茅山系列—桃花劍: 第四節

「你話你做茅山師傅，咁其實係做咩架？係咪即係好似林朝英既電影咁，著哂道袍，渣住桃木劍，追住妖魔鬼怪打打殺殺咁架？」
 
「你睇得太多戲啦，無咁危險既。鬼都曾經係人，都可以講下道理既。我地就好似談判專家咁，會試下開解下佢地先，幫佢地解決下生前的遺願咁啦。」
 
「咁佢地通常有咩遺願架？」
 
「哦，來來去去咪又係果幾味，例如話有人生前欠佢好多野，佢唔甘心死左之後由得條友唔使還。咁我咪揾返條友，要佢道歉表示返少少誠意。最記得有一個同我講，佢生前一直都無好好對過父母，到臨死一刻先後悔。咁我咪假冒佢買左一打壽包，送俾佢父母賀大壽咁囉。」
 
「哇……」她聽得如痴如醉，「聽落你份工都幾有意義喎。」
 




「唔係架，有時好多鬼都唔肯講道理架，野蠻到死。你知啦，鬼發起脾氣上來仲得人驚過你。」
 
「咩啊！」她臉頰一紅，接著又冷靜下來，追問道：「咁既話點處理呀？」
 
「呃……咁唯有攞尿淋佢地囉……」
 
「下，咁都得！？」
 
「係啊，童子尿治鬼啊嘛，你冇聽過咩？」
 




「哈哈哈！咁搞笑！」
 
她的笑聲很動聽，像是掛在窗邊的那串風鈴，叮嚀叮嚀。
 
電話不識情趣地響起，我拿了起來接聽。
 
「靚仔，你今次一定要幫我啊！」電話裡又是那把油膩的男聲。
 
「Roy哥，又點啊？我收左工架啦！」
 




「唔係呢！求下你啦，幫幫手，臨時有張加單啊！」
 
「幫你個頭咩，唔幫！」
 
「求下你啦，求下你啦！個客揾得我們好急，仲話幾錢都肯比，最緊要我們幫到佢，你幫幫手啦，係得你先做到渣！」
 
「唔幫。」我拿起咖啡啜了一口，冷冷的回道。
 
「之後你想唔做邊張單我都可以幫你推，但呢張單你一定要幫幫我呢！個客唔見左個女，靈媒話係俾佢前夫既鬼魂抓走左呀！」
 
「你揾第個啦，又唔係得我一個師傅。」我的態度很堅決。
 
他使出了殺手鐧。
 
「靚仔，其實我個女聽日生日，如果你肯食呢張單，我就有錢可以買份厚禮俾我個女，唔該你啊！拜託你！」




 
我望了一眼吧台後的她，她在用眼神問我：「有要事？」
 
我露出了無奈的表情，短短的答覆了Roy一句：「將張加單Send去我手機。」
 
我掛斷了電話，不想再聽到那傢伙虛情假意的客套說話。
 
她擦著杯子，問道：「做咩事啊？」
 
我托起腮幫子，答：「唔好意思，我臨時有野做。」
 
她藏不住眼神裡的落寞，低聲的跟我說：「唔緊要啦，做野要緊啊嘛。」
 
我心裡忽然一酸。
 




「你俾兩個鐘我，唔係，一個鐘！」
 
我用堅定的眼神望著她，道：「我做完野再返來揾你。」
 
她側了側身，試著藏起自己的笑意，一邊攪拌著手中糖水一邊用微甜的語氣說：「真係唔緊要喎，你去做野啦。」
 
手機響起收到訊息的聲音，是工作開始的信號。
 
可是我知道這一次，有人在等待我做完事回去。
 
大門關上，驚動了窗邊的風鈴，叮嚀叮嚀，真的很動聽。