【恐怖，懸疑】那天清晨: 第一一四話

軒見沒有人接話，唯有繼續唱獨腳戲。

「嚇下你地啫，放心啦，冇恐怖野。我地未見到任何老化同塵埃其實好簡單，因為未夠時間發生。我重播閉路電視記錄嗰陣，雖然冇時間刻度，但因為影到我地入嚟哩度，勉強可以對比到，照估計記錄開始既時間大概係我地喺foodcourt 醒既時間，而照常理猜測，我地應該係喺記錄開始之後『嚟』到哩度既，因為記錄開始既時候應該就係哩個世界被創造出嚟既時候。」

May姐：「都係唔明啊！咁又有咩用？你講人話得唔得，而家已經好煩㗎喇，你仲up咁多冇用既野…」（下刪一千字）

軒：「暫時係未有用，但了解哩個世界對我地生存同搵返去現實既路一定會有幫助。總之哩個世界既特點係將現實世界既野，放入嚟以全新既狀態出現。」

我：「咁你抆插蘇開機又有咩意思？」





對這測試，我始終很在意，目的可能不只是確認電腦是否需要電源去開啟吧。但若不需電源就能開機，也太恐怖了，就像「娃鬼回魂」的主角發現公仔不用電也能啟動一樣恐怖詭異。

軒：「哩樣又係另外一個謎。你地知唔知我地一般用既電係點嚟？要由發電廠經高壓電纜，再轉低電壓，再駁入大廈，中間要經過好多設備同複雜既程序，咁我地先用到電。如果唔洗用電都開到機，件事就簡單喇。可惜唔係咁。咁又衍生更多問題，啲電點嚟？邊個負責去operate？」

Kelly：「會唔會係後備電？即係好似醫院咁，有備用既發電機？」

軒：「係就大獲喇。後備電總有用完既時候，用完既話，我地點算？冇電用我地會好大獲，冇燈、冇微波爐、冇熱水爐，乜都冇，過原始生活咁。不過我相信唔係咁簡單，由又一城到哩度，有好多交通燈，全部正常運作，要幾多後備電先夠？我暫時會話係有一個或者一種神秘力量喺背後維持哩個城市既運作。跟住有個急切既問題要解決…」