點解我會變左做靚女架？: 16-天使

部懷舊既相機列印出一幅相。

張相影左Jayden同我kiss既一幕，背景係ｄ水母。

我望一望周圍既人同Jayden，我呆左，佢地好似時間停頓左咁，郁都唔郁，定哂格。

西裝男拎左張相出黎，然後交俾我：「真摰一吻。」

西裝男：「你已經完成左考驗啦。」





我：「咪住先呀，你究竟係咩人？」

西裝男：「我話我係天使，你信唔信？」

我：「信呀。」

西裝男：「哈哈，我叫Michael。」

我：「傳說中係上帝御前既大天使，米迦勒？」





西裝男：「係，而你都一樣係天使。你原本既名叫做Milla，因為貪戀凡間既愛情，被貶下凡。」

西裝男：「你投胎下凡之前，曾經許願想試下做一次少男少女，同埋得到真正既愛。而家已經達成，你係時候返去天家，你返去之後，所有人關於你既記憶都會消失。」

我：「咩喎？你講真嫁？唔係掛？唔好玩啦，我仲未試過同女仔拍拖架喎，可唔可以俾我留係男版世界繼續生活呀？」

西裝男：「可以，俾你十四日，如無意外，你想同Katrina拍拖？呢層我地可以搞掂，你只要向佢表白就可以。」

我：「但係十四日之後，我就要做返天使？」





西裝男：「係，4月15日0時0分之後，由你出世到升天之間既一切記錄都會消失。而你既家人、朋友會到死後先會恢復對你既記憶。」

西裝男對手渣住一個金圈遞俾我：「呢個係天使既榮冠，當你準備好，戴上佢就可以重新成為天使，然後升天。」

西裝男：「最後一點，仲係最重要既一點，你絕對唔可以同人講任何關於天使既事，仲有你變成少女既事，否則你就會立即升天，並且受到懲罰。」

我：「下？」



不知不覺間，我訓左一陣。

「下？」我從床上彈起身，咦？呢度係邊度黎？

白色既天花同慘淡色調既房間，睇黎呢度係醫院。





我打開手機：「2019年4月1日，下午5:16？」咩話？唔通我返左過去？

四月一日愚人節，咪就係我跌左落樓梯去左第二個時空果日？唔通，我已經返左黎？

我摸一摸自己下體，然後忍唔住笑左出黎，哈哈哈哈。隔離個男仔見到我呢個舉動都即刻嚇到唔敢望我。

無錯，我變返做男仔啦。我又再捏一下自己塊臉，痛。

但係我仲有變做少女既記憶，我好肯定之前唔係發夢。

咦？我睇下床上既移動台，有一個金圈，仲有一紮淺藍色既花，label上面寫住「天堂花店 風信子 $198」。

仲有兩張相，女版既我既證件相，張相好似Angela Yuen，而另一張就係我同Jayden kiss既一幕。





即係Michael對我所講既野都係真實既？

唔得，人生得返十四日，我一定要好好把握佢。

我：「姑娘，我要出院呀。」

護士：「唔好啦，你懷疑腦震盪撞親個頭，應該訓多兩日觀察下先嫁。」

我：「唔得呀，我無時間啦，我要出院呀，有咩後果我自己負責。」

護士：「咁…咁你等陣，我俾份文件你簽。」

我：「哈哈，好呀。」







出左院之後，我拿拿聲返屋企之後，沖個靚涼換件衫，再約Katrina食晚餐。

我約左佢去西鐵站等，再去YOHO食「完氣壽司」。

Katrina好快就到左。

我meet左風信子既label，然後借花獻佛，送俾Katrina。

我：「Katrina，其實我鍾意左你好耐，我地可唔可以係埋一齊呀？」呢句我練習左好耐，終於可以一氣呵成咁講出黎。

Katrina莞爾一笑：「可以呀。」

然後我就拖住佢隻手，等位入去食壽司。





到食壽司既時候，我係度諗，唔知升天之後仲可唔可以食人間既美食呢？我唔理啦，今次食盡佢啦。

火炙三文魚、蟹柳、加洲卷、花之戀，沙律軍艦，我點左好多碟壽司。

我食完一舊又一舊，但我個心仲係好似穿左個窿咁，點樣食都填補唔到。

我突然開始流眼淚，但係我明明唔係落左好多wasabi咋喎。

原來係我忍唔住喊左出黎。

點解會喊？因為我仲掛住Jayden。

我愛Katrina，但我仲愛Jayden。

自古多情空餘恨，此恨綿綿無絕期。

眼淚令我終於認清一個事實：原來我……真係gay嫁。