聖嗜殺書院: 第六章：疑點

我地坐係一間空課室裏面，戰超過一個鍾終於可以休息一下，阿志將門鎖住，落晒窗簾，確保唔會有人入到或望到入嚟。
 「頂……真係好攰……」阿權坐係一張凳上面，一路索氣一路飲水。
 「休息多五分鐘就好行啦，咪係有人嚟就大鑊啦。」阿志咬住一條啱啱開封嘅能量條，露出一個苦惱嘅表情。
 「BB你做咩呀？係咪唔舒服呀？」Joyce見阿志好似好唔 妥，上去問吓到底咩事。
 「無嘢，我只係有啲嘢一直都諗唔通。」
 「有咩嘢你諗唔通？」我直覺話比我知：佢同我都擁有同一個問題。
 「你地有冇發現，由開始到依家呢一刻，我地係一個學校嘅老師都見唔到？無論低至校工，高到主任級，一個都唔見，全部好似人間蒸發咁？」
 果然，同我諗嘅一樣。
 「係喎！你唔講我都唔知……」阿權好似開竅一樣彈起身。
 「同埋你有冇發現，我地係途中經過嘅一啲地方嘅牆上面，有啲奇怪嘅符號？」阿權補充阿志所講嘅嘢。




 阿權用粉筆係黑板上面畫出嗰個奇怪符號，係一對黑色天使翼，中間直立住一把劍，劍鞘向上而且有火，好似一啲宗教符號咁。最重要嘅係，之前有一個中三生開學嗰日想去報警結果比人用殘酷嘅方法殺死，而當時殺死個中三嘅嗰個人個面具上面嘅圖案，就係呢個。
 「好喇，休息完啦，行啦。」「我地用番剛才嘅策略，位置上，我同華仔轉位。你有著甲，襟打啲，盡你所能輔助阿權，ok?」阿志提出新企位，對我嚟講係一種壓力，因為保護主力係相當重要，主力受傷就會出事，要我擔任呢個咁重要嘅位置實在有難度。
 「唔洗驚喎」阿志好似知道我諗嘢咁「盡力而為啦。」
 我，阿志同阿權手執一支棒球棍，慢慢行出課室。出面除左一啲血漬之外無咩特別，咦？點解剛才比阿志阿權佢地打死嘅嗰三個人嘅屍體唔見左嘅?
 我地慢慢行近走廊嘅盡頭，見到男人，望落都有三四十歲。佢戴住一個畫有嗰個奇怪圖案嘅面具，攞住把長半隻手臂嘅刀，佢一見到我地，唔理三七廿一向我地衝過嚟。
 「嘩頂！！咁快就開打?！」身經百戰嘅阿權都爻爻地底。
 「佢嘅武器比我地嘅更有威脅性，華仔著左甲都未必有用，大家小心！」阿志準備上前支援。
 嘣！個男人一刀劈向阿權，阿權即刻用棒球棍擋住，但個男人嘅力實在太大，阿權似乎招架唔住。我衝上前幫阿權手，點知個男人一腳踢開我，我一嘢撞埋牆，雖然著左甲，但都好痛。呢個時候連阿志都上嚟幫拖，點知個男人一腳踢開阿權，直接過左阿志，向Joyce 嘅方向衝，佢嘅目標由阿權轉到Joyce 。

 「小心呀！！」訓左係地嘅阿志連棍都攞唔切就即刻衝過去，而我就衝過去保護Joyce 。阿志一個飛剷，剷落個男人隻腳到，個男人仆左係地下。但個男人比想像中更難對付，個男人即刻執番把刀，轉身騎係阿志身上，準備一刀斬落去。我即刻好似打欖球咁撞埋去，攬住個男人條腰，兩個一齊撞埋牆。




 「機會嚟啦！飛雲！」阿權攞起棒球棍，一下打落個男人嘅後頸到，個男人應聲倒地。
 「嘩屌……呢條友到底乜水呀?咁勁抽嘅?除低佢個面具睇過……」阿志行過去除低個男人嘅面具。
 「陳sir?!!」陳sir係我地嘅物理老師，佢平時對人幾好，但估唔到佢都會玩埋一份……
 「真係估唔到……」Joyce 係陳sir嘅學生，佢對陳sir嘅印象一直都係好好人、好友善之類，佢應該完全諗唔到，原來平時幾友善嘅人，係呢個遊戲入面都可以變得好可怕、好恐怖。
 令我明白到，原來呢個遊戲最殘酷嘅唔係殺戮，亦唔係死亡，而係見到自己熟悉嘅人，顯露連自己都未見過嘅獸性，仲要係想殺死自己。我唔排除其他老師都係咁，我當然唔想其他人都係咁……