捉伊因: 第三個鐘

首先開腔的是年輕小伙子：「我叫Sunny，中文名同呢位明星一樣都叫陳煒，我讀緊U，係學校田徑隊，跑開短跑，請大家多多指教。我係學校做完gym諗住淋個身，點知係更衣室就畀人整暈咗，睜大眼就係呢度喇。」說完又露出牙膏代言人式露齒笑，我的眼睛再被閃瞎，不過他的名字卻引起我的注意，然而眼鏡男和中年阿叔看似已知悉一切般沒什麼反應。

「我相信大家都識我，都唔駛點介紹啦，我只係記得我啱啱踩完六組想返屋企抖吓，一上車就恰著咗，醒返就係呢度喇。」女星陳煒說。

接著地中海大肚腩中年阿叔也說：「阿叔我叫陳煒，開模型鋪嘅，都唔知得罪咗邊撚個，收鋪返屋企嗰時畀人扑濕咗，跟住就係呢度出現，都唔知呢度係乜撚嘢地方，嗰個乜尻CW，畀我揾到佢實打柒佢。」這阿叔也叫陳煒？難道……

「輪到我講喇，其實我都係叫陳煒，不過我比較鍾意啲人叫我做Whitney，因為陳煒呢個名搞到我成日畀人笑。我做酒店炒散嘅，我只係記得同個蛇頭嘈完啲糧嘅問題之後就畀人迷暈咗。」中性打扮的少女說，果然她都是叫陳煒。

「好啦，到你喇毒撚陳煒。」眼鏡男看著我說，他果然一早已經推算到所有人都叫陳煒，真不簡單。





「無錯，我都係陳煒，但要澄清一點，我唔係毒撚，呢個係我平日係屋企嘅衣著，我琴晚夜媽媽揾完個住附近嘅friend返屋企，係平時行嗰條小路上畀人吉咗一針，醒返就係度。我係自由工作者，應該無咩同人結怨嘅。」我邊說邊翻找我的腦袋記憶，但什麼也想不到，只記得這些。

「好，最後到我，大家應該都估到，我都係叫陳煒，呢個係我地六個嘅共通點，呢個位我覺得應該係有啲玄機，但仲未諗通，我係做會計嘅，係公司紮營嗰時突然無咗知覺，之後就畀人帶咗過嚟。」眼鏡男回憶道。

「六個都叫陳煒，即係之前係房CW唔係只係對我講，而係對所有人講，咁佢答我退出遊戲個問題唔通只係預計到我哋會有呢個反應而講？究竟佢點揾到我哋？同埋又有咩陰謀？」我心裡想著，但毫無頭緒。

「係呢，大家嘅隨身道具係咩？我係個尿袋。」酒店炒散陳煒說。

「係，呢樣我諗都對我哋生存有幫助，個CW係咁講，我係枝水。」我附和著。





接著女星陳煒、模型店老闆陳煒、大學生陳煒和會計師陳煒也分別說出他們的道具是一面小鏡子、模型噴油、接力棒和墨水筆，所有道具看似沒有特別，不知如何有助逃生。

此時，會計師陳煒再度開腔：「啱啱CW話我哋解咗一個任務，應該係你哋嗰面解嘅，講下係點嘅任務。」

他求答案的語氣也不太客氣，要不是生死悠關，我真的不想答他：「係一個IQ題嚟，都唔係好難。」

「咁你啱啱見果個呢？」會計師陳煒問大學生陳煒。

「係一隻簡陋嘅電腦game，要控制架飛機避開四面八方飛嚟嘅飛彈，三十秒內唔中彈就完成。」大學生陳煒回答。





「仲有無人遇過其他任務？得兩個數據好難推測啲任務性質。」會計師陳煒繼續帶領大家，但各位面面相覷，沒有人再有回應，他只好提出一個辦法：「不如我哋分散行動，大家各自揾唔同嘅任務，識解嘅就解，唔識嘅就記住再返嚟集思廣益，十五分鐘為一次行動時間，遲咗無出現嘅我哋就當佢犧牲咗。大家答錯咗響警報都唔駛驚，隻鬼都無咁快追到嚟，而且大家要有默契啲，聽到有人答錯，立即大家一齊答錯，等隻鬼唔知去邊度好，而我哋就立即返嚟集合再討論，大家understand？」

會計師陳煒不是問大家有沒有問題，而是問大家明不明白，很明顯他認為我們全都要依他的建議去做，聽著真不爽，很獨裁，但無可否認這是基於目前情況下所能作出最好的策略，不得不佩服他，這策略既能短時間掌握最多資訊，而且又可以確保所有人的安全，令膽小的人也放心依計劃行事。

「果然係會計師，心思夠細密，我覺得呢個方法非常好。」模型店老闆陳煒第一個表示支持。

隨後各人也紛紛表態贊成，雖然這策略我覺得可行性很高，但始終有些說不出的不安感，不過群情洶湧，我也得屈服於群眾壓力之下。

各人分配好路線後，便對錶行動，時間已過了三小時，現在分秒必爭，大家都只想盡快逃脫。