聖嗜殺書院: 第一章：新校長上任
「鈴鈴鈴……」響亮嘅鬧鐘聲，將我從睡夢中拉回現實，9月1號係學生忌日，我都唔例外。
「喂！咪訓喇，起身番學啦！」
「張逸華！」雖然老母用盡一切方法叫我起身，我都係比張床封印住，但係我又唔想第一日番學就遲到咁柒，最後都係要蛇落床。唔洗10分鐘，梳洗、食早餐、換衫通通完成，果然，人未到絕望嘅時候都唔會將自己最強大嘅一面顯露出嚟。
「我出去啦」「拜拜，睇路呀！」
我所讀嘅中學係香港嚟講都算係倒數最Top嗰班，學校唔似學校、監獄唔似監獄，啲學生男嘅煙、酒齊晒，有啲仲係出面跟埋大佬；女嘅頂多做援交。總言之，呢間「學校」真係好唔掂。當然，唔係嗰個學生都係咁衰嘅，好彩嘅係，同我好friend 嗰班都係好人，先無令我誤入歧途。
「喂，阿華哥，呢個暑假搞咩嚟呀？」謝志，足球隊隊長，體育方面佢認第二無人敢認第一。「無呀，咪打下機，玩下figure ，砌下高達咁囉。」「咪成日掛住打機啦，叫你出嚟打波又話唔得閒，你再咁落去因住變肥仔呀！」「叮咚叮咚……」集會嘅鍾響起，我同阿志一齊落禮堂。仲有阿志條女－JoyceJoyce 係級內數一數二嘅靚女，未同阿志一齊嗰時總共有二十個男仔追佢，結果全部都無功而回。除左係靚女之外，仲係校內少有嘅學霸，成績拍得住拔萃英華，都唔明點解佢會入左嚟呢啲爛仔學校。
「喂靚女！」一個唔知死嘅中三夠膽死挑逗阿志個女朋友，阿志立即有所行動。
「你邊位呀！搞我條女?你未死過呀！」
「我死左仲係到同你嘈交咩？你都on99嘅。」個中三真係好串咀，我睇得出佢嘅下場應該都幾慘烈。話口未完，阿志一隻黃金右腳對住個中三嘅頭，一下車埋去。
「呯！」個中三即刻訓低係地下，同佢一齊嘅人即刻去睇個中三。
「志呀…你會唔會太重手呢?」我都比個中三嘅情況嚇親，擔心佢會唔會有生命危險。
「唔會嘅，我輕手咗㗎喇。」咁都叫輕手咗！?個中三比其他人抬左落醫療室，而我同阿志同Joyce一起落禮堂。
開學禮原本係嚴肅嘅場合，但啲人都係好嘈，完全聽唔到台上面嘅人講嘢。「依家有請我地新上任嘅校長－黎天祥先生同大家講幾句說話。」原來學校換左新校長咩？點解無聽過任何人講過嘅?不過算啦，學校嘅內政我地無權過問。
我感覺到一鼓不祥嘅氣息，點解個個老師都神色凝重，對住班不斷嘈吵嘅學生都可以無動於衷，個個啲樣好似塑膠倒模咁，一模一樣。
「喂阿志，你覺唔覺……」睇嚟阿志同我嘅諗法一樣。
「我都覺」阿志用手抓緊坐佢隔離嘅Joyce，以防萬一。
「大家」校長終於開口講左第一句嘢「我有一份開學大禮比你地」佢嘅笑容，睇得出唔係咩好嘢。
「大家搵下自己張凳下面，有無一個盒，有嘅舉高佢，全場應該只有一個。」我地當然都會睇下，無嘢。
「呢到！」就係我對角線方向，有一個中二生舉高左佢搵到嘅盒。
「打開佢啦。」校長示意該中二學生打開個盒。
「嘩！點……點解有槍㗎！」其他學生開始起哄，但老師們仍然無動於衷。
「放心啦，BB彈槍嚟啫。」
「攞住支槍行上嚟啦。」
聽到話係玩具槍，大家開始放鬆落嚟。
「你知唔知咩係蘇聯輪盤?」蘇聯輪盤……好似聽過下。
「知呀！」
「知就得喇，你請一位同學或朋友上嚟呀，唔該。」個中二生指住剛才坐佢隔離嘅一個男仔。台上面，有校長、兩個中二生同一支連真假都唔知嘅左輪手槍。蘇聯輪盤……我記得喇，係將三至兩粒子彈放入左輪手槍嘅彈匣裏面，再將佢轉亂啲位置，再輪流對自己開槍……咪住！咁咪啫係話校長佢玩嘅，係一個死亡遊戲?佢係咪白痴㗎?人命都可以當遊戲玩?條友係咪心理變態㗎?
「嗱，攞住佢，對住你個同學開一槍。」
「你都痴撚線㗎！會死人㗎！」中二生聽到一個咁樣嘅要求，即刻嚇到鳩縮，將把槍掉落地下，慢慢向後退。
「好，你唔開，嚟，你！」佢指住另一個中二生「向我開槍！快！」個中二生嚇到手震，台下嘅人都開始驚。
「唔好呀！」「會出人命㗎！」
「你地收聲！」「快啲啦！快呀！」個中二生，連板機都唔夠力拉，仲開咩槍呀。
「你唔開呀嘛?好！我自己嚟！」校長從中二生手中搶番把槍，扣起板機。
「噠」呢一聲，表示呢個彈匣無上彈。
「嗱，到你地啦，一半機會中，睇下邊個中「大獎」先」
一開始鳩縮嘅嗰個中二生即刻搶番枝槍，扣板機，將準星對準另一個中二生。
「對……對唔住呀！我唔死住啊！」「你係咪痴左線呀！」
「噠」
另一個中二生無事。
攞住槍嘅嗰個中二生即刻爻晒，手震到連槍都掉埋。
「對唔住啦，呢位幸運兒，接大禮啦！」
「呯！」
一下響亮嘅槍聲，傳到禮堂嘅每一個角落，學生們目瞪口呆。……
禮堂突然變得安靜。「唉～仲諗著睇你地自相殘殺㗎嘛，不過原來人都幾可怕，為左唔想自己受害，就強迫他人代替自己受害，到頭來都係害番自己。」
「呢條友痴線㗎！走呀！！」
「呯！」
再一下響亮嘅槍聲。
短短嘅十分鐘，禮堂少左兩人，多左兩條屍體。Joyce可能因為驚得滯，死捉住阿志唔放。「無我嘅批准，邊個都唔走得！如果唔係?哼！」到底之後會發生咩事?