[純愛] 有緣遇上你 卻無份愛你: 五
（五）
久違了的休息日，到網上查看了數間琴行的招聘廣告。老實說我已經厭倦了繼續賣衣服，雖然女同事們全都長得很漂亮（除了Samela ）、工作時很清閒、人工不錯...等等，但如果可以的話我還是想面對一些我喜歡的東西，而不是困在倉裡投閒置散。
晚上約了Sony 吃飯，由於他已經搬回赤柱居住，所以我只好與他相約在旺角。又再次在旺角晚飯了...唉...
Sony 說他的母親看到成績表後感到挺滿意，也沒有再態度強硬地逼他到外國讀書。只是新學年開始時，他的母親會回到美國與父親及姊姊生活，而Sony 就只得與工人留在香港。
「咁咪幾正？你可以食左個工人喎。」我說。
「痴線，阿姐黎架，咁都岩。請你食啦。」
「有錢請工人真係好，乜都唔洗做。唔似我啦，做到PK都係得幾十蚊一個鐘」我乘機揶揄他一番。
「乜你返得好辛苦咩？唔係話大量美女咩？」Sony 問。
「其實就唔辛苦既，不過如果可以好似你咁唔洗做就仲好啦。」
「唔好講咁多廢話，比D 女同事既相黎睇下先。」Sony 色心起。
我打開與同事們的合照給Sony 。
「有無睇岩邊個呀？喂個ok喎...嘩！呢個...對野咁大既？我指對眼...」
Sony 說起「有無睇岩邊個」，腦海馬上閃過昨晚Samela 的側面，其實她也是個不錯的對象...我說：「有一個都幾岩傾，我覺得佢都幾得意...」
「係咪呢個呀？呢個？呢個都唔錯，定還是係呢個呀？」Sony 指著照片逐個問。
而在最後Sony 指著Samela 的照片時，我微微地點了頭。
「嘩，你想瀨鐵閘呀？真係口味獨突喎。」Sony 以近乎恥笑的語氣說。
「咩姐，佢好差咩。」
Sony 放大了Samela 的照片來看，然後向我說：「咁又唔係，其實都算係靚女黎既，如果拆左牙箍正路應該ok。呢個女仔叫咩名？」
「我都覺得佢算係潛力股黎。佢同我撞名，又係叫呀Sam 。」
「下，咁有緣，唔怪得你想溝人啦。」
「我只係覺得佢幾得意姐，無話想溝佢。」
「可能你想溝都溝唔到呢，或者佢有男朋友都未定。總之如果你覺得呢個女仔唔錯既，我覺得不妨一試呀。」
「我考慮下先。」
從Samela 的FB 和IG 皆沒有與異性的合照，我就可以判斷她沒有男朋友。而且，瞧她的長相就知道她不可能會有人追求吧。
吃過飯後與Sony 在附近散步，走到一個小公園來。兩個男生坐在公園內吹吹風，聊聊天。突然Sony 問了一句：「Quincy 最近點？」
我錯愕了一下，沒想到他會問起我的Ex 來。我說：「聽講幾好，同阿Will 相處得唔錯，仲齊齊入U 。」
Sony 點點頭，然後說：「聽你既語氣，你已經完全放低左佢啦喎。」
我冷笑了一下，對他說：「一早放低左啦，依家自己一個，經濟鬆動左、又唔洗心掛掛，不知幾爽。咁你呢？你同Vian 點呀？」
Vian 是以前曾與Sony 搞過曖昧的一位補習師姐，已經很久沒有從Sony 口中聽到她的名字了。
「無聯絡好耐啦...」Sony 似乎有點沮喪，他繼續說：「佢一入左U 就好少再有時間同我傾，所以慢慢就無再傾落去啦。」
「咁可惜呀，本來你可以擺脫A0 架啦。」
「痴線，無鍾意過佢，同佢係Frd 黎咋嘛。」
我看得出Sony 是在否認自己的感覺。很多人在上大學之後，接觸大量新朋友、搞活動、上莊等，忙得不可開交，就是要談戀愛，也會找些朝夕相當的異性吧，所以Vian 與Sony 疏遠也是很合理的事。
回到家裡，看一看行程表，幾乎清一色是上班。再捱個半月就到新學期了，到時應該能脫離這種枯燥乏味的生活。
打算就寢之際，電話傳來訊息：
Keyman ：我地聽日Book 住宿
Keyman ：你去唔去？
對喔，這幫人說要去台灣，反正我閒著沒事，也應該要到外地闖闖吧。不過，不知道Samela 會不會去呢？
Samson ：阿Sam 去唔去？
Keyman ：佢岩岩同Sherry講話去呀
Keyman ：佢無同你講咩?
我嘴角微笑，答應了Keyman 。點算了錢箱內的現金，大概能支付旅費吧。
隔了一個星期，距離旅行前一天。同事們每天午飯也興高采烈地討論行程，我其實沒什麼所謂，只要是跟大家一起，做什麼也會覺得好玩。
「喂，Samson ，我諗到一個好計劃。」Philips 在我耳邊悄悄話：「依家我地三間房，Key同Sher 一間，我同你一間，然後班女又一間。到時後我同你扮鬧交，然後你趕我出房，咁我咪可以叫班女收留我囉！」
我會心一笑，這傢伙真的挺有趣，於是我說：「好呀，咁第二晚就到你趕我出房，一人訓一晚。」
Keyman 在我另一旁的耳朵悄悄話：「喂，兌左台幣未？買左旅遊保未？搞左入台證未？」
果然Keyman 是心思慎密的人，他所說的我通通都準備好了。明天就要出發，不知道大家姐應付得來嗎？雖然一間店鋪有十多個兼職員工，但一下子八個人同時請假，不知道會否對店鋪造成影響。不過這也不是大家姐擔憂的事吧，反正我們只是兼職員工。
今天大概八時左右下班，剛巧Samela 也是這個時間下班，所以我們二人就到一同步行往地鐵站。
「聽日就出發啦，好緊張呀！」Samela 在我旁邊說。
「出咩發？你有份去咩？」我故意問。
「咩呀？去台灣喎。」 她一臉不解地說。
「下？Keyman 明明同我講話大家都唔想你去...原來最後都係心軟...」我擺出一副同情她的樣子。
Samela 想了一想，然後笑了起來：「頂你又玩我。」
「麻煩你聽日一定要帶齊所有野，唔到搞到大家要等你一個呀。」我說。
「得啦，一陣返去Check 多次！」
「入台證、護照、台幣...」當我說完台幣二字，馬上聽到她慘叫了一聲。
「我唔記得兌台幣！點算呀點算呀！！！」
看到Samela 慌張的樣子，我就知道敲竹槓的機會來了。我說：「唔洗咁擔心既，我兌多左好多，聽日你帶港紙黎同我兌啦。」
Samela 聽到後馬上雙眼發光地望向我，帶著感恩的心對我說：「唔該哂你呀！」
當晚我向母親多拿了兩萬多台幣，幸好她上次去完台灣還剩下不少台幣，不然就只能到當地用ATM 領台幣了。
翌日。檢查好所有行李、證件，就出發往機場。我們乘坐的是九時多的航班，所以七時左右就齊集在機場。當我在約定的時間到達機場，才發現只有我一個人準時。大概七時半Samela 終於來到了。
「早晨。」Samela 睡眼惺忪地向我打招呼。
「訓得好差咩？」我問。
「係，人生第一次坐飛機，有D 緊張。」Samela 揉了一下眼睛。
看到Samela 準時出現就感到安心了，我偷偷地打量了她一下。她身穿一件灰色T-Shirt 外加一件洗水牛仔外套、黑色闊腳褲和一雙Vans 布鞋。這樣的配搭挺適合她呢。
其他人也陸續來到了，Philips 與五位女士就坐在一旁聊天，我與Keyman 就討論著行程的安排。
「第二日打算去呢度...之後第三日未諗定呀。」Keyman 計劃得挺周到的。
「第三日去放天燈囉。」我說。
「咦！都好喎！等我寫同Sherry 永結同心先。」
「痴線佬。」我笑著說。
「你呢，你快D 搵返個女朋友啦。阿Sam 啦佢都唔錯呀。」Keyman 奸笑。
「係咩，佢係幾Cute 既，如果佢主動溝我我就考慮下。」我說。
「想溝人就主動出擊啦。就快夠鐘上機啦，我去提醒下佢地先。」
遠處看著Samela 談笑風生的樣子，好像...去追求她一下應該也無妨吧？心裡冒起了一絲絲暖意...
登機的時候，由於我和Samela 最遲買機票，只得兩個人遠離大隊，坐在遙遠的位置。
「喂！有無幫我帶台幣呀？」Samela 問。
我嘿了一聲，對她說：「想我同你唱錢？嗌聲Samson 哥哥好靚仔先。」
Samela 搖搖頭，對我說：「咁我寧願餓死係台灣啦。」
「好啦，咁由得你餓死異鄉啦。」
Samela 托一托眼鏡，一臉不滿地說：「嗚，為左我個旅程，我唯有呃自己一次。Samson 哥哥，好。靚。仔！」
我滿意地點點頭，然後問她：「你今日帶左幾多港幣黎同我唱錢？」
「我唔知要用幾多錢呀，唱住少少先得唔得？」
「好，咁唱住一萬台幣先啦，即係你要比返幾多港幣我？」我問。
Samela 笑了一下，然後說：「我唔知呀，要比幾多？」
我一早就料到這個數學鬼才不會計算匯率了，這正是敲她竹槓的好機會。我說：「拿，匯率就係4.4左右，咁你比返四千五百蚊港紙我就差唔多啦。」其實只值二千五港幣。
Samela 也沒猶豫，馬上就從錢包拿出很多張五百元紙幣，抽出了4500元港幣給我。
我冷笑了一下，然後對她說：「真係唔明點解你數學會高分過我，其實兩千五就夠架啦。」說罷，便把兩千元退給她。
她把錢收好，接著說：「我信得過你，知你唔會呃我既。」
我臉上一熱，戴上耳機準備起飛時休息。