風水佬講鬼: 小紅紅
「喂！阿花！我撞到隻好猛既鬼！我仲同佢對望緊！」
...
自從經過「母子」件事，識左阿花呢個朋友，遇到任何靈異事件，佢都會即刻過黎幫手。
平時，佢都有教我兩三招旁身，好似入新屋前，要用左手敲三下門，又或者左腳入門，同地主表示尊重。
不過，呢兩三招今次就冇乜用，完全解決唔到眼前既問題...
...
話說有個客，喺西環一座舊樓租咗間屋 。頭嗰兩日都冇乜野，但第三日開始，訓醒就發現自己唔喺房。
一入到阿客間屋，我就覺得周身唔舒服，拎個羅庚出黎睇，支針係咁轉。我同阿客再睇電話入面個指南針，情況都係一樣。
我行入廁所，檢查下個水龍頭，因為阿花話過，如果間屋陰氣好重，水龍頭尐水會好寒，咁代表好易招惹鬼。
扭開洗手盤上面個水龍頭，一滴水都冇，再將個水龍頭扭大尐，都係冇乜反應。
踎低向上望，就見到有一紥頭髮，塞住個水龍頭，阿客就拎咗個鉗去鉗，紥頭髮好長，鉗極都仲有...
滴答...
鉗咗好耐，先有一滴水滴落黎，摸落去有種，凍到全身麻痺既感覺...
我皺晒眉，喺廁所入面，個感覺更加唔舒服，但我又講唔出有乜唔舒服。
「做乜事啊？風水佬！」阿客。
「你個水龍頭塞到咁！喺風水角度會破財嫁！你快尐搵人搞搞佢！」我想快尐離開廁所，就同阿客話去睇房。
一打開房門，我對眼就縮左一下，入面有一個有三層高既神櫃，下面兩層係空既，上面個層有一個木書托，但上面就見唔到任何書！
行近尐個神櫃，可以見到上面尐裂痕，中間個層尐銅扣起晒青邊，最頂個層尐木雕刻俾人撞花晒。
「點解你個神櫃擺入房既？」我。
「唔知啊！個神櫃唔係我嫁！業主叫我千其唔好搞！話好快搵人搬走！」阿客。
「咁神櫃最頂個層，係咪有本書嫁？」我。
「係啊！前日執野，撞一撞，跌左落黎，唔記得放咗喺邊，我要搵下！」阿客。
我見阿客係咁搵，就擰住面，打電話俾阿花，將個情況話佢知。
「喂！阿花！問你樣野！」我。
「做咩啊？又撞鬼啊？」阿花。
「冇啊！神櫃最頂個層擺書，代表乜？」我。
「咪姐係間屋死過人囉！」阿花。
「咁本書有乜用？」我。
「本書呢，十有八九係經書黎，用黎鎮住尐怨氣！」阿花。
「咁...如果本書唔見左呢？」我。
「咁咪姐係隻野出得黎囉！」阿花。
「咁你可唔可以過黎救一救我？」我望到廁所，有幾隻濕漉漉既腳印...
滴答滴答！
個水龍頭明明閂左嫁！？
嘟嘟...
阿花個邊斷咗線，我個心寒一寒！
我合埋眼，㩒住個心口，深呼吸左一下。
「阿客！唔好搵啦！」
我順手拉阿客，一齊走！
但我發現手上好似冇乜重量，擰轉頭一睇，咦！乜都冇既，阿客呢？
望左幾次，都唔見阿客。
我個心更加寒！
喺個窗望出去，個天又紅又暗，好似有尐野會發生。
間屋都變得陰陰沉沉，我打開電話入面個電筒，照住廁所個方向。
滴答滴答滴答...
個水龍頭...又好似俾人扭大咗。
我再照一照地下，又多左幾個腳印。再照近尐自己，發現個距離好近。
我將個電筒照到我前面，慢慢見到有個腳印浮出黎。
「有冇咁黑啊！！」我成身起晒雞皮，轉身就跑出門口。
但一出門口，我就呆左。
滴答！滴答！滴答！
做乜喺廁所嫁？
「電話暫時未能接通...」
我驚到再打俾阿花，入面把聲時男時女，聽到我背脊都寒埋。
我全身雞皮又起過！成個額頭都係汗！
再跑出門！又喺廁所！
我再跑！都係！？
你估我真係唔知屙尿可以破鬼打牆咩？
當我準備拉開褲鏈既時候，有種俾人望住既感覺，我慢慢將個頭擰向洗手盤個邊，望左一眼，就好快望返前面。
我深呼吸，再望多次。
「唉！阿妹！你咁望住我！真係會屙唔出！」
一個紅頭巾、紅色連身裙、紅色鞋既小妹妹，踎喺洗手盤上面，側住頭望住我。塊面好似俾人用力打到凹咗入去，個嘴仲俾人用針縫住。
「喂！阿花！我撞到隻好猛既鬼！我仲同佢對望緊！」我再一次打俾阿花，今次終於通咗。
「嗱！你而家可以做既就係，望住佢，慢慢向後行，記住眼睛要對望，我就到嫁啦！你頂住先！」
嘟嘟...
我再深呼吸一下，擘大對眼望住個小妹妹，可以好清楚咁見到，佢面上既傷口同青筋。
我慢慢向後行，愈黎愈近大門，但又唔敢行出去，因為怕鬼打牆，又入返去廁所。
「你唔好過黎啊！我叫救命叫得好大聲嫁！」
但我既阻嚇好似冇乜用！
個小妹妹一直跟住我行！
慢慢！一步，一步，咁行近。
佢每行近一步，我就行後一步，額頭同背脊，係咁標冷汗，後面就係大門。
我冇得再行！
....
「喔喔喔啊！」
突然！傳出一把公雞叫聲！
小妹妹聽到公雞叫，就停低，個頭係咁周圍望。
我順住叫聲望過去，見到阿花企喺轉角位，用手指上下拉住喉嚨。
「做乜扮雞叫既！又扮得幾似喎！」不過講完，我就知出事。
小妹妹又行前返幾步，仲要近過頭先！
阿花拍一拍額頭：「你真係豬一樣既隊友！」
我想衝向阿花個邊，但背脊好似俾人騎住左，郁都郁唔到，係咁有尐寒氣吹埋耳仔度，個種凍到全身麻痺既感覺又黎啦。
我仲感覺到有人摸我塊面，手指輕輕劃過我嘴唇，我既意識開始有尐濛...
「破邪！！」
阿花把聲拉返我去現實，我個人醒一醒。
我向上望，見到小妹妹對眼，寫滿晒恐懼，眼淚係咁流，唔知點解呢刻覺得佢好可憐！
啪！
道符刷過我頭頂...打中小妹妹個額頭！
本來又紅又暗既天，即刻有返太陽，我用手遮住對眼，因為唔係好習慣，突然之間既強光。
「唉！終於...冇事！！」
我成個人坐咗落地下度。
...
事後，我知道阿花去幫個小妹妹做左場法事，就問返佢個故仔。
佢話小妹妹個名叫「小紅紅」，又係佢改既。
本身屋企好有錢，點知俾人綁架咗。
佢鍾意喊，所以俾個綁匪縫左個嘴。
後尾，個綁匪收唔到續金，就錯手打死小紅紅，將條屍分解，用水泥封左落洗手盤下面。
因為死個時着紅頭巾、紅裙、紅鞋，所以就變咗做厲鬼！
個綁匪事後成日發惡夢，就請左個老師傅，訂造個神櫃擺喺房，然後供奉本經書，用黎鎮住小紅紅。
至於，點解阿花扮公雞叫，佢就話因爲公雞係陽氣好重既動物，鬼會驚，同埋好易扮。
但唔知點解我扮極都唔似...