【懸疑】《記憶謀殺效應》: -----一日-----
阿雞推開宮殿損壞的大門，門咔啦的發出壞掉的聲響，但阿雞此時根本沒空理會。他瞥了手上的紙信，知道事情要鬧大了，即使一路跑過來已經消耗他不少體力，但腦海幾乎也忘記了身體需要休息。
直至他跑到獄長的龍椅前，終於筋疲力盡，喊了一聲獄長，便大字形的攤於地毯上喘氣。獄長從龍椅站起來，執起阿雞丟在地上的信紙，拿起手閱讀著。
「一天後攻進來，目標是武器庫......」獄長把文字逐一讀著。
「大事不妙啊獄長，佢地揀我地打疫苗果日嚟......」阿雞攤著說。
「知道喇，應該係上次果幾個內奸通風報信啦。」獄長看著阿雞軟弱的樣子，沒好氣的回應他。
「咁我地要唔要更改打針日子，全力準備迎戰啊？」
「你無病啊？」獄長踢了阿雞肚皮一腳：「我駛驚佢地？」
「啊！！」阿雞沉吟一聲。
「疫苗注射如期進行，果邊由你負責。我到時自己一個對付佢地。」獄長說。
阿雞吐吐下唇，不再多說。
「我同老三既思怨情仇，都係時候做個了結......」獄長喃喃道。
「...」
「阿雞！」
「係！」阿雞馬上彈起來立正。
「同我準備多幾個犯人嚟做祭品！」
「係...係！！」阿雞聽命。
------
距離疫苗注射的時間，不足一天。
這晚的月光偏黃，抬頭不見星星，烏雲片片。神馬透著窗戶靜看夜空，目光擱淺於遠處的一大片黑雲。黑雲雖廣，但移動得緩慢。
「喂，神馬，唔好望風景喇！」
神馬這才回過神來，阿叻、Joyce、肥超還有他的幾個跟班共聚一堂，宿舍頓時感覺狹隘多了。
他們約好了這晚要傾談逃出的作戰計劃。
幾人坐在地上圍成一圈後，阿叻開腔：「好！咁我地開始商討計劃喇。」
「首先係商討行動代號，我提議叫做「唔打疫苗大作戰」！」
「邊有咁長既代號架。」Joyce反駁：「我提議叫「破冰」！破冰有勢如破竹既感覺......」
「等等，我覺得呢...」肥超舉起粗壯的手，揚開手板：「今次係為左偉晉既行動，不如代號就叫「偉晉」啦！」
「係咪傻架！」阿叻反對：「咁你嗌偉晉既時候，我點知你係想嗌佢本人定嗌行動代號啊？」
「又好似係。」肥超信服的點點頭。
「不如叫破風啦，聽落幾好！」Joyce說。
阿叻不耐煩的說：「又破，你有冇咁想破啊......」
「咁不如叫X啦，行動X聽落幾型啵。」有犯人提出。
「X你老味咩......」
肥超見阿叻說話毫不客氣，看不過眼。
「o靚仔，唔好咁串好喎！」肥超抓著阿叻衣領，阿叻嚇得嘩嘩大叫。
「對唔住大佬！」阿叻瞄瞄神馬：「你都幫手出句聲啦......」
神馬從抽屜裏取出發黃的紙筆，擺放在幾人前。
「代號既野之後再傾。」神馬先於紙上畫了個長方形：「大家聽我講，我地今次行動既目的係要避免打疫苗，同埋搵出逃離監獄、甚至整個監獄島既方法。但所有野既大前提，係我地要走得出呢個倉庫先。」神馬用筆截了截紙上的長方形。
「計劃一，當所有人入哂去倉庫坐低凖備打針時......」神馬指著肥超和其餘幾個犯人們：「你地到時扮不和，起哄搞事，搞到有咁大得咁大。我同Joyce同埋神馬乘機逃出倉庫，去監官範圍偷取離開監獄島既資料，因為到時果邊既監官一定比較少。你地盡量拖延時間，同埋千祈唔好順意咁比人打針。」
肥超搔耳：「打左針唔係會防菌咩？」
「唔係，呢個係獄長佢地散播既謊言，打左針既結局係會令你失去記憶。」神馬說。
「噢...」
「人地話防菌你就信，唔好咁天真啦。」阿叻嘲笑。
結果肥超又捉住阿叻，阿叻狼狽的掙扎。
「咁計劃二呢？」Joyce無視兩人打鬧，問起神馬。
「計劃二，就係同監官作正面衝突......我唔希望出現呢個情況，但係一旦計劃一失敗，我地必須要搵倉庫其中一個監官守備得無咁嚴既出口，正面交封。」
「呢樣交比我地。」肥超拍拍心口：「之前對你地咁無禮，而且偉晉同你地有段交情，我呢條命，預左攞嚟還架喇。」
阿叻瞄瞄他：「睇唔出你咁有義氣喎。」
「哼。」肥超鼻孔噴兩聲氣。
「計劃都有喇，萬事俱備，聽日實萬無一失！」Joyce興奮的說。
「聽日我地逃出監獄！！」犯人們志氣高亢。
神馬見他們如此雀躍，不開口阻他們興致，他深知道明天是掀開自己人生真相重要的一步。稍一不慎，或是什麼的變數，可能最後便要被迫打針，抽走記憶。
然後，可能一輩子就是這樣反反覆覆的過去，去到死前的一刻，也未知自己因何困進監獄，懵懂的渡過一生。
也或許，無知的人生活會過得較簡單，容易吧。
但看著刻烙身上的烙印，他不甘心。儘管明天有機會有性命之憂，他始終要找到答案。
眼前的幾人，至信他們，跟我也有著同樣的想法，才能團結起來反抗吧？
「唔駛擔心啦神馬。」Joyce淺淺一笑：「船到橋頭自然直。」
「嗯。」
的確，明天所有事情都會解決。
只怕。
這裡根本沒有方法逃出監獄島。
——-
囚室很冷。
於村落附近的洞穴建設的這個簡陋的囚室，囚室是個穩固鐵籠，三面靠壁。僅僅靠著洞外微弱光線，才能勉強分辨時間。設計這個囚室的原意，是為了處置對村落有威脅的人，讓他們在這個不見天日的地方，以及洞裡冷冰冰的氣溫，好好反思自己的過錯。
設計囚室的人，正是偉仔。
偉仔靜坐於囚室中央。他默默顫抖，皮膚上冰寒的水滴慢慢流動著。
洞穴外下著滂沱大雨，烏雲籠罩，四周白茫茫。雨點打進洞穴，有韻律的發出噠噠聲。至信撐起傘，大步踏過水潌，走到陰深的洞穴裡，才收起傘繼續往裡頭踱步。
腳步纏繞了水聲，聲音變得清晰，偉仔豎豎耳，垂低的頭一點點的抬高，看著鐵牢外的至信，咧嘴笑兩聲。
「估唔到成個村落，就只有你呢個陌生人嚟探下我。」
「佢地唔係唔想嚟，尤其老三。但係偉晉向村落既人施壓，話過嚟既人有機會係你同黨，結果無人敢過嚟。」
「哈哈......」偉仔問：「咁你點解要冒住瓜田李下既風險，過嚟搵我？」
「因為我有野想問你。」
「嗯...？」
「點解當初你做間諜既時候，要為左救我同芷籬而展露自己身份？」
「一切都係老三旨意。」偉仔瞄著至信：「佢唔想叛國者出事，你身上既烙印就證明左你係叛國者。」
「叛國者......」至信記起神馬與自己也有這個烙印。
「唔需要太介懷，真相喺呢一刻並唔重要住，仲有更多既事即將要去令人煩惱。」
至信想到牛牛，接著又說：「因為我同牛牛傾過，然後比對大家既記憶，但係大家都無任何烙印過既記憶，而且大家都唔知道點樣入左嚟監獄島呢度。」
「即係你地兩個加埋既記憶都未係完善。」偉仔綜合一句：「不過，你應該都會知道左啲你一直想知既野？」
「嗯。」
「你要唔要分享下？我喺呢度都好悶，想聽下故事。」
「...」