風水佬講鬼: 附物鬼
唔知大家有冇試過發綺夢？
相信大家都試過個種，下半身酸酸麻麻，對腳好軟，心跳好快，隔一陣先會平服既感覺。
綺夢入面，就算唔係靚仔靚女，都會係自己好鍾意既人。
但係大家有冇諗過，其實，夢入面嗰個究竟係咪人？
…
話說有個朋友叫茶姑娘，成日都會招惹尐靈異怪事。自從一個禮拜前，佢屋企對面有個做殯儀既喃嘸佬搬咗入去，就晚晚發綺夢。
「都唔知係咪對面個喃嘸佬帶尐污糟野返黎，日日喺度口嗡嗡，搞到我成日覺得好似有人喺隔離。」茶姑娘。
「係咪你諗多咗咋？」我。
「唔會啦！我近排晚晚發夢，同個男人拍拖！開頭尐情節都好浪漫，又去沙灘又去山頂，但硬係會有張床唔知喺邊度變出黎，最後就會同個男人咩咩咩。上網話呢尐叫俾鬼交！」茶姑娘。
「會唔會係你思春啊？不如我睇咗間屋先啦！」我。
茶姑娘間屋唔大，廁所喺大門隔離，左邊有個衫架，張床就喺窗口附近，個太陽曬入黎，曬到成間屋黃晒。
喺窗望出去，一望就係皇都戲院，對出條馬路係T字形，茶姑娘間屋啱啱對正個路沖位，喺風水上路沖位好易帶黎緊張同壓力，對精神都會唔好。
但究竟咩原因搞到發綺夢呢？
我行埋個掛衫架一睇，對眼既視線就定住咗！
絕版牛仔褸！
尖角領口剪裁，灰藍既洗水色，加上有青鏽既銅鈕，呢件褸簡直獨一無二！
「件褸可唔可以借我着一排啊？」我問都唔問就着上身，件褸拎上手都冇乜野，不過着上去就好似有尐嘢壓落黎。
「你快尐除返落黎！唔好整污糟！件褸我上個禮拜喺二手鋪買！第二度搵唔返嫁！」茶姑娘。
「咁你俾我着一陣，最多睇風水收平尐啦！」我。
「一陣嫁咋！唔好着住走啊！我殺咗你嫁！」茶姑娘。
「有冇鏡俾我照下！」我。
「廁所咪有囉！」茶姑娘。
我鬆吓個膊頭，扭咗幾吓，件褸真係有尐重！
咔嚓...
我扭開廁所個門柄，個門柄好易開，但度門後面就好似有人頂住咁，推極都推唔到。
「喂！你廁所度門好難開！」我大聲叫。
「係咁嫁！你試下大力尐囉！」茶姑娘。
擢多幾下，我大力一推，度門終於開到。
塊鏡掛喺牆度...
但鏡入面...有對白色手搭咗落我膊頭！
我呆咗下，背脊有尐寒！
用力捽下對眼，再望吓塊鏡，鏡入面得我一個，除左面色有尐唔好，乜手都冇。
我係咁用水潑塊面，用力合埋眼，再慢慢擘大，一切正常。
出返去，我就掛返件褸，個膊頭就即刻鬆咗好多。
直覺話我知，件褸一定有問題！
「做咩咁快除低嘅？」茶姑娘。
「哦！件褸有尐窄！唔係好岩我！」我是但搵個藉口，冇講頭先件事，費事嚇親佢。
「個件男裝黎，你應該岩嫁！」茶姑娘。
「可能我...」
講講吓我就俾把聲打斷咗...
「我嫁～」一把好低沉既男人聲，喺我右邊傳出。
我眼角瞄一瞄右邊，乜都冇！但頭先明明聽到男人聲嫁？
間屋既光線好似變暗，空間都變得沉重咗，個感覺好壓迫！
「件褸我嫁～」茶姑娘開口講，但把聲變咗啱啱個把男人聲，對眼擘到勁大，好似死唔眼閉咁。
我搖吓個頭，眨咗幾眼，再望真尐茶姑娘。
佢個樣好似咩都唔知咁，側住個頭，繼續同我對望。
「你做咩咁望住我啊？」茶姑娘。
「你太靚啦！啱啱個吓電親我！唔信你聽吓我個心卜卜卜卜咁跳！」我挺起胸，個心真係跳得好快，不過係俾人嚇出黎。
「講大話！一定有尐野！快尐話我知！」茶姑娘用手指住我。
「冇啦！不如我幫你卜支卦？唔收錢啦！」我。
「卜咩先？係咪幫我卜吓幾時有拖拍？」茶姑娘。
「得得得！幫你卜乜卦都得！」我。
喺袋拎咗三個銅錢，雙手一合，前後總共搖左六次，每搖一次，心入面就諗住：茶姑娘，二十六歲，女，係咪招惹到鬼？
鏗鏗鏗...
歸魂卦！！隨卦！
有鬼要害茶姑娘！要盡快走！唔係有危險！
「點啊？卜成點？係咪有男人追我？」茶姑娘。
「係啊！有一個啊！」我冇講事實佢聽。
「真係？咁點先可以見到佢？」茶姑娘。
佢咁講完我背脊又寒過，你想見，我唔想見囉！
「我知佢喺邊！我哋出去搵佢啦！」我。
「真係嫁？咁快尐去啦！」茶姑娘孭起手袋，順手拎起件牛仔褸...
「件褸唔好拎！」我。
「點解啊？咁奇怪既你？」茶姑娘皺一皺眉。
「冇...冇嘢。藍色唔旺你啊，拎過第二件啦！」我。
我係咁推茶姑娘走，但經過廁所，我哋就停低咗，望住塊鏡...
點解！？
我會着住件牛仔褸！？
我同茶姑娘對望咗一眼，我見到佢驚到個嘴擘大，成個人係咁震。
咔嚓！咔嚓！
佢即刻擰轉身，係咁扭個門柄，但出盡力都開唔到！
我除低件褸，扔到好遠，但擰返轉面望，鏡入面既我仲着緊件褸！
「喂！茶姑娘！望住佢！唔好擰轉身！唔係佢會上你身嫁！」我諗返以前既經驗。
「好驚啊！點望啊！」茶姑娘用力捉住我隻手！
鏡入面既我慢慢變咗另一個男人，頭髮好長，眉毛好濃，個鼻又高又挺，如果唔係全身都係血，塊面完全冇血色，應該係一個靚仔黎。
「啊！我近排發夢成日見到佢嫁！」茶姑娘捉得更加緊，指甲都插到入肉！
啪！啪！啪！
個男人喺鏡入面係咁向上爬，塊鏡都俾佢拍到係咁震，每爬一下，就有一個手印留喺鏡面。
「點算啊！爬緊出黎啦！」茶姑娘。
「快尐搵野扔佢啦！」我。
我搶咗茶姑娘個手袋用力扔，個袋撞咗塊鏡就跌返落地，塊鏡輕輕郁咗下。
「啊！我個袋新買嫁！」茶姑娘搶返我個袋，大大力扔出去。
「啊！我個袋啊！入面有我尐架生嫁！」我。
啪！！嚓！
塊鏡碎到成地都係！
「係咪無事啦？」茶姑娘。
「等等！我覺得未完！」我。
我同茶姑娘一齊望住個地下，尐碎片係咁震！
唧！
有隻手喺最大個塊碎片伸咗出黎！
隻手向住我哋爬！爬得好快！
好近，好近！
愈黎愈近！
隻手要撲過黎！
我下意識擋喺茶姑娘前面，全屋都靜晒，連呼吸聲都冇。
「南無阿彌多婆夜～」
出面既走廊，傳出一把男人聲，係喃嘸佬！
隻手就黎抓到我塊面，就停低咗！然後係咁抽搐，好似痙攣咁！
「哆他伽多夜～哆地夜他～」
好快隻手就用肉眼見到既速度褪返入去，如果唔係成地碎，真係好似乜事都冇發生過。
我輕輕拍一拍茶姑娘：「無事啦！」
然後兩個人都好冇儀態咁，攤咗落地...
…
之後我同茶姑娘，去廟化咗件褸，燒既時候，我覺得好可惜。
我同茶姑娘有搵喃嘸佬傾計，喃嘸佬就自稱一搬入黎，就知茶姑娘間屋妖氣沖天，有男鬼附身。
隻男鬼係交通意外死，死既時候就附身喺件牛仔褸，仲想娶茶姑娘做老婆，所以佢日日就唸往生咒，希望超渡隻男鬼。
最後，佢仲話茶姑娘，係觀音娘娘既玉女轉世。
唔知點解我覺得佢似神棍多尐...