[純愛] 有緣遇上你 卻無份愛你: 七
（七）
全靠Keyman 詳細地計劃過行程，所以接下來那天我們就乖乖跟著Keyman 參觀了101等景點，然後傍晚一行人說要踏單車，於是就各自租了一輛單車風馳電制地駛去。我站在Samela 旁邊，只見她一臉不快地騎車。
「其實唔想踩。」Samela 說。
「唔怪得你苦口苦面啦。」
其餘一行六人早就一馬當先，只剩下我和Samela 二人。
這班傢伙肯定是故意的。
「我踩得唔叻，怕一陣跌親。」Samela 騎著單車左搖右晃地緩慢前進，而我就一直跟隨其後。
人在異鄉，迎著艷紅的落霞，哼著輕快的歌兒，年青的二人飛快地在單車道上奔馳。
這聽起來很悠閒寫意。
而現實是，我正以步行般的速度緩慢行駛，前方的Samela 像個白痴一樣，踏兩下又停一停，不如直接推著單車行會比較快。
「其實你到底識唔識踩單車？」我問。
「我識架！我真係識架！不過踩得慢D 姐...」
Samela 笨拙的舉動倒是讓人覺得有趣。我說：「你睇，因為你踩得太慢，搞到我地落後左咁多啦。」
「哦，咁你走先囉。留低我一個係到得架啦！聽朝應該就會合到你地。」Samela 說。
經過一個河濱公園，我見Samela 也挺累的，於是對她說：「不如係度坐下啦。」
我倆將單車放到一旁，二人坐在長椅之上，面向著淡水河。
「睇唔出你運動方面會差到咁，等你仲成日話自己好有才華添。」我說。
「咩呀，係單車唔叻咋嘛。我係其他才能方面真係好叻架！」Samela 似乎不甘被我小看。
「例如呢？計數？」
「計數固然叻啦，畢竟我有Lv 4 喎。我中學果陣係戲劇學會架。」
這麼說來，Samela 的Facebook 上好像有些關於話劇的相片。我說：「咁你成日上台做話劇架？」
Samela 托一托眼鏡說：「咁又唔係，我多數負責寫劇本多。係有一兩次唔夠人用，所以連我都要做埋演員。」
「你肯定係特登寫個女主角比自己做呢？」
「我先唔會，係因為我靚所以老師先叫我做女主角。呵呵。」Samela 撥一撥瀏海。
「咁你學校D 女真係好樣衰下喎...」
「唔係囉，比你睇下啦...」她拿出手機，打開了相簿。
Samela 展示了不少自己做舞台劇時的相片，也播放了數段舞台劇節錄給我看。看著舞台上的她，脫了眼鏡化了妝，的確是個美人兒。而台上那副自信滿滿的笑容，與剛認識時一臉內向的她截然不同。
黃昏下，小河畔。二人坐在長椅上，看同一部手機，聽同一副耳機，一人戴一邊。
看著屏幕裡的她，彷似坐在觀眾席，親歷其境，注視著她的一舉一動。
也彷似參與了她的過去。
「點？套劇係咪好好睇？靠呢部劇我果年拎左最佳編劇架...」Samela 說。
老實說，收音很差，沒有字幕我根本就不明白所有對白內容。我只是一直看著她在舞台上的樣子，這樣就足夠了。
夕陽西下，見天色漸漸變暗，才從她的過去拉回現實。我說：「差唔多要返去啦，你推得架車返去黎都應該天光。」
「哈哈，你幫我推咪得囉。」
「幫你推車？嘿，好呀。」
回到別墅，經歷了充實的一天後大家也累得交關，連夜市也沒有去就直接睡到明天。
明早就要回香港，今天算是旅程的最後一天，我們打算去放天燈。遇上旅遊高峰期，前往十份車站擁擠不堪。好不容易到了十份，眾人早就大汗淋漓。
大家租了四台機車往瀑布那邊去，我也是第一次駕這種玩意，感覺也沒有多難控制，而Samela 自然是坐在我後面。
「喂，唔好開咁快喎。」Samela 雙手撐著機車的後面。
我突然加速，Samela 馬上嚇了一下，雙手就捉緊我的肩，在我耳邊說：「大佬唔該安全D 呀，我條命仔就交托係你手上架啦。」
一行八人在瀑布那邊瘋狂自拍，草草欣賞了瀑布，便說要去放天燈。於是回程時又各自乘著機車回車站旁。
這次Samela 就不坐我的車了，換了Philips 坐在我身後，頓然覺得沒趣。
「Samson 哥，頭先你地好幸福啦。」Philips 突然雙手緊抱著我的腰。
「喂，放手呀死Gay 佬，就黎炒車架啦！」
「點呀？我用對肥仔波胸壓你，係咪勁過Samela ？」
「痴線！佢無胸壓我囉！撞啦喂！快D 放手....」
就這樣有驚無險地回到車站旁邊，眾人隨意找了一家天燈店，提起筆打算畫點什麼上去。
Amy Betty Candy 與Sherry 瘋狂地自拍，而我就小心翼翼地在天燈上寫上：
「要幸福！」
刻意沒有寫上主語，為的就是所有人也幸福。
Samela 在天燈的另一邊寫字，我偷瞄了一眼，看到她寫下了：
「大家也要幸福喔！」
我暗笑了一下，好像是為了彼此的心有靈犀沾沾自喜。
店員將天燈撐起，我們一起圍著天燈拍照；看著天燈點火。
「掰掰！」眾人向天燈道別，雖然明知天燈最後只會墜落至山邊，成為一件郊外垃圾，但亦暗暗祈望這個天燈可以把彼此的願望帶至最高。
而我卻只凝望著Samela 的側面，見她滿臉歡喜，心裡就感到一陣愉悅。