香港殺入世界盃（尼馬故外傳）: 第八十八章（最終回）

88）兩年後，我宣佈退役，結束十八年的職業生涯。

新香港大球場，這天星光煜煜。

「歡迎各位黎到新香港大球場，我係體育世界主持人鍾女，今日為你直擊報導風之子李文翰既告別紀念賽。」

「gary！我地唔捨得你呀！ 」
「風之子！！風之子！！ 」

「如大家所見，大球場今日人山人海，我身後既球迷著住gary多年來唔同球隊既戰衣，有賓菲加﹑利物浦﹑貝迪斯﹑黃大仙……懷著不捨既心情，送別呢位香港足球既象徵人物。」




「八萬張門票早就售罄，今日既紀念賽由香港足總同利物浦聯合主辦，對賽雙方為『亞洲明星隊』同埋『利物浦名宿隊』，所有隊員均為gary既昔日戰友。上半場gary會重披利物浦球衣﹑下半場則改為『亞洲明星隊』上陣。」
「gary半生傳奇，最終選擇返黎自己成長既地方結束球員生涯。多年來，佢同唔少偉大球員做過隊友，我地一齊睇下佢地有咩同gary講……」


獵豹阿祖安奴：「衷心祝福你！日後教練場上見！」
香港新人王梁令德：「冇你，冇今日既德仔！」
日本美斯本田佑一：「永遠唔會忘記悉尼青年軍既歲月！」
澳洲隊長積唐寧：「仲記中學時期俾我撞到一仆一碌嗎？」
前賓菲加及利物浦主帥謝菲斯：「歐聯冠軍﹑英超冠軍……我地一齊開創無數歷史，多謝你gary。」
九尾狐狸比爾森：「salute！墨爾本之夜令人難忘！」




神童史達克：「人生最難忘既，係同你一齊高舉英超冠軍個日！」
球王傑高：「老友！你先係真正既『飛兒』！」
圓月彎刀戴利：「如果你係女人，我地可能會結婚！哈哈！」


「WTF！戴利講野幾時變得咁嘔心！」我指著螢幕笑罵，卻不知這是戴利妻子的主意。

無論如何，細閱一班昔日戰友的窩心訊息，我鼻子一酸，在更衣室哭了出來。






「真係最後一場了……」


我拭乾眼淚離開更衣室，最後一次以球員身份從大球場通道步出。
 
 
 
 

「歡迎各位球迷黎到風之子紀念賽！今日所有既門票收益，將會撥入gary既兒童基金作慈善用途。」
「比賽即將開始，我地一齊睇下對賽雙方既出場名單。」



亞洲明星隊




GK－美拉（牛油手）（墨爾本）
DF－傑森（青聯六子）﹑積唐寧（青聯六子）﹑高尼路（香港）﹑胡仲光（香港）
MF－劉尚發（香港）﹑李翰林（香港）﹑本田佑一（青聯六子）﹑戴利萊爾（墨爾本）
FW－比爾森（墨爾本）﹑梁令德（香港）
領隊：積甸拿克


利物浦名宿隊
GK－高洛斯
DF－阿歷山大阿諾﹑奧斯卡丹尼士﹑雲路圖﹑李安曉士
MF－李文翰﹑傑高（飛兒）﹑基伯利﹑史達克（神童）
FW－史科斯（阿史）﹑韋赫特（比利時黑將軍）
領隊：謝菲斯







紀念賽的卡士直迫當年巴塞訪港，雖然觀眾席上大部份球迷乃為我而來，但眼前盡是栩栩如生的天王巨星，內心的興奮難以筆墨形容。

嗶！


「gary！gary！ 」

我的職業生涯最後一戰，正式展開。
 
 
－－－－－－
 

噠噠……




噠噠……


輕鬆愉快的氣氛之下，我努力享受著每一分鐘﹑每一次觸球﹑每一腳傳球及射門，這些將會通通成為回憶。


嗶！

「十二碼！」


比賽最後一分鐘，亞洲明星隊獲得十二碼（神童故意在禁區內絆倒托里斯），焦點立時集中在我身上。


「gary！gary！」




「去去去去！！！ 」


比賽勝負無關痛癢，但球迷歇斯底里的吶喊喝采，使我憶記起兩年前的世界盃。


噠噠……啪！


我踏步上前，射入最後的入球，比賽亦隨即結束。


嗶～嗶～嗶～～

亞洲明星隊6－5利物浦名宿隊FT





熱烈的掌聲之中，我看見粉絲們為我設計的巨型橫額，除了口號之外，還附上一幅crossover我和＜風雲＞角色聶風的漫畫，氣勢磅薄。


「恭喜你，gary！」體育世界女主持鍾女向我遞上咪高峰。
「喺呢個特別既moment，你有感言同大家講嗎？」
「嗯……多謝大家。」


平時說起道理來滔滔不絕，此時面對隊友及球迷的萬千寵愛，卻說不出半句話來，淚水再一次不受控制，奪眶而出。
 
郭嘉諾先生正式回到體委會工作，我順理成章接任黃大仙領隊一職，並決定報讀教練課程，將來繼續留在足球界打拚。

港超聯球季未開始，我決定先給自己一個假期，到加勒比海地區旅遊一番，享受一下陽光海灘。

啟程回香港前，我還有一個中點站－巴塞隆拿。


 
－－－－－－



「歡迎收睇體育世界，繼續由鍾女為你地報道足球消息。」
「梁令德轉會西甲班霸巴塞隆拿即將成為事實，交易轉會費達到3000萬歐元，另設附加條款，巴塞來季每贏得一項錦標，西維爾將會額外得到500萬歐元既add on fee。」
「據報德仔將於今日稍後時間到達巴塞隆拿，只要傾妥個人條款，交易便告完成。屆時，佢將會同日本國寶太空翼，組成亞洲鋒線。」
「雖然未正式轉會，但德仔既巴塞隆拿球衣已經喺市面偷步發售。知情人仕透露，德仔將會穿上巴塞既11號球衣。」


飛機降落於巴塞隆拿機場，我立即收到伊利先生的短訊，告知我轉會手續順利完成，德仔正式轉投巴塞隆拿。

離開機場直赴魯營，但見德仔容光煥發，能夠加盟「地上最強」，是每位球員的夢想。

應該說，看見香港球員加盟世界頂尖勁旅，是每一個香港球迷的願望，包括我自己。


「估唔到我既兒時夢想，居然由你實現。」我感慨萬分。
「我一定會努力，唔會辜負大家對我既期望。」德仔道。
「我知道你會，由第一次喺斧山道睇你踢波，我就知道你成就必然非凡。」
「唔單止我，」德仔道。
「發仔﹑光仔﹑仲有所有隊友，都會竭而不捨，將香港既足球力量傳遍世界各地。」


經過三年前世界盃的洗禮，一眾香港年輕小將的際遇各有不同：表現搶鏡的發仔由奧地利轉往德國效力下游球會紐倫堡；光仔繼續留在澳職聯，隨領隊戴利萊爾一起轉投布里斯班獅吼；另外陳俊傑﹑謝家豪等世界盃功臣，亦相繼出國效力。

至於德仔，加盟西維爾後憑出色表現站穩球隊的正選前鋒，並連續兩年造出「雙十」成績，引起巴塞隆拿的注意。「地上最強」繼太空翼之後，再次簽入亞洲球員。
 
 
「你睇下魯營景色幾靚。」我指著天空說。
「同自己講，你要喺呢片天空之下，建立起自己既王國。」
「嗯，我一定可以。」德仔仰望宏偉的魯營，準備迎接足球生命的高峰。




八月二十二日，德仔首度披上巴塞球衣出戰馬拉加，再次引起全城瘋狂。


「德仔千秋萬載，一統江湖！」
「萬歲萬歲萬萬歲！！！」


球迷設計的口號愈來愈別出心裁，德仔在香港的地位便如太空翼在日本一樣，屬於「國寶級」人馬。這夜，萬千市民透過電視觀賞西甲直播，有的什至遠赴巴塞隆拿，即使未能成功購票入場，也要在球場外酒吧的電視上，近距離見證歷史一刻。


噠噠……

「你睇，德仔出場啦！」


場內，坐在我身旁的是里香﹑德仔媽媽及伊利先生。當見到德仔脫去衛衣準備入場，心情頓時緊張起來。


「78分鐘，巴塞隆拿作出換人調動，由11號梁令德入替2+8號太空翼。」

「搞錯呀，竟然入替我哥哥！仲諗住睇佢地合作踢雙箭頭……」里香不悅。


那邊廂的香港，電視傳來的畫面亦叫球迷雀躍萬分。

「梁令德戰無不勝﹑攻無不克！ 」
「雄姿英發，彎刀銀靴，談笑間，強虜飛灰湮滅！」


噠……

身披舉世知名的紅藍戰衣，德仔上場後第一次引球推進，我有一陣莫名的感動。

2047大限將至，香港的前景仍然充滿變數，令人感到欣慰的是，我們還有足球。足球可以捍衛民族尊嚴，能夠團結人民力量；香港足球隊的世界盃故事，勉勵香港人即使面對著打壓，依然要保持希望，勇敢面對。

德仔的成功只是開始，我深信，香港足球必定會有遍地開花的一天。