香港殺入世界盃（尼馬故外傳）: 第六十章

60）德仔忍俊不禁，兜了這麼一個大圈，原來她想自己邀請她一同到南美洲。

「咁就奇怪喎，」德仔道。
「妳貴為日本國寶既親妹，想去睇世界盃都要搵我呢個外人？」
「我先唔會求佢！」里香不屑。
「日本人一向經濟獨立，何況哥哥一直反對我花錢遊歐洲學外語，成日話女仔應該安守本份留喺日本生活……哼，佢自己生活就多姿多彩，我就要留喺度相夫教子？」


德仔想不到太空翼貴為國際球星，卻有著日本重男輕女的迂腐思想。






「我已經請左假買左機票，聽日同你一齊返香港。」
「上次喺香港玩得唔夠盡興嗎？」
「玩？no！」里香搖頭。
「做得你助手，當然要入場支持香港隊啦！」
「難道妳唔支持日本，要做『日奸』？」
「日本我當然都支持，到你地真係有機會同我哥哥碰頭，先再諗支持邊隊吧！」


這句話帶有微微的輕視之意，似乎在暗示香港難有在世界盃挑戰日本的機會，但德仔當然不敢責難里香。






里香笑問：
「你係香港『民間特首』，返到香港機場一定好多記者，唔怕俾人見到我地一齊？」
「又唔係唔見得人既野，我不嬲都唔理佢地（記者）。」德仔道。
「反而係妳，香港依家局勢仲未穩定，妳肯定要跟我返去？」
「有咩好怕？你地第一次參加世界盃氣氛一定好好，我正想感受一下。」
「好，明日出發。」德仔微微一笑，有里香作伴，心底還是歡喜的。
 
四年一度的足球氣氛蓆捲全球，不穩定的足球政治，卻不止於香港發生。





距離世界盃揭幕還有二十日，主辦國之一﹑熱門球隊阿根廷，在此時發生兵變。
 

「突發新聞：阿根廷足總今早宣佈解僱少帥莫路伊卡迪，由全無執教經驗既球王美斯，接任領隊一職。」
「是次政變既原因，據報係由於美斯暗中慫恿國家隊成員向阿根廷足總迫宮，加上其早年同伊卡迪有牙齒印，傳聞甚囂塵上。」
「無論如何，球王即將帶領阿根廷出戰世界盃，令舉國人民引頸以待。畢竟美斯球員年代同世界盃無緣，阿根廷人自然希望佢以另一個身份，衝擊即將完成歷史任務既大力神盃。」
「當然，各國球迷亦期望美斯既阿根廷隊﹑能夠同另一球王丙朗領軍既葡萄牙隊碰頭。球員時代既瑜亮之爭屬於永恆經典，兩位球王由場上鬥到場下，本屆世界盃更加舉世矚目。」
「突發新聞報導完畢。」


兩大球王領軍出戰成為決賽週揭幕前的熱門話題，我們卻一於少理，只專注自己的備戰工作。

五月最後一天，港隊於主場迎戰歐洲球隊阿爾巴尼亞，作為出發前最後一場世界盃熱身賽。
 





「屌！」開賽十六分鐘，我軍率先被無緣世界盃的阿爾巴尼亞攻破大門，看來領隊仍須對防守工作多下功夫。

幸好，臨近正賽，一班攻擊手繼續保持佳態。


「呢邊呀！ 」
「收到！」


德仔於邊路騙過一人大腳傳向遠柱，光仔踏順步韻凌空一射，直飛遠柱死角，於上半場完結前追成一比一。


咚咚咚……






「HONG KONG！HONG KONG！HONG KONG！」


雖說是熱身賽，但這是港隊出發前最後一場主場賽事，大球場繼續坐無虛席，一班小將亦沒讓球迷失望，下半場主導比賽之下由德仔於74分鐘射入奠勝，二比一勝出。

賽後，球迷繼續留守大球場，為兩日後出征的港隊餞行。


「gary！gary！ 」


我已經不必靠拐扙行動，走到場邊跟球迷打牙骹。他們不斷追問我的傷情﹑能否趕得及上陣等，我只是寒喧不答。

港隊的另一焦點自然是德仔，除了足球之外，記者對於上星期跟他一起步出機場的女郎亦大感興趣。






「德仔，個女仔係咪你女朋友呀？ 」
「聽講佢係太空翼親妹喎……你地係咪行埋左呀？」
「無可奉告，多謝大家。」


對於這種八卦新聞，德仔實在厭惡之極，賽前還特別叮囑里香避免露面。


「真係估唔到我做左你媒人。」我取笑德仔，他雙頰瞬即通紅。
 
 
六月二日，赤臘角機場人頭湧湧，送行的香港球迷迫滿了整個離境大堂。港隊大軍連同職員教練四十餘人，浩浩蕩蕩的出發前往南美洲。






「gary！ 」
「呢件係……」


送行的其中一位嘉賓，是新任體委會主席郭嘉亮。入閘前，他向我遞上一物，拍了一幅照片。

這是一件港隊主場球衣，背後印著G.LI－10的字樣。

六月四日，香港隊確定25人大軍名單及號碼。


1－謝家豪GK
2－陳俊傑DF
3－胡仲光MF
4－高尼路DF
5－真迪歷DF
6－林尚偉DF
7－陳偉拿FW
8－張世濠DF
9－梁令德FW
10－李文翰MF
11－藍美聰MF
12－劉軍宜DF
13－史葛皮恩DF
14－大力士MF
15－魏超GK
16－域陀FW
17－李翰林(c)MF
18－山度士FW
19－禾哥DF
20－金默基FW
21－劉尚發MF
22－樊晉葉GK
23－李海弱MF
24－艾馬MF
25－猶戴MF


*註：GK－門將﹑DF－後防﹑MF－中場﹑FW－前鋒