與直男共存史: 02 口賤直男

繼上次講完直男定義之後，我希望各位明白咩叫口賤。

再次用血淋淋活生生嘅真相揭穿現實嘅假象。

呢件都係幾得意嘅生活趣事，為我平靜而有DD沉悶嘅生活帶黎少少驚喜。

呢件事嘅開始係源於同一位男友人E同女友人A食LUNCH。

男友人E：「哇！你又食埋D垃圾飯？！」





我笑左笑，望住我啱啱買嘅叉雞飯，同埋對面第一日一齊食LUNCH嘅女友人A碗叉燒紅腸飯⋯⋯

我地碗飯一樣黎自燒味部。

非常好⋯⋯成功用一句得罪成枱人⋯⋯

食食下去到中段，佢對住女友人A講：「你知唔知呀！呢個人（指住我）冇朋友架！」

我：「⋯⋯」





則係我應該俾咩反應呢？應該大鬧特鬧？定係徹底否認呢？

母親大人講左一句幾有啟發性⋯⋯

「你下次等佢見到你，坐到係你隔離，你就攞呢部野擺係面前⋯⋯」

佢指住部廣告賣緊嘅空氣清新機。

則係同你呼吸同一空間嘅空氣都嫌污糟咁話啦喎⋯⋯





我覺得我好需要一部，去消除佢D口臭。

我當然冇大鬧特鬧，亦都冇徹底否認，我問左句：「你又知？」

我同佢識左幾耐？到依家啱啱一個月。

女友人A聽到佢話我冇朋友之後就同一時間話：「唔係呀！」

氣氛徹底冷場。

雖然我食得幾開心，當然係食花生啦，你以為餐飯呀。

何謂食花生呢？等我講解下。

男友人E：「你有冇參加乜野活動？」





女友人A：「點解你仲要讀英文嘅？唔係讀完啦咩應該？」

你冇睇錯我都冇打錯，男友人E條問題係比女友人A無視左。

氣氛再度冷場幾秒。

男友人E：「咁係因為我係ASSO上黎嘅，之前冇讀到所以依家就要⋯⋯」

落人面嘅報應唔係唔到，只係時候未到啫。

走嘅時候，呢位男友人E同我私底下話：「你見我著到咁頹就算啦，見其他人仲著到咁頹！」

Excuse me！！！我件衫又邊忽得罪你哋呢D直男呀？！





我好無知咁回左一句：「著咁靚做咩？」去出SHOW呀？！

佢啞口無言。

我其實知道佢想講咩，佢唔止一次側面描述叫我著靚D，只係我唔理。

要我為左佢著靚D，難度為5**。

曾經上一集提過嘅男友人K提醒過我：「佢（男友人E）個樣成個狗公咁，你小心D佢（男友人E）。」

當然男友人K唔知嘅係呢位男友人E，佢口中嘅狗公，亦都講過類似嘅野：「喂，你小心D佢（男友人K），佢同你玩偶遇喎！」

我唯有揣着明白装糊涂。

【世間總有些事只有表面無知愚鈍，實則心明如鏡才能活得輕鬆自在】