香港殺入世界盃（尼馬故外傳）: 第四十七章

47）貴為球壇紅人，德仔跟母親以外的異性單獨外出還是第一次。

黃昏的鹿嶋市氣溫只有零下一度，整日下著飄飄白雪，德仔與七瀨里香相約於市內一家魚生飯店晚餐。

「有兩樣野，Gary叫我交俾你的。」

里香拿出兩件物事，分別是一雙紅白色﹑左右兩邊分別印著HKFA及GL19的紀念版球鞋，以及一枚港幣十元硬幣。

「Gary話，之前同你喺意見上有分歧，但佢依然希望你可以逆境自強。」里香道。





德仔望著我送給他的兩份禮物，霎時猜到當中含意。

「你被罰停賽既事我有聽過，近來進展如何？」里香問。
「體委要求展開紀律聆訊，有判決前我都唔可以代表港隊出賽。」德仔道。
「距離世界盃仲有七個月，唔會有事既！」里香道。
「我都唔知，唯有見步行步。」

坊間有傳，若德仔想重返港隊踢世界盃，必須向「受襲」的梁孔德先生當眾道歉。但德仔問心無愧，一方面極不願意錯過世界盃﹑另一方面卻難以開口向出賣香港運動員的高層道歉。

他內心爭扎，為了畢生難求的世界盃機會，即使要放下尊嚴亦或許別無他法。






「話時話，」里香轉換話題。
「我好好奇佢俾你呢兩份禮物既含意，特別係呢個十蚊硬幣。」


德仔拿起那雙紀念版球鞋，道：
「呢對波砵係七年前香港打入亞洲盃決賽週時，本地運動商打造既『特別版香港隊HK90』。當年全城足球風氣熾熱，Gary更加係香港象徵人物，HK90一推出旋即被瘋在搶購。亞洲盃期間，Gary就係著住HK90為香港出戰六十年來第一個大賽。」
 
「原來如此，我聽Gary講，佢屋企一直擺放住一雙『幸運戰靴』，就係呢雙HK90？」




「正是。」德仔點頭。
「佢話過，以往雖然獲得不少國際大品牌既贊助，著過唔同款式既貴價波砵，但冇一對及得上呢對代表香港人身份既HK90。」
「原來如此，咁呢對球鞋真係價值連城。」里香點頭道。
「呢枚硬幣……又係同足球有關？」
「唔係。」德仔黯然地搖頭。
「2030年，香港政府宣佈人民幣成為本地通用貨幣，並計劃將港幣分階段淘汰。首當其衝既係歷史籌命最短既10蚊硬幣，率先被政府全面禁用及回收，擁有10蚊硬幣既市民需要到各家銀行換取同等價值既人民幣……一年之後，所有10蚊硬幣絕跡於市。」
「我聽過呢件事。當年香港人因此遊行至中聯辦，並籌集數萬枚十蚊硬幣，扔攔中聯辦辦公室既玻璃窗以示抗議，最終導致警民衝突。可惜，行動最後都係阻止唔到法案通過。」


德仔點頭：
「失去功能既10蚊硬幣，象徵住本土文化如何被中國一點一點侵蝕……呢對HK90同埋呢枚廢幣，寓意我地要利用足球既力量團結民眾，捍衛香港文化最後一道防線。」


他握緊手裡硬幣怔怔出神，想起茫茫前路的香城，感到一股淡然哀傷。






里香道：
「Gary對你寄望什殷，你唔好再嬲佢啦。」
「我從來冇嬲佢，大家都係想捍衛家園，只係諗野方法唔同。」

德仔頓了一頓，問道：
「妳好似幾了解Gary，你地……」

不待他說完，里香哈哈一笑：
「實不相瞞，我以前的確仰慕過佢，但我地年紀差咁遠，冇可能吧！」
「哦……」


不知如何，德仔頓時吁一口氣。
 




 
「你呢？你依家係灸手可熱既球星，身邊應該好多女伴吧？」輪到里香發問。
「我哥哥都係咁架……佢係意大利踢波咁多年，身邊美女經常貨如輪轉！」
「由細到大，我都不善同人溝通。」德仔搖頭。
「Gary有同妳講過我既事嗎？」
「冇呀！佢知我返日本就托我帶野俾你，又叫我同你傾下計練下日文咁。」


跟里香在香港初次見面時，德仔緊張得說不出半句話，今晚卻愈說愈投契，只覺得與這個日本女孩相處得舒服自在，任何事均可以毫無保留與她分享，什至自己年幼喪父的往事。


「對唔住呀，要你諗返d傷心事。」里香聽畢故事後說。
「我自細慣於封閉自己，係Gary鼓勵我放低陰霾，學識同人相處。」德仔道。
「你地都係有故事的人，心意自然相通。」里香道。
「或許吧！」德仔道。




「其實，我今次假期會喺日本逗留兩星期…」里香道。
「黎緊星期日，我會去現場睇你比賽。」


德仔頓感受寵若驚：
「妳……黎睇比賽？」
「做咩咁既樣？怕我買唔到飛嗎？」里香笑問。


自從鹿島鹿角揚威國際﹑並重金禮聘世界各地球星起，主場賽事經常出現爆滿情況，可謂一票難求。


「我唔係咁既意思……」德仔漲紅了臉。
「日本國寶係我親哥哥，一張J-League飛難得到我嗎？星期日見吧！」






里香笑語盈盈，令德仔心花怒放，誓要以場上的表現去報答紅顏知己的支持。

白雪之下，這個晚上的約會非常難忘。