純粹記錄

致初戀




記得係前年年尾姐係2016年個陣收到初戀既一個信息，話好耐無見要約出黎聚一聚，當然二話不說就應承左。


係食飯期間傾起當年讀書時既往事，所有野都好似係琴日發生咁近，所有事都仲歷歷在目。





一齊上堂偷偷地send信息然後互相望一下再甜笑，傳下紙仔(就算有電話都要傳紙仔，好feel d)，

所有班際比賽佢都企定定係到睇足全場，之後拎定紙巾開定樽水，一中場就幫我抹汗遞水。(當然獎牌都係掛係佢條頸，入波都一定要比個心心指住佢啦)

係學校旅行個陣，特登行埋一二邊之後咩起佢行(以為自己拍緊tbb d劇，好似好sweet咁)，之後比miss發現，比miss少到仆街。

有一日落好大雨，我無帶遮同好多7頭一齊企係操場on99咁等停雨，佢拎住把遮係學校門口行番入黎，有個女仔企係我隔離都幾大聲咁對住佢講
"嘩你過黎遮我呀阿s 你真係好呀？"
之後佢一粒聲都無出就拖住我隻手行出學校門口直接行去巴士站，去到巴士站等車個陣佢先見到我有半邊係濕曬。
"喂傻左呀你！做咩唔遮住自己呀"佢問




"我唔想你濕住上巴士驚你病嘛！"我答
佢甜笑一下塊面紅曬之後話"傻仔！"
然後幫我用紙巾印乾件衫袖。(當然d水點印都印唔乾啦，仲要個心已經小鹿亂撞到爆曬缸，我相信佢都知，佢亦都係)

落緊canteen嘅時候突然之間同佢講，
"你係蘋果！我係樹！知唔知點解？"
"下你講咩呀？唔明呀！點解呀？"佢答
"因為我每一日都可以掛住你呀"我chok d 低b tone咁講
佢塊面紅過蘋果咁話"無聊！！！"
到宜加我部電話仲係save緊一粒蘋果。





仲有好多好多...
所有野都記得好清楚 - 就連每次拖住佢隻手，佢都會出好多手汗個刻既感覺都仲記得好清楚。


望住依個人覺得有d熟悉，因為以前一個星期起碼見五日仲要一見就係見八至四，成八粒幾鐘，佢個樣真係化左灰都認得！但感覺又有d陌生，始終我去澳洲依四年大家都無再聯絡。
今日嘅佢有少少唔同左！
um佢高左？唔係！
瘦左？唔係！
靚左好多？唔係！
應該係話佢識打扮左？都唔係！
係大家都大個左！ 無左以前個種稚氣，佢都多左少少女人味。


食完飯之後我地行左一陣，一路行一路傾下d閑偈，講下近排點呀，煲咩劇呀，呀邊個邊個同學宜加點呀...個d廢話，去到一個轉角位佢停低左之後好認真咁講左一句




"我有野想講"
我個腦無轉過但我既本能反應已經幫我答左 "你要結婚?"
"點解你知嘅"佢話
"我feel到架嘛，識左咁耐你郁起條尾我都知你想點啦哈哈"我笑住咁講，係咪真心我唔知不過我個表情係笑。
"係呀，佢上個星期同我求婚，我應承左！佢呀好蠢架其實我一早知啦，佢買戒指個陣呀仲...下刪1000字..."。我好專心咁聽，但我一d反應都比唔到佢，因為個腦已經空白左。我地一路行佢就一直講，突然之間拉停左我，問左一個我依世人最唔想答嘅問題，
"如果我請你黎飲，你會唔會黎呀？"
"um 如果我黎我驚我會搶...左佢風頭喎!"我好想講搶走你。
"收皮啦你，咁我當你黎架啦"講完就繼續行去搭車。

送完佢上巴士，我自己慢慢咁行番屋企，拎左支煙出黎食左一啖。成個腦全部都係同佢以前開心嘅野，um應該係話個段中學時光係暫時人生過得最開心。
無憂無慮，無任何壓力，無野需要拼搏，無野需要忙。最拼搏就係點樣係班際比賽拎冠軍，最忙嘅係抄功課個黃金十五分鐘。
其實佢同男友都拍左五定六年拖，男友年紀都比佢大，事業都好穩定，而且同居左一段時間，依一切其實都好理所當然！
但係對我黎講一d都唔理所當然，我都完完全全接受唔到。就好似曼聯拎世界盃，阿仙奴拎英超咁。

佢嘅決定就話左比我聽，我同佢唔會再有機會將個故事繼續寫落去，你問我鍾唔鍾意佢，um其實都無左感覺，只係有d唔捨得，但係依種不捨嘅感覺只會出現係佢一個人身上，因為係佢令我知道咩叫小鹿亂撞。我亦知道我唔捨得嘅唔止係佢依個人，最唔捨得嘅會係個段回憶。







*今日見到佢有左bb既相，我衷心祝福同恭喜佢！希望佢同bb都健健康康！



*ps最後係無去到佢婚禮，唔係因為驚搶新郎風頭，係我唔想衝上台都唱阿牛。😋