[純愛] 有緣遇上你 卻無份愛你: 十二
（十二）
於是，對待Samela 的態度開始有點改變了，既然要奮不顧身地狗衝她，那她有沒有男朋友，就不再有任何影響了。
反正，我猜Samela 應該也是喜歡我的。
你說可能沒有？不要這樣啦，我好不容易才下了決心要追她。
記得去年變回單身的時候，身邊有些女生也算是優秀，配得上我，但我在她們面前總是不能談吐自若，所以錯失了不少機會。而Samela 則是第一個可以令我有點興趣，而我在她面前毫不怯懦地做回自己的女孩。
所以，面對這樣的對手......我還怎可以放過她？
「喂Samela ，一陣收工一齊去食野？」我劈頭就問。
Samela 望一望手錶，點頭說好。本來旁邊的Philips 見狀，也想說一起去，可是懂事的Keyman 馬上把他拉走了。
與Samela 總是有聊不完的話題，可能我們倆也是那種話比較多的人吧，果然好合襯喔！
與Samela 吃飯時，她突然接到一個電話，然後神情慌張地跑到餐廳外接聽。
是男朋友吧。
唉。
侍應把一碟碟的美食放到桌上，可是我卻沒有胃口了。
隔著玻璃看到Samela 專注地聊著，我想，大概是男友找她聊幾句吧。
有這個身份，就是有這種優勢呢。唉，我也不能怨什麼，因為是我打算搶別人的女朋友。想想看，我應該對那個男生說聲對不起呢。
看到Samela 握著電話不停笑著，我開始質疑自己的行為。
到底是令Samela 更快樂，還是只會令Samela 變得更痛苦？
看來......Samela 還是有點喜歡男朋友，所以才會笑得如此愉快吧。
過了一會，Samela 回到座位上，我也馬上撐出一個Sales 式的笑容說：「傾咁耐既？好開心喎見你笑哂口。」
「你做咩偷睇人地講電話，正一變態佬。」Samela 喝了一口清水。
「你係出面笑得勁大聲囉，成間餐應都聽到哂啦。」我故意誇大其事。
「哈哈，有無咁誇張呀。」
我試探性地問：「頭先個電話好似好重要喎...」我喝了一口檸檬茶，想吞下自己緊張的感覺，續說：「......係男朋友打黎？」
「係呀......」Samela 說。
我內心馬上沉了下去。她才續說：「......好重要呀，我婆婆打黎丫。」
什麼！原來是我庸人自擾！馬上暗爽了一刻！
「婆婆會同你傾電話架？」我問。
Samela 慢慢將侍應遞上的牛扒切開，一邊說：「會架，好細個既時候係婆婆湊大我架，所以依家大個左，都會個個星期傾一次電話。」
「好孝順喎Sam 姐，咁佢知道左你負碌入到大學，咪開心到飛起？」我說。
Samela 一邊咀嚼一邊說：「係阿，開心到癲左，不過佢呢排身體開始唔係咁好，我都好擔心佢。」
我也不知道該說些什麼好了，要是在這種地方說錯話，那就會留下很壞的印象。幸好她續說：「唉，以往個個暑假都會返深圳探下婆婆架，今年反而無。」
「今年因為要返工？」我問。
「返工啦，去旅行啦。唉！早知就唔做呢份暑期工啦！」Samela 將餐具放在一旁。
「下，但你唔返工咪識唔到我囉？」我說。
「係呀，又如何？」Samela 一臉正經地說。
「咁你呢個暑假咪無得暗戀我囉！」
「Er 留意返，無人暗戀你囉。你係咪成日幻想其他女仔暗戀你？又Amy 又Betty 又Philips。」Samela 說。
「無幻想！你問下你自己良心！除左Philips 之外，個個女仔都暗戀我！」
「Okay ，睇黎你已經病入膏肓，我諗我都係走先。」Samela 拿出銀包想要離開。
我連忙搖手：「得啦得啦你無暗戀我，坐返低繼續傾啦女神。」
Samela 輕輕拍了兩下手掌，似是在宣告勝利。
「咁唔返工既話你少好多樂趣喎；無錢去旅行啦；識唔到Amy Betty Candy佢地啦；識唔到男神Samson 哥啦。」我說。
「除左最尾果樣都岩既，有好有唔好啦。」
「你讚我一句洗死架？」我問。
「死都唔會讚你。」
吃過飯後，我陪Samela 慢慢前往車站。氣氛不錯呢，有點像情侶一樣。
「係喎，你有無Reg 到Hall 呀？」我問。
「無阿，Reg Day 果日都有人叫我住Hall ，但我無咩興趣。」
「係咪你D 生活習慣太差，怕比其他同學睇穿你既真性情，所以索性唔住？」我問。
「唔係呀，我係怕我太有條理，然後唔小心收哂成個Hall 既仔做兵咋。」
「哦哦，聽你咁講，我住Hall 既話都應該可以收成支解放軍返黎。」
Samela 不禁莞爾，望向我問道：「其實你真係...點解可以咁自大、咁厚面皮？」
「你都差唔多呀。」
「哈哈，大家咁話啦。」Samela 笑說。
「認真問既話...」我說：「自大可能只係保護自己自卑果一面。」
Samela 收起笑容，大概知道我是認真討論。
「可能係以前...拍拖果陣太卑微，唔係咁鍾意果個自己，所以依家要自大D 填返條數掛。」
「哦...即係你既自大係扮出黎既。」
「錯啦，我依家係港大既學生，堅系自大啦，哈哈。」
「你以前拍拖果陣好慘架咩？」Samela 問道。
想起那時，在滂沱大雨中與前女友吵鬧的畫面；想起我因害怕面對真相而變得乏力的雙臂；想起在房間抱頭痛哭的自己。
真的卑微得很呢。
我說：「算係既...果陣真係幾低賤，將自己擺到好低。唉！」
「喔......咁你有無瘋狂挽回？」
「咁又無『瘋狂』挽回，都盡左力，無謂再比自己樣衰落去嘛，佢都跟佬走啦，我挽黎做咩？」我說。
Samela 拍一拍我的肩，似是安慰我說：「哈哈，好堅強喎Samson 。咁如果前女友突然返黎搵你你會唔會復合架。」
這個問題我也有幻想過，我說：「唔會啦，都過左去。依家對佢無哂任何感覺啦，連嬲既感覺都無了。」
「恭喜你真係放低哂喎。」Samela 往小巴站的方向走去，說著：「我有車啦，今晚再傾。」
我向她揮揮手，然後往反方向去搭車。沿路一直想著，平時的Samela 從不問我過去的戀情，今晚怎麼那麼突然會提及呢？
搞不好是Samela 想了解我是否已經完全放下了前女友呢？
想起與前女友的點點滴滴，不知道她現在是否安好呢？其實也不關我事了。
不管怎樣也好。
Samela 最後的那一句「今晚再傾」。
才是最令我興奮的一句。