[新手][愛情][排球]那天我成為女之後 我的人生不再一樣: 32.昔日眼中的Antonia
「你好呀，你咪係上次係我地學校打Friendly果個女排？」個男問我
「下？」我講
「上次係輕鐵站呢，搵你拎電話果個呀……」佢講
「…….」我真係諗唔起
「拿。」我就拎左電話出黎，再開返Whatsapp個Chatroom出黎
我一望我先諗返起，原來係果個追到出輕鐵站，樣正正常常果個！
「呀！諗起喇……哈哈」我尷尬咁笑
「記返起喇，唉，搵你你又冇覆我，但見到你Whatsapp Icon又係你，心諗你應該冇比錯呀...」佢講
「其實我唔係成日睇電話既，所以...哈哈，咁我應承你多Ｄ睇電話好唔好？」我對佢單單眼咁講
「好呀，咁我等你電話喇！」佢講
「好呀，今晚搵你啦，但你搵多我一次先啦，有時都有人搵我我分唔到呀～」我講
「好呀，我電話同你講埋我叫咩名啦！」佢講
「好啦，咁我等你電話先啦。」我報以一個微笑
「其實咁岩都係度撞到，我都費事阻住你地傾計喇，咁今餐我既。」佢講
「唔……」我都未講完Antonia咁拉拉我
「咁邊好意思呀！」Antonia講
「唔緊要啦，請兩位靚女食糖水，榮幸黎既。」佢講
「咁多謝你喇，係唔係呀呀潔？」Antonia問我
「呀…多謝你先喇。」我講
「唔洗客氣啦，下次見啦。」佢講完就返返去佢果邊，眼見佢果枱既男見佢返黎時，佢地個樣真係好葡萄咁，可能葡萄佢會識到兩個靚女啦
「喂掂喎呀潔，學到野喎！」Antonia講
「下？！」我真係一頭霧水
「你頭先咪應承佢搵佢多Ｄ，拿！就係要依Ｄ喇！」Antonia講
「……」我仲唔太明咁既樣
「你真唔明定假唔明呀？姐係你同Patrick一開始時，如果佢同你講話，應承你以後搵你多Ｄ，你咩感覺？」Antonia問
「爽皮囉。」我講
「係囉！咁講完，雖然你會搵佢，但你對佢係冇感覺既，你做到好似對佢有感覺，但事實上係冇既，咁就掂啦！」Antonia講
「！！」
「睇你個樣似乎領略到Ｄ野咁喇喎。」Antonia講
「嗯……都係既」我講，我諗返起我仲係男既時候，Antonia係點……
「係呢，都食完喇，咁…..不如去搭車？」Antonia問
「……」我仲係度遊緊魂
「呀潔！呀潔！」Antonia叫
「下？！」我問
「你做咩係度遊魂既？」Antonia問
「冇呀，諗緊Ｄ野姐。」我講
「返去先諗啦，去搭車喇。」Antonia講
咁就同Antonia佢行到車站，咁我就同Antonia講話兜多個圈先，Antonia都冇阻止我，咁就佢去左搭車，我就繼續行。
我就開始諗返起我男時既Antonia……
中一女排首個練習日，因為我比Carson拉去睇女排而見到Antonia，之後就係因為大家都係小丙，所以就會一齊練下波，咁就因為咁所以同佢識左，雖然Ada佢地都唔差，但由我見到Antonia第一眼起，我個腦就得Antonia，都冇留意過其他女。但當時我就只係同過佢講幾句野，都冇話深入了解。
到中二頭，因為想試下追佢既關係，咁我就左問右問之下拎到Antonia既MSN，咁就每晚都會MSN下佢，但佢又好似唔係晚晚都On咁，有時我都會問下佢點解唔可以晚晚都On，咁Antonia都只係話唔係好得閒，而我果時都覺得冇問題，因為Antonia同我一直都係讀緊精英班，忙係唔出奇，因為知道教精英班既老師會覺得精英班既人係任勞任怨，會痴左線咁比功課學生。但唔知點解，我同佢永遠就唔會同班，真係好巧合。
就係咁，到中三時Antonia就更加小On MSN，之後就直頭冇On過，隨左打波同返學之外都冇咩見過Antonia。到中三下學期時，Antonia就有大約一個星期都冇返學，好似冇人知咩事咁。
之後有一日Antonia終於返學，我忍唔住就走左上去問佢咩事，但Antonia就好似比我嚇親，就話冇咩野就行開左。過多一排，我見佢又有On返MSN，咁我就問佢咩事，Antonia就話冇咩事，都係屋企既事，仲問我電話號碼幾多？咩台咁，問我會唔會SMS，女神問得既就當然比佢啦，就係咁就比左佢喇。
無耐考試時Antonia仲問我一唔一齊溫書，咁女神問到當然一齊，咁係佢溫書時，有時都會問下野，講下野咁，唔知係唔係之前冇咩留意啦，Antonia講野個Tone原來係好吸引，亦都好吸引我去聽。
考試之後Antonia有約我出下街，我有時都有約佢，佢都好欣然接受。成個暑假就係得閒打下波，打下機，同久唔久搵下Antonia。果時既我已經覺得係差我既一個表白，就可以將Antonia攬住。
但唔知係唔係之前被興奮蒙蔽雙眼，中四時我就開始都發覺Antonia係會同其他男既會有來往，但果時既我都只係覺得正常社交。有時Antonia都會約下我食飯，咁同佢食完飯，我都覺得請女食飯係應份，就每次都係我比。
到中四果年聖誕，咁果時我見儲到小小錢，我就打算買份聖誕禮物比Antonia，咁我千揀萬揀，最後揀左手袋仔。然後就約Antonia過聖誕，但Antonia話果日約左人，得朝早可以，問我得唔得，身為小毒毒既我就當然都照狗衝啦。
到左聖誕果日，我就拎位份禮物，見到佢時比左佢，佢都比左份禮物我，但就只係細細盒。咁佢問我拆唔拆得，咁無理由拒絕既，而且我又想睇下佢開心既樣，之後見拆開左，見到佢都笑左一笑講多謝。果晚返到去我拆佢果份禮物，原來就係朱古力黎，搞到我Sad左一陣。
到我臨訓前再睇睇Facebook，我見到Antonia update左，咁一望，有張相，下面寫住「識你咁耐都係第一次收你禮物，同你既感情已經昇華到比男朋友更重要，希望每年都有你一齊陪我過依一個聖誕」，相上面仲Add左我個名上去。
咁小毒毒既我就當年扯到痴左線，係屋企度跳黎跳去，好似已經同左Antonia一齊咁既款。
咁之後我都有Keep住同Antonia SMS。到左我生日前，我就約左Antonia佢同我過，咁岩佢話果日可以，咁我就計劃同佢表白。到最後點……當然係一句「我覺得我地依加咁樣既相處係最好」黎拒絕左我。但之後又會繼續搵下我，一齊食下飯咁。
到我升到中五時，係同呀潔交換身份前，Antonia係我心目中，都仲係一個冰清玉潔，完美既女神。