[純愛] 有緣遇上你 卻無份愛你: 三
（三）
接下來這個星期的早上，我也提早了一點回店舖。本來應該由Samela 一個人處理所有開鋪的事情，但我實在信不過她，只好由我幫忙。除了開鋪之外，收銀事宜本來也是由她負責的，但除了上次找錯四百元事件之外，這幾天她還是會不慎多找了幾十元給別人（但有一天多收了一百元），而這些事情是我在收鋪結算時才發現的，所以她本人並不知道我在背後替她填數。
所以我每日上班見到Samela ，就暗暗替她父母感到可憐。人長得不怎樣、頭腦又笨，真搞不懂她是怎麼活過這十七年來。幸好她性格不難相處，不然就應該早就被欺負得很慘了吧。
「歡迎光臨隨便睇下。」我向兩位剛進店的顧客說。仔細一看，原來是Keyman 和Philips 。
「Hello Samson 、阿Sam 。」Keyman 和向我們打招呼。
「咦，咁得閒黎探我地既？」Samela 問。
「係呀，約左Samson 食飯丫嘛。」Philips 回應。
對了，差點忘記今天約好了要與Keyman 和Philips 一同午飯。我見時間也差不多了，就對Samela 說：「阿Sam ，我依家去開圍先啦，你唔好搞出D 咩大頭佛，OK？」
Samela 向我比了個不屑的表情，搖手示意我可以離開了。我們三人就一同走到商場附近的一所小餐廳內坐下。
「你地就正啦今日Dayoff 。」點餐後我隨意與他們開展話題。
「你仲正啦，可以同阿Sam 兩個人係鋪仔對住成個星期喎。」Philips 奸笑。
「好正咩？咁不如你調過黎啦。」我說。
「咁又唔好。點呀你地，好似相處得唔錯咁喎。」Philips 說。
「還好啦，熟左先發現原來佢好多野講下。」
「岩傾就去馬啦Samson 哥！係機會啦！」Philips 認真地勸說。
對了，他們兩個不知道我一年多前遭遇的感情失敗，所以才勸我去追求Samela 吧。我說：「咪玩啦，佢咁醜樣...」
「唔係喎，我覺得OK喎。」Philips 說。
「我都覺得唔錯呀。」Keyman 也跟著說。
這兩個傢伙是怎麼樣了？該不會是一同作弄我吧？
「喂，認真，你覺得佢唔掂咩？」Philips 問。
唔...雖然Samela 是個鋼牙，瀏海又好像從未修剪過一樣長長地垂在兩側，但我也看得出她的輪廊本來就長得不錯。可惜我早就決定離開愛情這個圈套，不然應該也會考慮考慮。於是我說：「我覺得佢幾Cute 既，份人膠膠地...」
「咁就得啦！仲唔去馬等幾時呀？」Philips 說。
這樣一定會被他們就住這個話題無限延伸下去。於是我問Philips ：「咁你呢？Amy Betty Candy 你又睇岩邊個呀？」
Keyman 馬上冷笑了一下，Philips 假裝思考了一會兒，然後回答：「唔...應該三個都睇岩掛。不過佢個Feel 太MK 啦，我都係入到U 先再諗。」
「係喎，你地諗住讀咩科架？」Keyman 問。
說起大學選科就最讓我頭痛了。因為我完全沒有方向，也沒有特別想入的學系。所以那時報Jupas ，我就完全填上與好友Sony 一樣的選擇。我隨口說：「讀文學院掛，你地呢？」
「我諗住讀商，可能係S大商學院。」Keyman 的志向挺大的，看來他的成績應該不太差。
「我就打算係理工讀工程，不過我估我成績未必入到啦...」Philips 吸一口檸檬茶，品嚐著自己的擔憂。
對了，好像也沒有和Samela 聊過有關學業的事情呢，不人知道她會想考進什麼樣的學系呢？看她的樣子那麼蠢，大概是在一個很爛的Band 3 學校讀書吧。待會還是問問她有關學業的事情好了。
快要結帳時，Samela 說她懶得出去食飯，於是發了個訊息給我，叫我外帶一些東西給她吃。
與兩位男士分別後，我替Samela 隨便買了點水餃和奶茶，轉眼間又回到了店內。
「喂Sam 姐，外賣到。」我將食物擺到她眼前。
「唔該哂喎。」Samela 放下手機，馬上開始吃東西。
想起上星期加了Samela 的FB 後，看到她開朗的一面，讓我不禁想多了解她的中學生涯。於是我問：「Sam 姐，你中學果陣係咪比人排擠果d 黎？」
Samela 本來正打算喝一口奶茶，聽到我這句差點就把奶茶噴出來。她說：「係呀，永遠無人同我坐、無人同我食Lunch、無人同我做project 。咁答你滿意未？賤人。」
我忍俊不禁，沒想到她會如此誠實回答。當然我知道這是假的，於是我故意說：「你咁樣我真係會當真架。」
「賤人！我係好勤力讀書、上堂又踴躍答問題啦、老師又成日搵我幫手果類學生黎架！」
「哈哈，阿好學生，下星期四就放榜啦喎，你驚唔驚？」我問。
Samela 馬上停下了手上的動作，一臉可憐地望著我說：「好緊張呀！入唔到U 都唔知點算好。」
「讀唔讀U 真係咁重要咩？」我問。
「其實對我黎講無咩所謂既，不過我兩個阿哥都入唔到U ，所以我婆婆好希望我地家族可以出一個大學生架。」Samela 又喝了一口奶茶。
「你婆婆？咁你父母呢？」
「佢地反而無乜所謂，叫我盡力讀就OK ，不過我都想滿足下佢地既。特別係我婆婆好錫我架，如果入到U 佢一定好開心。」
看來Samela 是一個挺孝順的女生呢，不過可惜以她的聰明才智應該進不了大學吧，特別是她的數學一定不合格。於是我說：「但我諗你婆婆要失望啦，你讀埋D Band 3 中學，應該都幾難入到U 。」
Samela 瞪著我說：「我果間Band 1 架囉！」
「下？」我錯愕了一下，續說：「從你既智商，我一直以為你係Band 3 學生黎。」
Samela 笑起上來，一排鋼牙又呈現在眼前。她用手掩著自己的鋼牙，一邊說：「頂你，就算係Band 3 都有機會入到U 囉好無。」
「但你D 數學咁廢，我怕你連 2 都拎唔到喎。」又想起她在收銀機前的醜態。
Samela 又收起笑容，略為不快地說：「唉，數學真係好難，唔好再提啦，真係有機會唔合格。」
數學對我而言也是一科很難應付的科目。當年有Cass 為我補習的那段日子有明顯地進步過，但後來沒再與她聯絡，所以又一次對數學失去興趣。不過，我覺得自己考得不錯。我說：「你上堂認真聽書，返屋企操下數又點會唔掂？一定係你上堂掛住玩呢。」
「我有認真聽架，但硬係記唔入腦，見到D Formula 又唔識點解，唉。」
見她一臉煩惱，我還是換個話題好了：「咁當你數學合格，你想入咩科？」
Samela 把一件水餃放到口中，然後說：「唔...我想讀教育架。」
「教數學呀？」
「唔係囉，可能想讀中文教育，做小學老師都唔錯。」她輕托眼鏡，又吃了一口水餃。
「比你教既學生就慘啦。」
「頂你，你好叻咩。喂！不如我地鬥高分呀。」
這傢伙真是不知死活，半年前中六畢業試我可是全級頭十名以內的呢。見她有心挑釁，我就回應：「好呀，鬥數學高分呀。」
Samela 馬上笑著說：「咁數學既話就鬥低分，輸左果個請嬴左果個食飯。」
「想借機會要我請你食飯？好，我唔怕你。」
Samela 滿意地點點頭，又喝了一口奶茶。我見她喝得津津有味，於是說：「呢間奶茶好好飲咩？」
Samela 聽到我這句話後，就微笑望著我，然後將她手中的奶茶遞了過來。
這是在挑釁我嗎？你以為我不敢與你用同一支飲管？
我接過奶茶，果斷喝了一口。也沒什麼特別嘛。
「咁認真架啦喎，鬥低分呀。」Samela 說。
「好呀，怕你呀。」
我們勾了手指尾，這個賭注就這樣生效。