既圈子入面，真係冇咩係冇可能。
係依個假，我都係係度hea左佢就算，一黎我都冇咩心情周圍去，二黎都冇一個我想既人陪我周圍去。其實我係依個時候係度諗，做女……真係咁好咩？的確，係有男既圈子入面，做唔錯既女都已經係好好既事，靚女就唔洗諗添。曾經係男既我，都好老實講，見到都叫唔錯既女都會可能想做下狗公狗衝下，得就搵到個伴，唔得咪做個朋友咁，靚女更加係成日都係望，仲會想撩下佢啦係唔係先？就係有依樣好，不過撩佢，咪又係因為佢係靚女，想入下佢個系姐。講就咁講，但係男既時候，一齊有講有笑，即使唔太friend都會有野講下咁，但做左女，的確其他女都係會同你講野，但就係會feel到佢地其實係唔會想同你交心，只係應酬式咁，心計Ｄ講就係儲friend，之後有男為識我，就撩佢，Ｄ男毛知冇機，佢地可以趁機發功，不過講到尾，都係我做左女之後既諗法。
到星期一返學，我返到去，大家都係面左左咁，無論同同學，或者Ada......其實我同Ada搞成咁，我唔可以怪曬其他人，自己都係有Ｄ唔岩，我真係覺得，好可惜，而且有Ｄ心痛，個感覺真係好複雜
咁今日都係過得好平凡，都係上下堂，小息自己過，到食飯時去同Michael去食，到放學都有去練波，因為黎緊星期六就學界季軍賽，所以我都想練多Ｄ波，當為自己最後一年打到學界拎返塊甲組季軍既牌又好，為自己學校隊波又好，都想係離開依間學校前，為校拎牌。
到放左學，我就決定唔去更衣室拎換衫，因為我都費事同佢地同一個地方換衫，雖然明知就算換衫唔對住佢地，但一陣到打波時都係要對住佢地，但就係希望可以對小一秒得一秒，可能令個尷尬氣氛既時間降低…..
我就係殘廁度換完衫，跟住就行左落去，去到之後大家都係用返一種厭惡既眼神望住我，都係只有Eva同我一齊猜下波咁，基本上今日練波都係咁，到開game對打時，我都係被Miss分返去主力果team度打，但老實講成場都係食曬屎咁，一黎我冇咩心情打，二黎因為同佢地好似唔係好夾到咁，所以今日既練波唔知練咩咁。
到完左練習之後，我都係一個人咁返去就算，慢慢咁係條路度行，我就一直係度諗點解要比全級杯我。
返到去之後，我都係係房入面困住左自己，都冇話出過房，係到食飯既時候先出黎食，呀媽都有問我係唔係有咩事，我都只係同佢講話依排教既野都好難，要放多Ｄ時間落去咁。
跟住落黎果幾日放學既練波，都係同星期一咁，都係唔係好夾到大家，唔係唔肯set個波比我，就係尷尬位失分，完完全全發揮唔到我地team應有既水準，基本上只係靠佢地五個人既力量去應付咁……
去到星期六果一日，因為其餘賽事都完曬，得返冠軍戰同季軍戰，而冠軍戰通常都係壓軸，所以季軍戰往往都會打先。
咁我就當然早小小黎到，一黎可以調整下心情，二黎就係因為同佢地反左面，所以依加都係得自己一個人，所以中意去邊，幾時去邊，都係自己一個，唔洗搵其他人陪。所以我就決定早小小出門口，黎到坐陣，希望可以將自己既心情調整好就等開波，同埋見時間差唔多我就去換定衫等下。
換完衫過左一陣，自己就係一邊拉拉筋等下佢地黎到，拉左無耐，佢地都紛紛黎到，咁我見到佢地到都冇理，繼續拉拉，拉到差唔多，佢地都開始拉筋準備，咁我就行過去放好個人物品之後，再郁下個身等佢唔好凍左落黎。
佢地拉完筋，Miss都到左，之後望望我地，叫我地放開Ｄ打就可以，同埋亦都講話，叫我地唔好放私人恩怨係場上，拎季軍拎殿軍都係同佢無關，話我地小甲係最後一年打，話我地學制由CE/AL改左做DSE，原來７年中學生涯改左做６年，而公開試既果一年，學校係禁止學生參與任何課外活動，所以中五會係新學制底下既最後一年可以參加學界。
講完之後，叫我地放低對大家既成見，開開心心打埋中學生涯最後一場波，咁我地都「嗯」一聲和應完，就聽Miss講下今場想我地點打，然後Antonia行出去等擲公字，我地就預備猜波開波，最後我地係先發隊，咁我地就快快手開始猜波，開波同殺波。今日都好似好Ｄ，因為都會Set一D比較好既波比我殺。
「咇～～～～～～～～～～」哨子聲一響
然後我地就行出去，都係以正選既首發陣容出場。對手係區內既中游球隊，以我印象中都係一Ｄ平平均均既球隊，但不過上到黎爭得冠亞季，我諗都唔會差得去邊，我都提住自己用警惕Ｄ既心去面對。
咇！
Antonia首先開波，個波都不偏不倚落係對方既１號位，但對方都係好似有備而戰咁，接得好好咁傳比Setter，然後set起………
呯！
一下殺左落黎，個流暢程度係非常好，我地六個人都呆左望住個波，睇黎依場季軍戰唔係我諗得咁易打，應該會係一場硬仗。
我地望向岩岩殺波果一個中槌，佢望住我地，然後嘴角上揚，掛住一個高傲既笑容，再報以一個恥笑，好似講緊我地會敗係佢手上咁，似乎佢係前排既時候，殺波唔會係咁易。