[新手][愛情][排球]那天我成為女之後 我的人生不再一樣: 35.平行世界
因為岩先打完八強，但離四強既時間仲有，所以Miss今個星期都叫我地休一休息，唔洗操得咁密，所以今個星期都係練兩日波，其餘時間都放比我地抖抖。
咁經過Antonia上次既「悉心指導」，咁我開始都多左同其他撩我講野既人講下野咁，雖然都唔係咁慣，但當係hi bye friend咁吹幾句水都冇壞既，同時都有Ｄ人問下我放學得唔得閒，不過我覺得岩先同你傾左幾句計就要同你出街又好似唔係咁好喎，一陣冇咩野講咪好尷尬，加上都係果個原則，主力了解幾個既原則，其餘既，希望你等到我理你理得多Ｄ啦，嘻嘻。
咁依幾日返學都冇咩特別事發生，都係咁，話咁快去到星期五晚，Aaron話已經買左飛，佢買左１１點幾果一場既那些年，話買早場雖然平，但驚我太攰所以買晏小小，等我訓多陣咁話，嘻嘻，聽落好似幾細心，但慌佢唔係自己都起唔到身，所以先買依個時間咩。
去到星期六，咁我就十點左右就起左身，之後梳一梳洗之後就去換件衫，咁既然係同男仔出街，加上天氣仲未涼，咁我著左件白色既衫，邊位就有要要皺，類似花圍咁，然後著左條遮到大半條大脾既黑裙，加埋對黑色既波鞋就出門口。咁我落左去買左個包食，咁邊食邊行去搭車去戲院。
講起戲院，相信大家都聽講過巴倫紐同凱都兩間戲院，兩間係大西北黎講都係Ｄ比較平既戲院，咁作為學生既我地，當然去睇依Ｄ廉價既戲院啦。老實講，你要求唔高既依兩間真係冇問題架。
咁講返，Aaron今次約我係去凱都度睇，咁我就去到凱都既時候，已經見到Aaron企左係門口等緊我。咁我就慢慢行埋去
「Hello。」我笑一笑講
「Hello呀呀潔，你今日著得好靚。」Aaron講
「邊係呢，嘻。」我答，女仔比人讚佢靚真係會好開心，本身都想化個淡妝，但我都懶，所以最後都係冇
「我買左枝水比你，同埋你食唔食爆谷呀，我依加買。」Aaron問
「呀……」我都未答佢佢已經一枝箭衝左去小食部度
過左一陣佢就拎住左一大盒爆谷返左埋黎
「拿，爆谷呀，可以入場架喇。」Aaron講
「好呀，我幫你拎盒爆谷啦。」我講
「唔洗啦，依Ｄ野等我黎得啦。」Aaron講完，我笑一笑就冇理佢，就同佢行去入場
「飛丫唔該兩位。」職員問
「呀…..」Aaron一手拎住爆谷，另一隻手係度摷下張飛
「你放左係邊呀？我幫你拎喇。」我問
「褲…褲袋銀包入面。」Aaron講
咁我就伸手入佢褲袋拎啦，唔知佢做咩係我伸手入去佢褲袋時震左一震……咁我拎完佢銀包出黎我就搵下，原來佢同Ｄ銀紙一齊放，咁拎左飛出黎之後我就幫佢放返好個銀包，佢講左聲唔該咁我地就行上去喇。
咁我同佢坐低左，佢買左都比較後既位，好彩，都驚佢買左Ｄ前既位睇得好辛苦。跟住佢問我去唔去廁所咁，我叫佢去先，咁佢去完跟住到我，返到黎之後好快就開始喇。
（那些年既野我唔多講喇，想知就自己上youtube睇啦。）
睇完之後Aaron問
「你覺得點？」
「唔……ＯＫ啦。」我答
「你覺唔覺得好可惜？」Aaron再問
「可惜？」我問
「係呀，最後佢地都係唔到一齊。」Aaron講
「都係架，咁都係男主角既問題姐，如果佢識珍惜既，咁就唔會有之後既事發生啦。」我望住個天講
「但亦都有人話，佢地係第二個平行世界入面相聚左。」Aaron講
「平行世界？」我好奇問
「係呀，冇聽過？」Aaron問
「冇呀……」我無奈咁講
「姐係意思其實係另一個相同世界，但就我地現存既世界同果一個世界就一樣，但發生緊既事就唔同。姐係好似戲咁，現實中佢地最後係冇係埋一齊，但平行世界度，就已經一齊左。」Aaron講
「唔……但就係可惜既，有情人未能共諧連理。」我講，突然比Aaron一言驚醒洛克人！
「？做咩呀，諗緊咩呀你？」Aaron問
「冇…」我講
「係呢，咁我地行個圈，再去食Ｄ野？」Aaron問
「可以。」我講，但我心已經係想快Ｄ問Professor Lai野
咁我地一路行，Aaron就一路係度講對套戲既睇法，佢既愛情觀咁，但一早靈魂出竅既我都冇心聽佢講，之後我覺得有Ｄ餓就同Aaron講話不如食小小野先，咁之後我地就去左屯市度搵小小野食，最後我地食吉野家，咁係佢買野食時我都係咁係度諗緊平行世界既事。
「做咩係度發呆呀？」Aaron問
「冇…冇呀。」我講
「買左野食返黎喇，食野先啦。」Aaron講完遞左碗牛肉飯比我
一邊食我就一邊諗，突然Aaron又問
「係呢，不如一陣食完去一去海邊？」
「好…」我講
「慢慢食啦。」Aaron笑笑講
咁食完我同Aaron又再慢慢行，全程都係Aaron佢講野多，我就繼續諗緊我既事，途中Aaron都有問我係唔係攰咁，我都擰擰咁就算。
行左一個鐘左右，去到屯門碼頭個海邊，我地再慢慢行入去，我見到都好多情侶拖住手咁係海邊行，心諗唔知Aaron打咩主意，但我依加又冇咩心情理佢，所以佢想去邊咪去，當陪下佢咁啦。
行到去最出既位置，我地兩個並肩挨左係鐵攔度，吹住海風，過左一陣Aaron問
「Katrina你覺得我點？」
「下？……」我問
「其實我好開心，我約左你咁耐你終於都肯同我出街。」Aaron講
…..
「以前約親你都話單獨唔係咁好，到你有左Patrick依個男朋友，我就更加冇機會。」Aaron再講，我心諗你唔係表白掛，雖然我都知你對我點
「唔……」我講
「但你今次又會同我出黎。」Aaron講
「因為我都想睇下戲既。」我講
「以前約你你都要一大班，依加可以同到你睇，我真係好開心。所以我真係想知我係你心中係點。」Aaron問
「你覺得呢？」我反問返Aaron
「其實我覺得你可以比個機會我地。」Aaron捉住我雙手講
「其實我未Ready。」我輕輕將雙手係佢手中抽中
「我可以等！」Aaron講
「我唔知你會等幾耐。」我擰一擰個身望住個海講
「唔緊要，我點都會等。」Aaron講
「其實你好好，我唔值得你等架。」我講，依刻我唔係話想收兵定點，依刻我係唔想hurt到佢。加上又係friend，如果有咩又會面左左，而且我都未知自己想點，所以講Ｄ無稜兩可既頂住先。
「唔會！你值得架！」Aaron好激動咁講
「點都好，我會等到你覺得合適架！」Aaron再講
「你比起Patrick真係好好多，但希望你明白啦。」我講
「明白！」Aaron講完又望住個海
兩個人咁吹多陣海風，之後我就話攰，想返去，最後Aaron係都堅持要送我返去，咁比佢送到附近我就話到，我自己行上去可以，咁樣Aaron先肯走，最後我就慢慢咁返返上去。