《小松奇妙物語！》: ０５
金毛的狗屋建在這鳥語花香之地，應該很舒服。
「汪汪！！」金毛突然咬了個棒球過來給我。
「唔？」牠想怎樣。
「汪汪汪！！！」牠不斷地搖尾，並貼身地嗅著我。
「想玩拋球？」我出手隨便把棒球打走，金毛就高興地去撿：「你哋真係單純嘅溫室寵物‧‧‧‧‧‧」
約莫十一時正，小松才緩緩地醒來。
她起身的第一件事，是先紮好馬尾髮，然後就刷牙、洗臉。
「將軍？將軍！？你喺邊啊？」小松在屋內呼喊。
「叫我？」這時候的我，還在金毛的狗屋中渡假。
這裡有軟墊之餘，屋子的大小更是適合我。
很多人不知道，我們貓兒最喜歡的空間，其實是那種細小但能夠剛好容納我們的地方。因此，一般我們找到紙箱，到會當成臨時渡假屋使用。
驀然，一條紅色的線出現。
它由我左手連接到屋內，什麼來的？！
「將軍‧‧‧‧‧‧？」小松跟隨紅線，找到我了。
這紅線，繫在小松的尾指上。
「喂！你隻死嘢，做咩霸咗小毛間屋啊，哈哈哈哈。」小松半蹲、望著我。
「紅線，咩嚟？」我很好奇。
「我都唔知喎‧‧‧‧‧‧」小松望著尾指：「你都見到呢？」
「見到‧‧‧」我點頭。
「唔通係全球定位系統？」小松開玩笑。
「似乎只係會定位搵到我‧‧‧‧‧‧」我眼神有些苦澀。
「好神奇，不過遲啲再探究，我約咗人！」她說。
「墨報嗰位？」
「係啊，所以我想問你‧‧‧‧‧‧」
她還未說完，我已經把話說出：「帶埋我去。」
「哈哈，正有此意，你留喺到都係搞破壞。」之後，小松強行把我從狗屋中抱走。
出門前，小松在房間更換了外出的衣裝。
進房前後，彷如兩個模樣。
外套是件長袖深藍牛仔褸，內裡是件時髦的黑毛衣，加上條淺米白色七分裙，感覺輕鬆又時髦。
「將軍，準備好未啊？」小松坐在沙發，穿上黑色的冬季襪子。
「我唔似你哋人類咁，要裝身。」我不屑地斜盯她。
「我仲諗住一陣買幾件衫俾你著下。」正穿著白波鞋的小松回盯我。
衣穿好，鞋換好的她，站在鏡子作最後整理，就正式離開別墅。
天上，雖然陽光明媚，但那輕涼的秋意還是悄悄溜近。
「你呢到，係別墅區？」
所謂的別墅區，就是那種被外牆圍住且有嚴密保安的住宅區。鄰居之間雖然住得很近，但周圍不會有高樓大廈，只有一式一樣的兩層別墅。
在區內的道路上，更種滿各種蒼松翠柏、滿目綠色，連空氣都比一般地方好。無論燈柱、道路、欄杆、水池，都以英式建築風格構成，極為合襯。
鳥兒飛過，也能看出牠的優遊自在。
「嗯啊，貓貓嚟講你又幾醒目喎。」小松低頭望我。
「因為芳每次帶貓入嚟討食，個保安都會趕走我佢哋。」我說。
「討食？」
「我哋野貓本質上一樣，但其實係分咗兩種。」我開始說明：「一種，係好似我咁聯群結隊去搶掠、尋找人類嘅食物。另一種就係好似芳咁，透過撒嬌、哀討嘅方式，博取人類歡心去換食物。」
我續說：「為咗生存，我哋任何形式都要去試，芳就係帶領比較軟弱嘅野貓，去討食嘅首領，而我就係武鬥派。」
「哇，你搞到我都想見吓芳啊，叫佢向我撒嬌討食。」小松說。
「佢生死都未明。」
小松沉默半晌，抿嘴：「你想喊嘅話，我可以安慰你嫁喎。」突然，小松把我抱到其右膊上。
「作為野貓，一樣殘酷嘅事都見過，只係今次發生喺我哋身上。」被她突然抱起的我，又掙扎起來：「喂，唔好抱住我！」
「放你落膊頭啫，你有冇睇過寵物小精靈隻比卡超嫁～」小松把我安放在右膊上。
「冇！！」
「你乖乖哋坐喺到啦～好遠路嫁。」小松以銳利的目光，盯一盯我：「小心一陣你都俾人拐咗！」
「‧‧‧‧‧‧」被小松用手死死按住，我只得伏在她的膊上。
「小松出街啊？」平日對野貓十分厭惡的保安，語氣和面容都變得溫柔了：「新寵物？哈哈，隻貓真係可愛。」
「係啊，再見叔叔。」小松禮貌回應，就步出車閘。
「你有冇去過城市？」小松問我。
「以前有，但係鬥爭太殘酷，人類越多嘅地方越危險。」我嘆氣：「而且太多漁農自然護理處，太危險先搬過嚟呢啲偏遠地方‧‧‧‧‧‧你去緊？」
「旺角啊，我哋會搭小巴先。」
慢步人生的小松，令我第一次留意周邊的風景。平日走路都要飛奔和掩護物的我，首次感受到這區的寧靜之美。
小巴站。
可能是假日的關係，今天特別多人來往。
每次小巴開門，都會上一堆人，落一堆人。
在等候的隊列期間，但都有一個共通點，就是往我和小松這邊望過來。
「好多人望住我哋‧‧‧‧‧‧」我開始思疑。
「因為你似比卡超囉。」小松樂哈哈地說。
「比卡超咩嚟。」我拍打小松的臉蛋。
「上到車俾你睇。」
「轟隆」正好，下一輛小巴到我們上車了。
小松坐到單人座後，司機不禁愕視倒後鏡：「小‧‧‧小姐‧‧‧‧‧‧你隻貓‧‧‧‧‧‧」
「冇嘢架，佢好得意架。」小松拍拍我頭部。
我也還擊，胡亂卻無力地拍打她臉頰。
「哈‧‧‧哈哈哈‧‧‧‧‧‧好，你隻貓唔會見頭暈就得。」司機大哥提醒。
小巴坐滿了人後，司機拉動棍波隨即出發！
車子行駛期間，小松把手機拿出，播放一段卡通影片給我觀看：「睇喇，比卡超。」
影片中，一隻黃紺紺的生物坐在少年的膊頭上，我才得知小松的用意。
我又拍打小松粉嫩的臉頰：「開《加菲貓》。」
「得喇得喇，你唔好露爪整到我啲細滑嘅皮膚就得。」小松轉換影片。
於是在沉悶的車程中，我們就觀看《加菲貓》解悶。
然後，我也不知不覺間，在她的肩膊上睡去。
好一段時間後，進入了很多人車喧鬧的地方，才緩緩地醒來。
此時，小松已經轉看另一段影片，一套幾個男生主持的綜藝節目。
「咩嚟？」我又問。
「《VS嵐》。」小松看得很入神。
「旺角到！」司機大喊。
「喂‧‧‧‧‧‧到旺角。」我拍拍她臉蛋。
「呃‧‧‧咩話？」小松回過神來，匆忙地走出車廂：「差啲唔記得落車‧‧‧‧‧‧」
眼前的旺角，對我而言只兩隻字。
繁雜。
霓虹燈招牌在頭頂胡亂地掛著、有些狹窄的小路人們需要推擠地前進、公路上的車子幾乎是水洩不通。
這裡林立各種品牌商鋪，且人聲吵雜。
上車前的秋意，一下消逝。
反觀，如同夏日的鬧市，空氣也有點侷促。
「應該喺附近啫‧‧‧‧‧‧」小松使用手機，尋找相約的咖啡店。
一路上，目無表情的行人經過小松後，都會釋出寬容的笑意。我初初以為，他們是因為小松太可愛而笑的，就像她家中兩老一樣。
直至，一個小女孩指住我，笑道：「媽咪！隻貓仔好可愛啊。」她還想觸摸我，幸好雙腿不夠高。
在熙來攘往的街道上，小松終於停下步伐。
「應該係呢到‧‧‧‧‧‧」小松從手機抽離，抬頭望向眼前的咖啡店。
入面裝潢簡約乾潔，店內充滿地板及椅桌皆用木材質地，十分溫暖。
內坐著不少年輕女性之餘，更坐著不少‧‧‧‧‧‧
貓！！？
未做偵察，小松便貿然地進去，裡面陌生的氣氛令我一瞬繃緊。
爪子稍露的我，不經意地抓住了小松的膊。
「叮嚀⋯」門一開，門鈴響起。
「歡迎光臨！」站在收銀機前的男店主，善良地微笑：「隨便坐，有需要可以叫我。」
在小松找座位的途中，沿經不少逗貓玩的客人。他們用一條逗貓棒、一個毛織球、一隻遙控老鼠，就可以把牠們耍得樂也融融。
所以人類能佔領地球，不是沒有原因的。
「你好想玩啊⋯？」坐下後，小松挑逗性地問。
我冷哼一聲，跳到眼前的木製小圓桌上。
「呢啲嘢，對我依種野貓無用。」我冷冷地別過面。
「高傲。」小松伸手輕撫我喉嚨的位置。
我雙眼睜大：「！！！」
一種順滑感，不斷來回頸喉之中，雖然我有意抗拒⋯⋯卻令人欲罷不能。
她居然知道⋯⋯
我們的弱點之一。
就在酥麻難當之際，一個男人的出現，成功令小松停下了手。
「哈佬。」那男人從後拍拍小松的膊。
「喔⋯！」小松像嚇了一跳，站起跟對方握手：「哈佬⋯哈佬！你係⋯⋯約咗我嘅「墨報」記者！？」
他反問：「杞小姐？」對方年約二十多，其略帶鷹勾的鼻樑和深邃的眼眶，像是混血的輪廓。
「係，我係。」小松舉手。
「嗯⋯」對方點點頭，謙卑地坐到對面：「估唔到係真⋯⋯」
「真？」小松也坐回下來。
「相同真人居然一樣。」他細聲地感嘆出一句日文：「すごい⋯⋯」
那句日文，是指「了不起」之類的意思？
為什麼我能知道⋯⋯
「大したことはない。」小松居然也用日語，禮貌地回答。
這句的意思，大概是「沒什麼了不起」之類的？其實我也不太確定，只是聽完後，腦袋就馬上彈出這一句的字面意思和認知。
「仲要識日文，」那男的不禁舉起姆指，點頭稱讚：「太勁。」
「哈哈，我平時有上日文班，不過唔知用得啱唔啱。」小松答。
「我覺得已經好足夠。」他點點頭，向小松作自我介紹：「哦！未自我介紹添，我姓生，叫芥草，係喺「墨報」到做見習記者。」
接著，生芥草雙手遞上了自己的卡片。
「喔⋯」小松接過卡片：「芥草先生，你比我想像中後生，」
「都係嘅，我比同年嘅人更早入職。」突然羞澀傻笑的他，點點頭：「呃⋯！你叫咗嘢飲未？」
「未。」
「咁⋯⋯侍應唔該！」他生硬地舉手、呼叫：「要罐可樂。杞⋯小姐，你要飲啲咩？」
「就～」小松眼珠稍稍向上，思考著：「熱古古力。」
「古古力？！」生芥草愣然。
「喔⋯即係朱古力！」小松向侍應更正。
生芥草誇張地轉身，望向後方自言自語：「Oh my god⋯⋯居然連叫嘢飲都可愛過人。」然後，才別過身回來。
「其實你叫我小松得架啦。」小松又一貫地，向人釋出善意的微笑：「係呢，你係咪有嗰宗車禍嘅資料？」
「喔⋯係啊，你有咩想知？」生芥草擺出專業人士的眼神。
「我想知呢，當日你到場之後，有冇見到貓嘅⋯⋯屍骸？」最後兩隻字，小松難以說出口。
「呃⋯⋯我諗就應該冇，我攝影全程都冇救護員搬過貓屍出嚟，不過有一點好奇怪。」生芥草低著聲子，說：「我見到，死者身上有爪痕。」
「爪痕？」
「係，無論臉、身、腳都有，初頭我以為係發生車禍之後，有野狗之類去搞佢，但如果照小⋯⋯松，咳！你咁講，咁好有可能係貓做成？」不到一秒，生芥草又自我推翻：「不過貓又點會有咁強大嘅抓力⋯⋯」
「熱朱古力同可樂。」咖啡店職員奉上飲料，其後笑容可掬地問：「請問兩位要唔要買啲零食俾貓貓呢？」
我估計，那職員誤認為我是咖啡店的一員了吧。
「好啊，你想要咩零食啊？」小松刻意把臉靠向我，開朗地問。
圓桌上的我，一下子被三個人類觀看著。
人類的目光，就如同有種無形的壓力，把我重重包圍住。
「唔要。」我伸出貓掌，拍打小松臉頰。
「哈哈，呢隻貓可能係店長新收留番嚟，仲未習慣同人類相處。」職員陪笑道。
真的把我當成這裡的「去勢貓」了⋯⋯
「想問⋯⋯」小松指尖托鄂，問：「呃，有冇貓草啊？」
「有！不過我哋貓草係店長純天然、手工、本地、有機、小店式咁親自耕種，所以價格上都會比外面一般要貴。」職員詳盡地說明。
「嗯！要貓草啊，唔該。」小松轉身向我，用指尖戳戳我的頭：「睇．我．點．將．冰．山．劈．開～」
「嗚啊⋯⋯！」那生芥草又突然轉身向那空無一人的後方，然後掩住眼額地自問自答：「點可以咁卡哇伊！！？仲要咁純真咁可愛問隻貓鐘意啲咩⋯⋯隻貓仲真係喵喵聲咁答佢，成個畫面真好似睇緊日劇咁⋯⋯Jesus！」
那傢伙又突然自言自語激動些什麼！！？
「好，一份新鮮貓草。」職員記錄下，續問：「咁因為唔想其他貓都唔小心受貓草影響，所以我哋會提供一個毛公仔俾你哋，可以塞啲貓草入去，等佢自己一個享用，你哋想要邊款毛公仔呢？有「比卡超」、「加菲貓」同「彩虹小馬」。」
「加菲貓！」我大喊。
「哇⋯佢喵得好大聲下。」職員對我哈哈大笑。
「但我好鐘意比卡超喎⋯⋯」小松對我扁嘴。
「好可惜啊，比卡超已經冇哂貨。」職員歉意地說。
「咁啊？加菲貓啦。」小松一展愁眉，說。
對，沒有選擇，就沒有愁悔。
「啊⋯加菲貓都好似冇貨啦⋯⋯」職員雙手合十、致歉。
「⋯⋯」我和小松都擺出無奈的卑鄙視，這不是由頭到尾都沒有選擇嗎。
或者要唔要「彩虹小馬」？都好可愛嫁！係店長純天然、手工、本地、有機、小店式咁親自一針一線製作，當中仲有個意義係代表「同性平權」！十分有珍藏價值！如果我唔係員工，都會買一個！」這女職員嘴巴挺油的。
最後，小松只能選擇那隻彩虹小馬。
「喂，芥草先生！」小松把還在自言自語，陷入幻想的生芥草喚醒：「你又會約我嚟呢間鋪頭嘅？你熟客嚟？」
看來，小松也開始在疑惑這間貓咖啡店的存在意義。
「喔⋯喔⋯！」生芥草慌亂地回過神來：「咁係因為，你琴晚inbox完「墨報」FB專頁之後，我太好奇⋯⋯忍唔住手撳咗入你FB睇！對唔住！！我見你好多相都係同小動物影，覺得你係鐘意動物嘅人，就決定約你嚟呢間貓coffee！」
「喔～你咁樣係咪叫公器私用？」小松指的，是他用公司專頁把她約出來。
「呃⋯⋯」生芥草像不懂反應般僵住，隨後才苦澀一笑：「雖然可能會冇咗份工⋯⋯但已經值，我呢生無悔。」
「嘿嘿～我唔會咁絕情嘅。」小松酷似早有預謀，揚起深至酒窩的嘴角：「不過，我想知道點解你可以咁快到場？」
「呃⋯呃⋯⋯」生芥草難以啟齒：「呢層⋯係關於公司機密。」
「講啦～我最鐘意聽機密。」小松向他單眼，說：「我哋當普通計吓計咁。」
「嗚啊⋯！」面對那懾人的單眼，生芥草心臟彷如中槍，神志大受震撼：「請你唔好咁可愛⋯⋯！」
「呢條友真係誇張。」我抬頭望向生芥草。
「哈哈。」小松聽見我的說話後，掩嘴輕笑。
「你嘅彩虹小馬到！我已經將新鮮嘅貓草放入毛公仔入面，請慢慢享用！」那侍應把那玩偶，放到圓桌上。
「嗚啊⋯！」呼吸的瞬間，一陣不明的氣味直攻我大腦。
那氣味，是發自彩虹小馬玩偶之中。
很快地，我感到渾身不對勁！
腦袋開始轉動得很快很快⋯⋯
同時，也像毒品一樣令人上癮。
不需三分鐘，我經已撲向那毛娃娃不停抓咬，想要吸上更多的氣味。
我的情感亦逐漸被放大，外人的聲音聽起來是如此緩慢，這個世界就像只有我的存在，讓我任意翻滾。
「啲貓草⋯令到佢變到好誇張咁。」這次，換生芥草對我說。
「冇任何貓咪可以抵擋貓草。」小松趁機對我亂揉亂摸。
「好妒嫉⋯⋯」生芥草小聲地嘆氣，然後望望我、又望望小松：「小松！你係咪⋯想知，點解我可以咁快到達現場？」
「唔係公司機密咩？」
「我當介紹吓我哋報社咁講⋯⋯」生芥草猶豫地說：「都應該冇問題嘅。」
「咳咳⋯」生芥草先清一清喉，問：「喺講之前，我想問吓你⋯⋯點解會咁留意呢宗車禍？」
「咁係因為，我想搵番俾人拐走嗰隻貓。」小松真摰地回答。
提到芳的下落，沉醉在貓草迷幻的我，也突然清醒過來。
「嗯，佢係你寵物？」生芥草仔細地問。
「你可以當，佢係我朋友嘅朋友。」
「明白。」生芥草一副認真的表情：「小松，實不相瞞，其實我哋「墨報」係一份專報奇妙事聞嘅報紙。」
「呃？」小松聽不明白。
「簡單啲嚟講，即係專報奇怪嘅事。」生芥草數數手指，點算著：「例如⋯⋯鬼怪啊、都市傳聞之類。」
「但呢宗應該只係⋯⋯普通車禍？」小松說。
「但我報社唔係咁諗。」生芥草合上眼睛：「我哋報社有位預言家，係可以預知發生靈異事情嘅地方。」
「唔⋯」小松的表情在說明，她正在努力地理解。
「我一早知⋯」生芥草黯然地低頭、掩臉：「同人講出我真正嘅工作，果然係會被當成白痴仔⋯⋯」
「幾得意咁喎。」小松輕淡一笑。
「 なに！？」生芥草眼睛發出光芒。
是「什麼」的意思？為什麼我又懂得解讀這語言。
「你居然冇當我係傻⋯⋯？」生芥草不可置信地說。
「我細個嗰陣呢，媽咪成日同我講鬼怪嘅故仔哄我訓。」小松續說：「哈哈哈，芥草先生，你繼續講喇，所以宗車禍同靈異事情有關？」
「無錯！」生芥草感動無比，彷彿第一次被人肯定。
「但係呢，我睇你哋專頁篇新聞，都冇咩特別咋喎。」小松馬上滑起手機，給生芥草觀看：「你睇吓，你哋都冇話特別報道乜嘢鬼怪搞事，令到呢次車禍發生。」
「喔，咁係因為你仲未成為訂閱付費嘅會員，如果想睇靈異嘅事，一定要訂閱付費我哋，先有得睇。」生芥草說下去：「如果我哋亂咁免費發佈呢啲資訊出去，好快就會世界大亂。」
「哈哈哈哈，或者俾人恥笑？」小松喝口巧克力奶：「我返學都成日同朋友講怪談，但都會俾佢哋笑返轉頭，然後瘋狂駁故。」
「好彩伯母喺你細個，就一直薰陶你。」生芥草點頭。
「都唔知係好事定壞事。」
此時，在圓桌上半躺的我，忍不住出聲：「小松，問落去，嗰種車禍同靈異事物有咩關連。」
「喔！」小松點頭，續問：「芥草先生，咁你可唔可以透露吓，呢宗車禍有咩特別？」
「其實我長時間都喺外面standby，一收到報社電話，就會過去事發現場瘋狂影相，好少話會了解係咩事。」生芥草想了想：「所以⋯⋯我諗報社入面嘅人，會最清楚。」
「喔⋯⋯原來芥草先生只係無辦法接觸真相嘅低級記者。」小松瞇眼成線。
「哈哈哈⋯⋯」生芥草尷尬一笑後，緊握拳頭：「今後我會努力工作！」
「呼～」坐得久了的小松，伸伸懶腰：「不過真係估唔到，會關靈異事。」
「即係芳嘅下落，再冇下文？」我鎖眉。
「實有嘅，放心。」小松摸摸我腦袋。
在話題結束後，兩人重回平靜。
那低級記者生芥草裝作東張西望，實際上是往小松偷瞧。
另一邊廂，咖啡店的貓兒都玩累了般，開始一個一個地睡去。
「芥草先生，之後可唔可以繼續拜托你啊？」小松忽然問。
「係⋯係！？」生芥草的心，怦怦一跳。
「有咩消息，再同我講。」小松擺出槍擊的手勢。
「呃⋯好⋯好⋯⋯好。」生芥草連忙點頭。
「咁我走先啦。」小松向他道別，然後拍拍肩：「上嚟喇，將軍。」
「又要坐你膊頭⋯⋯」我不情願地跳上去。
小松去櫃檯付款後，被收銀機前這位留長辮的男性叫住。
「小姐。」面容瘦削的他，禮貌地作出自我介紹：「我係呢間咖啡店嘅老闆，李靜。」
「你好⋯」已經準備推門離開的小松，點點頭。
「由於你結帳滿一百蚊，我可以免費幫你占卜一次，願意嘛？」李靜身穿純白襯衫，與咖啡色的皮膚大顯分別。
「唔⋯都好。」小松同意。
此時，生芥草也剛好準備離開。
「你想占關於嘅嘢係？」李靜淡淡地問。
「愛情，我未經歷過。」小松淺笑。
「好，請你抽三張。」李靜把塔羅牌放到面前，任她抽取三張。
「一、二、三！」小松直接抽走左面的三張牌。
「好，我幫你解讀一下。」
老闆解讀期間，生芥草來到了：「呃咦⋯⋯小松，你仲未走？」
「我占緊愛情啊。」小松坦然地說。
「怦」生芥草心臟，又響起了。
數分鐘後⋯⋯
「生芥草先生⋯⋯你真係唔洗等我。」小松無奈地說。
「唔緊要！我唔趕時間！男仔當然最後走，俾女仔離開門口先！呢種禮貌嚟。」生芥草不斷說出強差人意的籍口。
兩人反複之間，老闆李靜經已解讀出卡牌。
「小姐，關於你嘅愛情⋯⋯好奇怪。」李靜有點苦惱地說明：「一種，好遙遠，但又好近嘅感覺。」
「我呢個人果然同愛情無緣⋯⋯」小松又無奈地瞇眼。
「似乎，係一個同你經歷過生死嘅人。」李靜沉默良久，續說：「而且，佢仲喺呢間店舖入面。」
此話一出，生芥草兩邊鼻孔急急噴出血液：「有⋯有冇話⋯⋯係邊個？！」他橫視咖啡店一周，見男性有五、六人。
「冇。」李靜淡淡地搖搖頭：「唔可以咁準確知道任何事。」
「Yes，計埋老闆，七份之一機會率⋯⋯」生芥草暗暗細數。
我拍拍小松的臉蛋：「走，個芥末草已經再冇情報提供到。」
「唔可以咁對人嫁，將軍。」小松反拍我的頭。
小松向為他占卜的李靜老闆和提供情報的低級記者生芥草道謝後，就踏上回家的旅途。
車上，我望著窗外的風景，希望想要無意間，看到芳的身影。
但這種事，當然是痴人說夢。
世界太大了，但憑我一個，又怎能找到。
我還得依靠，這個在車上睡得正熟的少女。
靠著周遭的風景，我察覺到小巴已駛到石澳一帶，於是我拍拍小松的臉蛋，將她弄醒。
「唔⋯」她皺眉。
還不醒就會坐過站。
「小松。」我持續拍打她的臉蛋。
「唔⋯⋯將軍啊，唔好咁調皮啦⋯」她閉著眼說話。
「要落車。」
「係喎⋯」她緩緩打開眼睛。
下車後，小巴拂塵而去，一副倦容的小松步入到寧靜的別墅區。
途經水清木華、水色一天的湖泊小道，但小松似乎都看厭了，眼角也不瞧一下，眼皮半合半開地回家。
「叮噹」她按下門鈴。
不出數秒，屋內傳來傢俱移動的聲音，木門更被大力地推開，那急速的步伐也叫人聞風喪膽。
開門的，卻是和藹可親的爺爺。
「歡迎小松歸來！！嘻哈哈哈，爺爺今日整咗一流嘅料理，等你返嚟食！」爺爺還喘著氣，感覺很急忙地趕來。
「係咩？太好啦。」小松皮笑肉不笑地回房。
晚餐，大家都大快朵頤。
小松則忽視了晚飯，選擇呼呼而睡。
因此，今夜只有兩老和寵物同檯吃飯。
「呢罐蕃茄牛肉口味罐頭啱唔啱你食啊？」那爺爺裝作幼稚的聲線，向我問。
「你識聽貓語？」我說。
「喔～好食啊？哈哈，好食就慢慢喇喎，唔夠就再喵多幾聲。」好，確定了，他不懂貓語。
寬敞的客廳只有外公和爺爺，氣氛和活力也不及小松在場的時候。
她每個動作、每句說話，都猶如添上色彩，令活力滿佈一樣。
「小松今日做咩唔落嚟食飯？你又偷偷哋帶佢食嘢？」那總是一臉嚴肅的外公，問。
正大口嘴嚼炸豬排的爺爺，說：「邊有！！！應該出咗去玩，所以累啫！」